Aqşin Əliyev: "Belə rəqəmləri başqa ölkələrlə bağlı ümumiləşdirəndə say 100 minlərlə ölçülür"
"Rəngli inqilablar"ın nəticələrinə diqqətlə baxsaq, görmək olar ki, əslində, bu məsələdə Qərb və ABŞ özünün strateji maraqlarını güdüb. Ona görə də xoşu gəlməyən və onun "çaldığı havaya oynamayan" siyasi rejimləri hədəfə alıb.
Qərb bu yöndə öz hərəkətlərinin qanuni olduğunu iddia edərək bəyan edir ki, o, demokratiya, azadlıq və insan hüquqları kimi universal dəyərlərə əsaslanır.
Qərbin Yaxın Şərqin dəyişdirilməsi ilə bağlı nəhəng planları uğursuzluğa düçar oldu. "Ərəb baharı" "Ərəb qışı"na çevrildi. Ukraynadakı "küçə siyasəti" ölkənin bölünməsinə və qanlı toqquşmalara gətirib çıxardı. Bu ölkələr heç cür demokratiyaya yaxınlaşmadan xaosa sürükləndi. Görünən budur ki, MDB ölkələrində, Yaxın Şərqdə və Şimali Afrikadakı "rəngli inqilablar"ın pərdəsi arxasında məhz Qərb və Vaşinqton dayanır. Nəticədə isə çoxlu sayda insanın öldüyü bir mənzərə gözümüz önündə canlanır.
Qərbin üçüncü ölkələrdə "rəngli inqilab"ları həyata keçirməsi ssenarisi nəticəsində nə qədər insan həyatına son qoyulub?
Ekspert Aqşin Əliyev qəzetimizə açıqlamasında bildirdi ki, bununla bağlı konkret rəqəm söyləmək bir qədər çətindir: "Ancaq faktı danmaq olmaz. Qərbin birbaşa ssenarisi əsasında reallaşan həmin layihələrin həyata keçirilməsi daxili çaxnaşmalar hesabına başa gəlib. Buna heç də demokratiya istəyi adını vermək olmaz. Proseslərin təhlili göstərir ki, bu məsələdə Qərbin və ABŞ-ın maraqlarına cavab verməyən ölkələr ön plana çəkilib. Qərbin Yaxın Şərqdə elə müttəfiqləri var ki, onlarda monarxik quruluşdur. Ancaq maraqlıdır ki, onlar "rəngli inqilab"lar ssenarisindən kənarda qalıb. Əsasən də təbii ehtiyatlarla zəngin və geostrateji cəhətdən önəmli bölgədə yerləşən dövlətlər bu hədəfə tuş gəldi. Həmin ölkələrin əksəriyyətində stabillik və vəd olunan demokratiya əvəzinə xaos yarandı. Ən böyük insan tələfatı Yaxın Şərqdə olub. 2003-cü ildən İraqda demokratiya qurulması adı ilə reallaşan ssenarinin həyata keçirilməsi 100 minlərlə insanın həyatına son qoyub. Təkcə 2015-ci ildə İraqda törədilən terror aktları, zorakılıq və hərbi münaqişə nəticəsində 22 mindən çox insan həlak olub. Bu haqda BMT-nin İraqdakı missiyası məlumat verib.
Dinc vətəndaşlar arasında ölənlərin ümumi sayı (polis əməkdaşları və Anbar vilayətindəki qurbanlar da daxil olmaqla yaralanan və öldürülənlər) 2015-ci ildə 22 370 nəfər olub. 14855 nəfər isə yaralanıb. Bu adi bir statistikadır. Belə rəqəmləri başqa ölkələrlə bağlı ümumiləşdirəndə say 100 minlərlə ölçülür".
Məhəmmədəli QƏRİBLİ
