Fətullahçı terror təşkilatının (FETÖ) zərərsizləşdirilməsi istiqamətində qardaş Türkiyədə atılan addımlar xeyli sayda insanın həbsinə gətirib çıxarsa da, bu qruplaşmanı hələ tam neytrallaşdırmaq mümkün olmayıb. Belə görünür ki, ötən illər ərzində qrup üzvləri müxtəlif dövlət orqanlarında kifayət qədər dərin kök sala bilib.
Aparılan mübarizə çərçivəsində isə Türkiyənin əsas kəşfiyyat orqanı olan Milli İstihbarat Təşkilatının (MİT) 87 əməkdaşı işdən çıxarılıb. Onlar FETÖ ilə əlaqədə şübhəli bilinir. İşdən çıxarılan əməkdaşlardan 52-si haqda cinayət işi başlanıb. Bundan əlavə, İstanbulun Anadolu rayon Prokrorluğunun FETÖ ilə bağlı apardığı istintaq çərçivəsində "Kimse Yokmu" ictimai təşkilatına qarşı cinayət işi başlanıb. Məlumata görə, birlik Qurban bayramı ilə bağlı toplanan ianə pullarını FETÖ-yə ötürməkdə ittiham olunur.
Qeyd edək ki, "Kimse Yokmu" Həmrəylik və Yardımlaşma Dərnəyi 2004-cü ildə İstanbulda yaradılıb. Türkiyə Nazirlər Kabineti birliyi cəmiyyətin mənafeyi üçün çalışan təşkilat kimi qeydə alıb. Belə bir vaxtda hakim Ədalət və İnkişaf Partiyasının (AKP) 619 üzvünün FETÖ ilə əlaqəsinin olduğu müəyyənləşdirilib. AKP sədrinin təşkilati məsələlər üzrə müavini Mustafa Ataşın sözlərinə görə, iyulun 15-də dövlət çevrilişinə cəhddən sonra həmkarlar, banklar, sosial müdafiə qurumlarında 519 partiyanın rayon təşkilatlarında isə 100 nəfərin FETÖ ilə əlaqəsi olduğu müəyyənləşib. M.Ataş deyib ki, AKP-nin 10 milyon üzvü var və onların arasında FETÖ-yə rəğbəti olanların da mövcudluğu mümkündür. Sədr müavini FETÖ ilə əlaqəsi olanların aşkarlanaraq partiyadan çıxarıldığını vurğulayıb.
Amma belə görünür ki, FETÖ ilə mübarizə hələ davam edəcək və bəlkə də indikindən daha gərgin xarakter alacaq. Türkiyə baş nazirinin müavini Nurəddin Caniklinin açıqlamaları da bunu təsdiq edir. Onun bildirdiyinə görə, yüz səksən min FETÖ üzvü xüsusi bir xəbərləşmə platforması ilə təşkilatlanıb. O, FETÖ-yə qarşı aparılan əməliyyatlardan narazı qalanların son günlərə qədər çox az olduğunu, onların sayının son 4-5 gündə artdığını bildirib. Nazir müavini şikayət mətnlərinin böyük qisminin standart olduğunu ifadə edib: "Bu da son dərəcə əhəmiyyətlidir. Bu, terror təşkilatının xüsusi xəbərləşmə platformasıdır. Yalnız müstəsna xüsusi üzvlər bundan istifadə edə bilər və onların sayının 180 min olduğu təxmin edilir". Maraqlıdır ki, bu günlərdə "Yeni Şafak" nəşrinə müsahibəsində təqaüddə olan polkovnik Həsən Atilla Uğur da 15 iyul tarixində yaşanan çevriliş cəhdindən sonra təhdidin hələ aradan qalxmadığını deyib: "15 iyuldan sonra zəfər sərxoşluğu yaşanır. İkinci çevriliş cəhdinə hazır olun, ikincisi daha qanlı olacaq. Kimsə "bu iş bitdi, Türkiyə relsinə oturdu, artıq Amerika, FETÖ, PKK başqa heç nə edə bilməz, biz bu təşkilatların belini qırdıq" deməsin". Onun sözlərinə görə, ilk olaraq ölkənin cənub-şərqində xaos yaradılacaq: "Hadisələr, böyük ehtimalla, Şəmdinli, Yüksekova və ya da Kızıltəpədə baş verəcək. Burada 15-20 adam öləcək. Qərbdə isə fitili 4-5 nöqtədə böyük səs-küy yaradacaq partlayışlarla odlayacaqlar. Bunu ya PKK, ya da İŞİD edəcək".
Polkovnik bildirir ki, prosesin araxasında xarici qüvvələr var. Həsən Atilla Uğur xəbərdarlıq edir ki, Türkiyə bu oyunu pozmasa, ikinci çevrilişə cəhdlər olacaq. Problemin köklü həlli üçün isə Ankara, əvvəlki kimi, Vaşinqtondan Fətullah Gülənin ekstradisiya edilməsini gözləyir. Türkiyənin xarici işlər naziri Mövlud Çavuşoğlu növbəti dəfə bildirib ki, Türkiyə Gülənin hərbi çevrilişə cəhddə əlaqəsini təsdiq edən bütün sübutları ABŞ-a göndərib: "Çevriliş cəhdinin arxasında Gülənin özü və ona bağlı olanların olduğunu göstərən dəlilləri də göndərdik. Buna görə hüquqi proses başlanıb. Müttəfiqimiz ABŞ-dan bu prosesi tamamlamasını, mümkün olan ən qısa müddətdə onu ekstradisiya etməsini gözləyirik". Türkiyənin ədliyyə naziri Bəkir Bozdağ isə qeyd edir ki, hərbi çevrilişə cəhddə günahlandırılan Fəthullah Gülənin ABŞ-dan başqa bir ölkəyə qaçmaq planlaşdırmasına dair kəşfiyyat məlumatları var. Onun sözlərinə görə, ABŞ F.Gülənin qaçışını əngəlləmək üçün onu təcili tutmalıdır. ABŞ isə hələ də ekstradisiya məsələsini uzatmaqla məşğuldur.
Nahid SALAYEV
