Türkiyə Prezidenti Rəcəb Tayyib Ərdoğan Sammitin açılışında çıxış edərkən deyib ki, dünya birliyi silahlı münaqişələrin yaranmasının qarşısını almalıdır. Onun sözlərinə görə, dünya birliyi, həmçinin bu münaqişələrin nizamlanması üzrə fəal səylər göstərməlidir.
Prezident qeyd edib ki, Türkiyə silahlı münaqişələrin nizamlanmasında vasitəçi kimi çıxış edir.
R.T.Ərdoğan ümid etdiyini bildirib ki, Ümumdünya Humanitar Sammiti humanitar böhranın nizamlanmasına vacib töhfə verəcək.
O əlavə edib ki, Türkiyə Suriya qaçqınlarına fəal kömək edən ölkələrdən biridir: "Türkiyə suriyalı qaçqınların saxlanmasına 10 milyard dollar xərcləyib, ölkədəki suriyalı qaçqınların sayı 3 milyon nəfərdir. Dünya birliyi isə suriyalı qaçqınların saxlanmasına 455 milyon dollar ayırıb".
"Dünya ictimaiyyəti suriyalı qaçqınların saxlanmasında Türkiyəyə yardım etməlidir"
R.T.Ərdoğan bildirib ki, dünya ictimaiyyəti suriyalı qaçqınların saxlanmasında Türkiyəyə yardım etməlidir. Onun sözlərinə görə, Türkiyə Suriyadan olan qaçqınlara humanitar yardım göstərməyə davam edir.
BMT-nin baş katibi: "Dünya birliyi münaqişələrin həllinə kömək etməlidir"
"Dünya birliyi münaqişələrin həllinə kömək etməlidir". Bunu isə BMT-nin baş katibi Pan Gi Mun İstanbulda I Ümumdünya Humanitar Sammitinin açılışında deyib.
BMT baş katibi bildirib ki, münaqişələr zamanı, əsasən dinc əhali əziyyət çəkir.
Onun sözlərinə görə, dünya birliyi humanitar böhranla da fəal mübarizə aparmalıdır: "Çox təəssüf ki, hazırda elə təəssürat yaranır ki, insan həyatının dəyəri yoxdur".
Baş katibin sözlərinə görə, 2030-cu ilə yaşayış yerini dəyişmiş şəxslərin sayının yarıyadək azalması üçün mümkün olan hər şey edilməli, qaçqınlar üçün ən yaxşı həll yolları tapılmalıdır: "Bu sammiti 4 il əvvəl keçirməyi təklif etdim. Hazırda onun aktuallığı artıb. Rekord sayda - 130 milyon insanın sağ qalmaq üçün köməyə ehtiyacı var".
O əlavə edib ki, sammitdə bir neçə sahədə vacib məsələlər müzakirələr olunacaq.
Merkel: "Dünyanın humanitar prinsiplər üzrə yeni konsensusa ehtiyacı var"
Almaniya kansleri Angela Merkel isə bildirib ki, dünyada humanitar prinsiplər üzrə yenilənmiş qlobal konsensusa ehtiyac var. Onun sözlərinə görə, son vaxtlar insan iztirablarının miqyası şoka salır.
Kansler bildirib ki, Almaniya humanitar yardıma, köməyə daha çox vəsait ayıracaq: "Bizə kritik və fövqəladə vəziyyətlərə reaksiya vermək üçün yaxşı maliyyə mexanizmləri lazımdır".
Xəbər xidməti