Rusiyalı politoloq: "Həmsədr ölkələr Ermənistana təzyiq etməlidir"
Qarabağda vəziyyətlə bağlı Azərbaycan və Ermənistan liderlərinin görüşünün nətiəcələri üzrə təmkinli nikbinlik üçün əsas var. Trend-in RİA Novosti-yə istinadən verdiyi məlumata görə, bunu Rusiya Prezidentinin mətbuat katibi Dmitri Peskov deyib.
D.Peskov bildirib: "Biz ümid etmək istəyirik ki, daha sabit dövrün davam etməsinə imkan vermə baxımından təmkinli nikbinlik üçün əsas var".
Fransa Xarici İşlər Nazirliyinin rəsmi nümayəndəsi Romen Nadal isə bildirib ki, Fransa hakimiyyəti Dağlıq Qarabağ münaqişəsinin nizamlanması üzrə Vyanada keçirilmiş beynəlxalq görüşün nəticələrini alqışlayır.
O qeyd edib ki, Vyanada tərəflərin üzərinə götürdükləri öhdəliklər böyük əhəmiyyətə malikdir: "Fransa həmin öhdəliklərə əməl etməyə çağırır və Minsk qrupunun həmsədri qismində rusiyalı və amerikalı tərəfdaşları ilə vasitəçiliyini davam etdirəcək".
Böyük Britaniya da Dağlıq Qarabağ münaqişəsinin tənzimlənməsi üzrə Vyana görüşünü alqışlayır. Bu barədə Böyük Britaniya Xarici İşlər Nazirliyinin "Facebook" səhifəsinə istinadən xəbər verir.
ATƏT-in Minsk qrupu Dağlıq Qarabağ münaqişəsinin tənzimlənməsi üzrə Azərbaycan və Ermənistan prezidentlərinin Vyana görüşünün nəticələrindən ruhlanıb. Bunu isə amerikalı həmsədr Ceyms Uorlik deyib.
C.Uorlik bildirib: "Biz ötən gün keçirilmiş görüşdən çox ruhlanmışıq. Hər iki prezident atəşkəs rejimi razılaşmasına əməl etmək, etimadın möhkəmləndirilməsi üzrə vacib tədbirləri aktivləşdirmək və gələn ay danışıqlara başlamaq öhdəliklərini götürüblər ki, bu da hərtərəfli nizamlanmaya gətirib çıxara bilər".
Onun sözlərinə görə, prezidentlər status-kvo çərçivəsindən çıxmaq və regionda bütün insanlara fayda verə biləcək tədbirlər görmək üçün siyasi iradə nümayiş etdirdilər: "ABŞ və həmsədrlər bu işdə istənilən zəruri köməyi göstərməyə hazırdırlar".
Türkiyə Xarici İşlər Nazirliyindən (XİN) isə deyiblər ki, Dağlıq Qarabağ münaqişəsi Azərbaycanın ərazi bütövlüyü çərçivəsində nizamlanmalıdır.
XİN-dən bildiriblər ki, Türkiyə ATƏT-in Minsk qrupunu Dağlıq Qarabağ münaqişəsinin nizamlanması üzrə daha aktiv fəaliyyətə çağırır: "Türkiyənin mövqeyi dəyişməz olaraq qalır - münaqişə sülh yolu ilə həll olunmalıdır".
Ermənistanın atom silahına malik olması ilə bağlı bəyanata gəlincə, Türkiyə XİN-dən qeyd ediblər ki, belə bəyanat hətta Ermənistanın özünün marağında deyil: "Kimyəvi və ya nüvə silahından istifadə bəşəriyyətə qarşı cinayətdir. Biz əminik ki, Ermənistanın nüvə silahı yaratmaq üçün imkanları yoxdur".
"Həmsədr ölkələr Ermənistana təzyiq etməlidir"
"Əgər Azərbaycan və Ermənistan prezidentlərinin görüşünün yaxın vaxtlarda ikinci raundu keçirilməsə, təmas xəttində vəziyyət yenidən gərginləşəcək". Bunu isə APA-nın Moskva müxbirinə açıqlamasında rusiyalı politoloq, «Alte et Certe» Analitik Mərkəzinin rəhbəri Andrey Yepifanstev bildirib. Onun sözlərinə görə, prezidentlərin Vyana görüşünün keçirilməsi özü müsbət faktdır: "Nəzərə alaq ki, bir ay bundan qabaq qoşunları təmas xəttində gərginlik pik həddə idi. Ermənistan danışıqlar prosesindən, ümumiyyətlə, çıxdığını bəyan etmişdi. Bundan başqa, Yerevan danışıqlara başlamaq üçün ilkin şərtlər irəli sürmüşdü. Bu, Azərbaycan tərəfinin atəşkəs rejiminə əməl edəcəyinə zəmanət verməsi və digər şərtlərdən ibarət idi. Lakin göründüyü kimi, Ermənistanın irəli sürdüyü şərtlərin heç biri yerinə yetirilmədi və Yerevan da danışıqlar masasına oturdu".
Rusiyalı ekspertin fikrincə, əgər danışıqlar prosesində real irəliləyişlər olmasa, real addımlar atılmasa, müharibə təhlükəsi yenidən gündəmə gələcək: "Ermənistanın mövqeyi münaqişə bölgəsində "status-kvo"nu qoruyub saxlamaqdır ki, bu da münaqişənin həlli prosesi ilə bağlı danışıqları bəhrəsiz edir. Həmsədr ölkələr Azərbaycanı daim danışıqlar prosesində saxlamaq istəyirlər. Ona görə ki, Azərbaycan danışıqlar masasına oturanda, döyüşmür. O ki qaldı həmsədr ölkələrin tərəflərin güzəştlər tapmasına yardımçı olacağına, deyə bilərəm ki, danışıqlar prosesində güzəşt ilkin olaraq Ermənistanın işğal etdiyi rayonlardan bir neçəsini nəqliyyat blokadasının aradan qaldırılması müqabilində Azərbaycana qaytarması ola bilər. Hesab edirəm ki, həmsədr ölkələr Ermənistana bu addımı atmağa təzyiq etməlidir. Son 20 ildə Ermənistan "status-kvo"nu saxlamaqla uğur əldə etdiyini düşünürdü. Lakin aprel hadisələri bunun əksini sübut elədi. Son 20 ildə Ermənistan hərbi vəziyyətin Azərbaycanın xeyrinə dəyişdiyini gördü. Ona görə də hesab edirəm ki, hazırkı hərbi-siyasi vəziyyət Ermənistanın uzun illərdir ki tutduğu mövqedən əl çəkməsini mümkün edir. Bu zaman müəyyən imkan yaranacaq ki, kompromis əldə olunsun".
Rusiya İctimai Palatasının üzvü, Siyasi Təhqiqatlar İnstitutunun direktoru, politoloq Sergey Markov isə APA-ya prezidentlərin həmsədrlərin iştirakı ilə Vyanada baş tutan görüşünü belə şərh edib: "Prezidentlərin Vyana görüşü zahiri cəhətdən nəticəsiz olsa da, vacib görüş idi. Bu görüşdə heç bir razılıq əldə olunmadı, bircə təmas xəttindəki insidentlərin araşdırılması ilə bağlı razılıqdan başqa. Bu görüş bir neçə mərhələdə məlum formula çıxmaq üçün lazım idi. Bu, münaqişənin həlli ilə bağlı Kazan formuludur ki, özündə Dağlıq Qarabağ ətrafındakı ərazilərin qaytarılması müqabilində Ermənistan blokadasının yarılmasını əks etdirir. Bu formula çıxmaq üçün bir neçə belə görüş keçirilməlidir. Vyana görüşünü "dörd günlük müharibə"dən sonra danışıqlar prosesinin bərpası da adlandırmaq olar. Hesab edirəm ki, bu ilin sonuna kimi danışıqlar prosesində nailiyyət əldə olunacaq".