Bir neçə gün əvvəl Suriyanın Haseke şəhərində Əsəd rejimi ilə kürdlərin təşkilatı olan PYD və onun silahlı qanadı YPG arasında görüş keçirilib. Artıq o görüşün detalları da ortaya çıxmağa başlayıb.
Baki-xeber.com xəbər verir ki, yanvarın 25-də keçiriləcək Cenevrə görüşü öncəsi Əsəd rejimi ilə PYD-nin yaxın təmasları da artmağa başlayıb. Rejimin daxili işlər naziri əl-Şaarla YPG-nin sözçüsü Ridor Xəlil və Kandildən gələn PKK nümayəndələri bir neçə gün əvvəl Suriyanın Haseke bölgəsində bir araya gəlib.
Əsəd rejimini daxili işlər naziri İbrahim əl-Şaarın təmsil etdiyi və PYD həmsədri Saleh Müslimin qatılmadığı Haseki görüşünün, PYD-nin nəzarət etdiyi sahəni Suriyanın şimalından Aralıq dənizinə qədər genişləndirmək istəyən və bunun üçün türkmənlərin yaşadığı bölgələrdə rejimlə birlikdə hərbi əməliyyatlar keçirən Rusiyanın tələbilə reallaşdığı iddia edilir. Bölgədəki qaynaqlardan əldə edilən məlumata görə, Rusiya PYD-ni Suriyanın şimalında bir güc kimi müzakirələrə qatmaq və Türkiyənin ola biləcək müdaxiləsinə mane olmaq üçün PYD-ni Əsəd rejimi ilə birləşdirməyə çalışır.
Görüşlərdə ən son hədəf Fıratın qərbinə keçərək Afrin ilə Kobani bölgələrini birləşdirməyi palanlaşdıran PYD-yə Türkiyənin müdaxilə etməsinin qarşısını almaqdır. Bu planın tərkib hissəsi kimi Rusiya terror təşkilatını da rejim ətrafında birləşdirməyə çalışır.
Haseke görüşlərdən üç gün əvvəl isə Rusiya xarici işlər nazirinin müavini Qennadiy Qatilov PYD həmsədri Saleh Müslimlə Cenevrədə araya gəlib. Suriyadakı mənbələrdən əldə edilən məlumatlara görə, hədəf PKK-nın Suriya qolu YPG-ni Suriya ordusuna daxil etməkdir. Bu plana görə, Əsəd rejimi Saleh Müslimə hakimiyyətdə bir vəzifə də verə bilər.
Saleh Müslim bir müddət əvvəl verdiyi bir açıqlamada ən çox Türkiyənin ola biləcək bir müdaxiləsindən çəkindiyini və bununla bağlı Rusiyanı da məlumatlandırdığını bildirmişdi.
Haseke müzakirələrində iddia edilən razılaşma baş tutarsa və YPG rejimin ordusu ilə birləşdirilərsə Türkiyənin PYD-yə müdaxiləsi Suriya rejiminə müdaxilə sayılacaq. Bu vəziyyətdə Rusiya da rejimin müdafiəçisi kimi Türkiyə ilə qarşıdurmaya girəcək.