Ermənistan parlamentində “Güclü Ermənistan” fraksiyasının rəhbəri Narek Karapetyan iddia edib ki, Azərbaycan delimitasiya və demarkasiya prosesi çərçivəsində Ermənistana on minlərlə hektar ərazi qaytarmalıdır. O, Paravakar, Gorus və Cermuk istiqamətlərində müxtəlif ərazilərin Ermənistana aid olduğunu bildirib.
Karapetyan qeyd edib ki, Azərbaycanın bu ərazilərlə bağlı mövqeyi onun Ermənistanla uzunmüddətli və təminatlı sülhə nə dərəcədə hazır olduğunu göstərəcək. O, həmçinin, Tiqranaşen adlandırdıqları Azərbaycanın Kərki kəndinin gələcəkdə Azərbaycana qaytarılması ehtimalını tənqid edib və hakimiyyəti seçki dövründə bu məsələ ilə bağlı cəmiyyəti məlumatlandırmamaqda ittiham edib.
Müxalif siyasətçi TRIPP marşrutu məsələsinə də toxunaraq, onun "dəhliz" deyil, yol kimi təqdim edilməsinin gələcək hakimiyyət üçün danışıqlar imkanlarını qoruduğunu bildirib.
Qeyd edək ki, Nikol Paşinyan daha əvvəl Artsvaşenin Ermənistan ərazisi olduğunu, Tiqranaşen (Kərki), Barxudarlı, Sofulu və Yuxarı Əskiparanın isə Ermənistan ərazisi olmadığını bəyan edib.
Ermənistan müxalifəti Azərbaycanla delimitasiya və demarkasiya prosesinin dayandırılmasına və ya ləngidilməsinə nail ola bilərmi?
Azər Həsrət: "Azərbaycanın “dəmir yumruğu” yerindədir və ölkə öz milli maraqlarını qorumaq gücündədir"
Siyasi şərhçi Azər Həsrət məsələ ilə bağlı “Bakı-Xəbər” qəzetinə açıqlamasında bildirib ki, Ermənistanın sərhədlərin dəqiqləşdirilməsi və delimitasiya prosesini müxtəlif bəhanələrlə ləngitməyə çalışması ilk növbədə İrəvanın öz maraqlarına zərbə vura bilər. Onun sözlərinə görə, Azərbaycan tərəfi bu prosesin qarşılıqlı razılaşma və beynəlxalq hüququn prinsipləri əsasında başa çatdırılmasında maraqlıdır və məsələyə konstruktiv yanaşır.
Azər Həsrət qeyd edib ki, delimitasiya yalnız sərhəd xəttinin müəyyənləşdirilməsi deyil, eyni zamanda iki dövlətin bir-birinin ərazi bütövlüyünü və suverenliyini tanıması baxımından mühüm prosesdir. Bu baxımdan, tərəflər arasında qarşılıqlı ərazi iddialarının gündəmə gətirilməsi sülh prosesinin mahiyyətinə ziddir və regionda etimad mühitinə mənfi təsir göstərə bilər.
Siyasi şərhçinin fikrincə, Azərbaycan indiki mərhələdə Ermənistanı siyasi və diplomatik baxımdan çətin vəziyyətə salmaq niyyətində deyil. Əksinə, Bakı iki ölkə arasında ortaq məxrəc tapılmasını, sərhədlərin dəqiqləşdirilməsini və uzunmüddətli sülhün təmin olunmasını istəyir. Lakin bu yanaşma Azərbaycanın öz milli maraqlarından və ərazi bütövlüyündən imtina etməsi anlamına gəlmir.
O bildirib ki, Ermənistan tərəfindən Azərbaycana qarşı hər hansı ərazi iddiasının irəli sürülməsi qarşılıqlı yanaşma prinsipini gündəmə gətirə bilər. "Əgər söhbət qarşılıqlı ərazi iddialarından gedəcəksə, Azərbaycan da öz tarixi və hüquqi arqumentlərini ortaya qoymaq imkanına malikdir. Azərbaycan bu gün daha çox sülhün əldə olunması naminə maksimalist mövqedən çıxış etmir və Ermənistanla ortaq məxrəc tapmağa çalışır", – deyə ekspert vurğulayıb.
Azər Həsrət hesab edir ki, Ermənistanın bu reallığı nəzərə alması vacibdir. Onun sözlərinə görə, Azərbaycan sərhədlərin dəqiqləşdirilməsi üzrə fəaliyyət göstərən komissiyanın işində iştirak edir və prosesin nəticə etibarilə iki ölkə arasında aydın, qarşılıqlı tanınan və hüquqi baxımdan təsdiqlənmiş sərhədin formalaşmasına xidmət etməsini istəyir.
Ekspert əlavə edib ki, Ermənistanın müxtəlif ərazi iddialarını gündəmə gətirməsi həm sülh danışıqlarını çətinləşdirə, həm də iki ölkə arasında əldə olunmuş razılaşmaların icrasına mənfi təsir göstərə bilər. Halbuki, regionda yaranmış yeni geosiyasi reallıq tərəflərdən qarşıdurma ritorikasından uzaqlaşmağı və praktiki əməkdaşlığa üstünlük verməyi tələb edir.
Onun fikrincə, Ermənistan üçün daha düzgün yol Azərbaycanla sərhədlərin delimitasiyasını sürətləndirmək, qarşılıqlı ərazi iddialarından imtina etmək və sülh sazişinin imzalanmasına mane ola biləcək məsələləri aradan qaldırmaqdır. Əks halda, İrəvanın bu cür iddiaları özünün regional mövqelərini zəiflədə və Azərbaycanla münasibətlərdə yeni gərginlik yarada bilər.
Azər Həsrət vurğulayıb ki, Azərbaycan sülh gündəliyinə sadiqdir və regionda davamlı sabitliyin təmin olunmasında maraqlıdır. Bununla yanaşı, ölkənin ərazi bütövlüyü və suverenliyi məsələsində Azərbaycanın mövqeyi dəyişməzdir. "Azərbaycan Ermənistanın ərazisinə iddia irəli sürmək niyyətində deyil və sülhün təmin olunması naminə bu istiqamətdə konstruktiv mövqe nümayiş etdirir. Lakin qarşı tərəf Azərbaycana qarşı ərazi iddiaları irəli sürərsə, bunun cavabsız qalacağını düşünmək düzgün deyil. Azərbaycanın “dəmir yumruğu” yerindədir və ölkə öz milli maraqlarını qorumaq gücündədir”, – deyə siyasi şərhçi bildirib.
Dəniz NƏSİRLİ
