“Ermənistan növbəti beş il ərzində KTMT-yə qayıtmağı planlaşdırmır və təşkilatdan çıxarılmaqdan məmnun olardı”. Bunu Ermənistanın Baş naziri Nikol Paşinyan parlament üzvlərinin suallarını cavablandırarkən bildirib.
“Əminliklə deyə bilərəm ki, KTMT-də işimizi gücləndirmək niyyətində deyilik”, - deyə Paşinyan bildirib.
Onun sözlərinə görə, KTMT hazırda müvafiq müzakirələr aparır. Bundan əlavə, Nizamnamədə ölkənin təşkilatdan çıxarılması ehtimalı da nəzərdə tutulub.
"Təşkilat Ermənistan Respublikasını xaric etmək qərarına gəlsə, çox sevinərəm. Heç olmasa, çıxıb-çıxmamaq dilemmasından azad olarıq" – deyə Baş nazir qeyd edib.
Paşinyan onu da bildirib ki, Rusiyanın Ermənistan mallarının ixracına qoyduğu məhdudiyyətlər Avrasiya İqtisadi Birliyinin qaydalarına ziddir və bu, əslində AİB üçün böhran yaradır. O, bununla bağlı artıq təşkilat daxilində müzakirələrə başladıqlarını deyib.
“Bu ilin 29 may tarixində dörd AİB üzv ölkəsinin liderlərinin birgə bəyanatı diqqətəlayiqdir, orada deyilirdi ki, sitat gətirirəm: "Ermənistan Respublikasında Avropa İttifaqına qoşulmaq və ya Avrasiya İqtisadi Birliyində üzvlüyün saxlanılması məsələsi ilə bağlı mümkün qədər tez bir zamanda milli referendum keçirilməsinin zəruriliyi ilə bağlı mövqeyimizi bölüşürük". Biz bunu yüksək qiymətləndirdiyimiz dostcasına bir jest kimi qəbul edirik və əminəm ki, belə bir referendum Ermənistanda mütləq keçiriləcək” – deyə Paşinyan bildirib.
O, bildirib ki, bunun üçün Ermənistan əvvəlcə üzvlük üçün Aİ-yə rəsmi müraciət etməlidir: “Bu suallara bəzi cavabların verilməsi təkcə prosedur baxımından deyil, həm də referendum zamanı insanların verəcəyi suallara ən azı təxmini cavabların verilməsi baxımından vacibdir. Bu sualları cavablandırmaq üçün Ermənistan əvvəlcə Aİ-yə üzvlük üçün rəsmi müraciət təqdim etməlidir. Bu da geniş iş tələb edir və biz, ehtimal ki, yaxın gələcəkdə bu prosesə başlayacağıq. Bundan əlavə, AİB tərəfdaşlarımızın çağırışlarına qulaq asaraq, iqtisadi komponent də mövcuddur: Ermənistanın Aİ bazarına çıxışı üçün ilk addımlar atılır və xalqımızın da bunun potensial təsirini görüb anlamaq üçün vaxtı olmalıdır.
Məncə, Aİ-yə rəsmi sorğuya müvafiq cavab aldıqdan və proses üçün yol xəritəsi göründükdən sonra üzvlüklə bağlı referendum keçirəcəyik”.
Tahir TAĞIYEV
