Mübariz Göyüşlü: “Bu kimi kampaniyaların aparılması Rusiyadakı azərbaycanlıların gözünü qorxutmağa xidmət edir”
Rusiyada azərbaycanlılara qarşı ayrı-seçkilik-diskriminasiya, şərləmə, qanunsuz həbsetmə kimi hallar davam edir. Yalnız diaspor sədrlərinə, nümayəndələrinə qarşı deyil, sadə vətəndaşlarımız da Rusiyada belə münasibətlə üzləşir. Məsələn, Azərbaycan vətəndaşı Yadulla Rüfullayev Rusiyada yük maşını (TIR) sürücüsü işləyib və Rusiya tərəfindən casusluqda ittiham olunur. Rusiya tərəfinin ittihamı RF Cinayət Məcəlləsinin 276.1-ci maddəsi ilə əlaqələndirilir. Onun anası isə ittihamların saxta olduğunu, oğlunun rus dilini bilməməsindən istifadə edilərək sənədlərə imza atdırıldığını və istintaq zamanı ağır təzyiqə məruz qaldığını bildirir.
Rusiya Federasiyasında hüquq-mühafizə orqanları tərəfindən qanunsuz olaraq saxlanılan Azərbaycan vətəndaşı Rufullayev Yadulla Ramiz oğlunun anası Rufullayeva Aliyə Nəsir qızı oğlunun əsassız həbs edildiyini, Rusiyanın müstəntiqləri tərəfindən amansız işgəncələrə və psixoloji təzyiqlərə məruz qaldığını bildirib.
Bu barədə Rufullayeva Aliyə Nəsir qızı "Trend" İnformasiya Agentliyinə bildirib.
Onun sözlərinə görə, oğlu Y.Rufullayev yük avtomobili (tır) sürücüsü kimi fəaliyyət göstərib və 3 övladını dolandırmaq üçün çalışıb. Rusiya tərəfi ona qarşı Cinayət Məcəlləsinin 276.1-ci (casusluq) maddəsi ilə uydurma və heç bir sübuta söykənməyən ittiham irəli sürüb:
"Oğlumun idarə etdiyi nəqliyyat vasitəsi gömrük nəzarətindən tam təmiz keçib və Azərbaycana qayıtmaq üçün rəsmiləşdirilib. Lakin Rusiya hüquq-mühafizə orqanları onun rus dilini bilməməsindən istifadə edərək saxta sənədlərə məcburi qol çəkdiriblər. 1 il 1 aydır ki, qanunsuz həbsdə saxlanılır. Rusiya müstəntiqləri istintaq zamanı onun başına torba keçirib, ağzını skoçlayıb, işgəncə veriblər. Rusiya tərəfi onu Azərbaycan dövlətinə qarşı böhtan xarakterli ifadələr verməyə məcbur edir. Oğlum isə "20 il yataram, amma dövlətimə xəyanət etmərəm" deyərək Rusiya orqanlarının bu qanunsuz tələblərini rədd edib".
Ailə başçısının Y.Rufullayev olduğunu və ailənin ağır sosial durumda yaşadığını qeyd edən ana, Rusiya tərəfinin təyin etdiyi dövlət vəkillərinin də qərəzli və fəaliyyətsiz olduğunu vurğulayıb. Avqustun 31-də növbəti qanunsuz məhkəmə prosesinin keçiriləcəyi gözlənilir.
Məsələ ilə bağlı Xarici İşlər Nazirliyi, Azərbaycanın Rusiyadakı Səfirliyi, Ombudsman Aparatı və digər aidiyyəti dövlət qurumlarına rəsmi müraciətlər olunub.
Rufullayeva Aliyə Nəsir qızı oğlunun sırf Azərbaycan vətəndaşı olduğuna görə Rusiya tərəfindən bu cür özbaşınalıq və diskriminasiya ilə üzləşdiyini vurğulayaraq, onun hüquqlarının müdafiə olunması və azadlığa buraxılması üçün dövlət dəstəyi xahiş edir.
Qeyd edək ki, daha əvvəl, 2026-cı ilin fevralında Dağıstan prokurorluğu başqa bir azərbaycanlı TIR sürücüsünün Ukraynanın xeyrinə casusluqda ittiham edildiyini açıqlamışdı. İttihama görə, sürücü xarici kəşfiyyat nümayəndəsi ilə əməkdaşlıq edib və müəyyən məlumatları toplamağa çalışıb. İş Dağıstan Ali Məhkəməsinə göndərilib. Göründüyü kimi, bu azərbaycanlı TIR sürücüləri ilə bağlı irəli sürüən ilk ittiham deyil.
TIR sürücüsü nə cəsusluq edə bilər?
Görün, nə gündədilər, əllərinə başa bəhanə keçməyib TIR sürücüsünü casus elan ediblər.
Ekspertlər bildirir ki, Rusiya TIR sürücüsünü azərbaycanlı olduğu üçün casus elan edib, bunun başa adı yoxdur. Ekspertlər hesab edirlər ki, bir azərbaycanlı sürücünü casusluqda ittiham etmək absurrdur və Rusiya tərəf bu iddiasından əl çəkməlidir. Ekspertlər deyirlər ki, bir parça çörək qazanmaq üçün Rusiyaya üz tutan TIR sürücüsünün casusluq etməsi barədə Rusiyanın irəli sürdüyü ittiham absurddur. Yəni Rusiya hüquq-mühafiəz orqanlarının vətəndaşlarımıza qarşı bu kimi addımları qəbuledilən deyil.
"Müasir İnkişaf" İctimai Birliyinin sədri, Crossmedia.az saytının baş redaktoru, siyasi şərhçi Mübariz Göyüşlü baki-xeber.com-a bildirdi ki, son dövrlər Rusiyada azərbaycanlılara-diaspor sədrlərinə, tanınmış azərbaycanlı ictimai xadimlərə, o cümlədən də sadə vətəndaşlarımıza qarşı bu cür kampaniya məqsədyönlü şəkildə aparılır. “Hesab edirəm ki, bu kampaniya Kreml tərəfindən idarə olunur. Bu barədə oradan göstəriş verilib. Bu kimi kampaniyaların aparılması Rusiyadakı azərbaycanlıların gözünü qorxutmağa, onların nüfuzuna zərbə vurmağa, bir araya gəlməsinin qarşısını almağa xidmət edir. Bununla da paralel olaraq bu həm də Azərbaycan dövlətinə qarşı bir təzyiq kampaniyasıdır. Bilirsiz ki, Azərbaycan dövləti Rusiyanın imperiya ambisiyalarına, qəbuledilməz iddialarına qarşı öz milli maraqlarını qorumaq üçün tələb və şərtlərini qoyur, onunla razılaşmır. Təbii ki, bu da Kremlin xoşuna gəlmir və bu təzyiq kampaniyaları ilə Azərbaycan dövlətinu tutduğu yoldan çəkindirməyə, onun rəhbərliyinin iradəsinə üstün gəlməyə çalışırlar. Amma bu məsələ alınacaq məsələ deyil. Azərbaycan Cənubi Qafqazın lider dövlətidir, orta gücdür. Rusiya da bununla hesablaşmalıdır. Düşünürəm ki, Rusiya bu cür mənasız addımlardan çəkinməlidir”.
M.Göyüşlü hesab edir ki, Rusiya vətəndaşımıza qarşı bu cür ittihamlarla əslində öz mahiyyətini ortaya qoyur.
İradə SARIYEVA
