Məhəmməd Əsədullazadə: “Rusiya Ermənistanı buraxmaq istəmir və Metsamor Atom Elketrik Stansiyasını onun suverenliyinin qarantı kimi təqdim etməyə çalışır”
Azərbaycan Prezidenti İlham Əliyev Naxçıvana səfəri çərçivəsində AzTV-yə müsahibəsində Ermənistanın Metsamor Atom Elektrik Stansiyasının region üçün böyük təhlükə mənbəyi olduğunu və Metsamorun gec-tez bağlanacağını bəyan etdi.
Prezident İlham Əliyevin Metsamor bəyanatı tamamilə real elmi və ekoloji təhlükələrə əsaslanır. Ekspertlər də bildirir ki, 1970-ci illərdə inşa edilən və köhnəlmiş texnologiya ilə işləyən Metsamor Atom Elektrik Stansiyası aktiv seysmik zonada yerləşir və bütün Cənubi Qafqaz, o cümlədən Azərbaycan, Ermənistan və Türkiyə üçün ciddi nüvə və ekoloji fəlakət riski daşıyır.
Prezident İlham Əliyevin məlum bəyanatından bir neçə gün sonra açıqlama verən Rusiya Xarici İşlər Nazirliyinin sözçüsü Mariya Zaxarova bildirib ki, “Metsamor Atom Elektrik Stansiyasının təhlükə yaratması barədə iddialar Rusiya ilə Ermənistan arasında nifaq salmaq məqsədi güdür”. O, bu cür bəyanatları ikitərəfli münasibətlərə xələl gətirmək cəhdi kimi qiymətləndirib. Zaxarova qeyd edib ki, Rusiya tərəfi Metsamor AES ilə bağlı iddiaları əsassız sayır. Açıqlamaya görə, bu cür iddialar İrəvan və Moskva arasındakı münasibətləri pozmağa yönəlib. Zaxarova deyib ki, Rusiya stansiyanın region üçün təhdid yaratdığı fikrini qəbul etmir.
Zaxarova deyib ki, dinc nüvə energetikası Ermənistanın enerji təhlükəsizliyi və suverenliyinin mühüm amilidir.
Zaxarovanın sözündən belə çıxır ki, Ermənistanın atom elektrik stansiyasının bağlanılmasını tələb etmək Ermənistanın guya suverenliyinə qəsd etməkdir.
Zaxarovanın bu sözlərini onun İlham Əliyevin bəyanatına reaksiyası kimi dəyərləndirmək olarmı?
Politoloq Məhəmməd Əsədullazadə baki-xeber.com-a bildirdi ki, Metsamor Atom Elektrik Stansiyasının regionda yerli flora və faunaya ciddi mənfi təsir göstərdiyi, ekologiyanı çirkəndirdiyi, ekoloji fəlakət yaratması məlumdur. M.Əsədullazadə qeyd etdi ki, bu atom elektrik stansiyasının istismar müddəti bitib, yenilənmə həyata keçirilmir, Ermənistan yeni reaktorlar alacağını bildirsə də, amma nə vaxt alacağı sual altındadır. “Cənab Prezidentin Naxçıvandan səsləndirdiyi bu bəyanat önəmlidir və o, atom elektrik stansiyasının artıq fəaliyyətinin dayandırılması labüd hesab etdi, Ermənistanın öz enerjisinin dversifikasiyanı həyata keçirməsinin vacib olduğunu vurğuladı. Göründüyü kimi buna Rusiyadan da reaksiya gəldi. Zaxarovanın bu açıqlamasını cənab Prezidentin bəyanatına Rusiyanın mövqeyi, reaksiyası kimi qiymətləndirmək olar. Hələ ki, Rusiya Ermənistanı buraxmaq istəmir və Metsamor Atom Elketrik Stansiyasını onun suverenliyinin qarantı kimi təqdim etməyə çalışır. Halbuki, bu belə deyil. Rusiyanın bu reaksiyasında əks olunanlar reallıqdan uzaqdır, çünki Paşinyan da bilir ki, Metsamor artıq fəaliyyətini dayandırmalıdır. Bu atom elektrik stansiyasının hələ də fəlaiyyətinin dayandırılmaması Ermənistan üçün də ciddi fəlakətlərə səbəb ola bilər”.
M.Əsədullazadə vurğuladı ki, Ermənistan qonşu ölkələrlə normal münasibətlər sistemi qurub elekrtik enerjisi sistemlərini birləşdirə bilər. “Rusiya çalışır ki, Ermənistanı öz orbitində saxlasın və bu səbəbdən də bu cür bəyanatlar verir”-deyə M.Əsədullazadə qeyd etdi.
İradə SARIYEVA
