ABŞ Dövlət Departamenti Suriyanın üzərindən “terrorizmin dövlət sponsoru” adını qaldırıb və Heyət Təhrir əş-Şam kimi tanınan Əl-Nusra Cəbhəsini Xüsusi Təyin Edilmiş Qlobal Terrorçu siyahısından çıxarıb.
Eyni zamanda, ABŞ Maliyyə Nazirliyinin Xarici Aktivlərə Nəzarət İdarəsi Heyət Təhrir əş-Şamı Xüsusi Təyin Edilmiş Vətəndaşlar və Bloklanmış Şəxslər (SDN) siyahısından çıxarıb.
"Xəzinədarlıq Departamenti Prezident Donald Trampın Suriya xalqına çiçəklənmə şansı vermək vədini yerinə yetirir", - deyə ABŞ Maliyyə Naziri Skott Bessent bildirib. "Bugünkü tədbir Suriyaya əlavə investisiya cəlb etməyə, siyasi və iqtisadi sabitliyi təşviq etməyə kömək edəcək."
ABŞ şəxsləri və şirkətləri artıq Heyət Təhrir əş-Şam ilə əməliyyatlar aparmaq və ya fəaliyyət göstərmək üçün xüsusi OFAC-ın icazəsinə ehtiyac duymurlar, əgər bu cür fəaliyyətlər bloklanmış şəxsləri və ya digər qadağan olunmuş əməliyyatları əhatə etmirsə.
Lakin Suriyaya qarşı məhdudiyyətlərin qaldırılması qərarı ABŞ Maliyyə Nazirliyinin beynəlxalq terrorizmlə mübarizə mövqeyində dəyişiklik demək deyil və Vaşinqtonun Suriyada təhlükə yaradan şəxsləri məsuliyyətə cəlb etmək öhdəliyini ləğv etmir.
Vaşinqton bildirib ki, bu qərarlar terrorizmin maliyyələşdirilməsi təhlükəsinə qarşı zəruri tədbirləri təmin etmək və Suriyanın sabitliyini və təhlükəsizliyini daha da qorumaq məqsədi daşıyır.
SAMİRƏ
