Xəbər verildiyi kimi, Moldova hökuməti ölkənin MDB üzvlüyü ilə bağlı əsas müqavilələrin dayandırılması dəstəkləyib. Qərar təşkilatdan çıxma prosedurunun bir hissəsi kimi qəbul olunub.
Söhbət MDB-nin yaradılması haqqında sazişdən və ona əlavə edilmiş protokoldan gedir. Hər iki sənəd 1991-ci ilin dekabrında, Sovet İttifaqının dağılması ərəfəsində imzalanmışdı. Bundan əlavə, 1993-cü il yanvarın 22-də Minskdə qəbul olunmuş MDB Nizamnaməsinin də ləğvi nəzərdə tutulur.
İndi qanun layihəsi Moldova prezidenti Maya Sandunun imzasına göndəriləcək. Prezident sənədi təsdiqlədiyi təqdirdə, layihə parlamentə təqdim olunacaq. Parlament səsverməsi bu ay keçiriləcək. Daha sonra ləğv Moldova prezidenti tərəfindən təsdiqlənəcək, bundan sonra Xarici İşlər Nazirliyi rəsmi geri çəkilmə notası verəcək.
Siyasi şərhçi Aydın Quliyev Musavat.com-a bildirib ki, Moldovanın MDB-dən çıxması gözlənilən və hələ davamı olacaq bir prosedir:
"Çünki MDB yarandığı vaxtdan indiyə qədər sıraları genişlənməyən, əksinə seyrələn regional beynəlxalq təşkilatdır. Bu təşkilat 1991-ci ildə yaranandan bəri zaman-zaman onun sıralarından çıxanlar olub və bu gün də var, sabah da tərk edənlər də olacaq. Gürcüstan 2008-ci ilin avqust müharibəsindən sonra MDB-ni tərk edib və 2009-cu ildə bu qərar rəsmən qüvvəyə minib. Ukrayna isə MDB-nin təsis sənədlərini heç vaxt ratifikasiya etməsə də, 2014-cü ildən sonra Birliyin strukturlarında iştirakını faktiki olaraq dayandırıb və sonrakı illərdə MDB çərçivəsində bir sıra sazişlərdən çıxıb. İndi isə Moldova MDB-dən tamamilə çıxmaq iradəsini ortaya qoyur. Rusiya ilə açıq və gizli qarşıdurmada olan MDB ölkələri bu qurumu tərk edirlər. Hazırda MDB-nin tərkibində Rusiya ilə açıq qarşıdurmada olan dövlət yoxdur. Moldovadan sonra hansı respublikanınbu qurumdan çıxa biləcəyini proqnozlaşdırmaq hələlik çətindir. Ancaq fikrimcə MDB-dən çıxmağa növbəti namizəd Ermənistan ola bilər. Bir müddət fasilədən sonra bunun baş verməsi mümkündür. Əgər iyunda parlament seçkilərində Nikol Paşinyan qalib gəlsə növbəti mərhələdə Ermənistanın MDB-dən çıxması reallaşa bilər. Seçkilərə Rusiyanın yanaşması və seçkilər zamanı, seçkidən sonra Rusiya-Ermənistan münasibətlərinin xarakteri İrəvanın MDB-də qalıb-qalmamaq mövqeyini müəyyənləşdirəcək”.
A.Quliyev həmçinin hesab edir ki, Ukrayna müharibəsində Rusiyanın qalib olub-olmaması MDB-nin taleyinə həlledici təsir göstərəcək.
Etibar Seyidağa, Musavat.com
