Arzuxan Əlizadə: “Məqsəd ölkədə sosial gərginlik yaratmaq və bunu seçkidə Paşinyanın əleyhinə çevirməkdir”
Rusiya Ermənistandan gətirilən mineral suyun satışına qadağa qoyub. Belə ki, Rusiyanın "Çestnıy znak" dövlət markalanma sistemi Ermənistandan idxal edilən "Cermuk" mineral sularının mağazalarda satışını dayandırıb.
Bu barədə Markalama Sisteminin operatoru olan Perspektiv Texnologiyaların İnkişafı Mərkəzinin baş direktorunun müavini Revez Yusupov bildirib.
Məlum olub ki, hazırda dövriyyədə olan 338 min şüşə mineral su yoxlamalar başa çatana qədər bloklanıb. "Rospotrebnadzor"un rəsmi məktubunda isə qeyd olunub ki, Rusiya vətəndaşlarının həyat və sağlamlığına dəyə biləcək mümkün zərərin qarşısını almaq üçün təcili tədbirlərin görülməsi zəruridir. Məhdudiyyətə səbəb kimi məcburi tələblərin pozulması göstərilir.
"Chestny znak" sonradan Ermənistanda istehsal olunan daha 1,1 milyon şüşə “Cermuk” suyun satışını dayandırıb. Bununla da, əvvəllər bloklanmış 338 min şüşə də daxil olmaqla, müvəqqəti satış qadağası altında olan məhsulların ümumi sayı 1,4 milyona çatıb.
Maraqlıdır, niyə məhz indi? Görünən odur ki, seçki ərəfəsində Rusiya Ermənistana qarşı iqtisadi təzyiq rıçaqlarını mərhələli şəkildə işə salır.
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadənin fikrincə, Rusiya kimi dövlətdən yalnız bunu gözləmək olar: “Bəli, bütün bu oyunlar Rusiyanın Ermənistana qarşı iqtisadi təzyiqlərinin göstəricisidir. Məqsəd ölkədə sosial gərginlik yaratmaq və bunu 7 iyun parlament seçkilərində Paşinyanın əleyhinə çevirməkdir. Nəzərə almaq lazımdır ki, Ermənistanın iqtisadi ticarət dövriyyəsinin 40 faizi Rusiya ilədir. Ermənistanda istehsal olunan müxtəlif aqrar məhsulların əsas bazarı Rusiyadır. 2024-cü ildə Ermənistanla Rusiya arasında ticarət dövriyyəsi 12 milyard dollara yaxın olubsa, 2025-ci ildə bu rəqəm 2 dəfəyə qədər azalaraq 6 milyard dollardan bir qədər çox olub. Düzdür, Ermənistanın Rusiya ilə ticarət dövriyyəsində bir il əvvəl müşahidə olunan artım reeksport hesabına olub. Yəni Rusiya sanksiyalardan yayınmaq üçün bir sıra məhsulları Ermənistan üzərindən idxal edirdi. Ancaq nə qədər olmasa da, bu, dolayı da olsa Ermənistan iqtisadiyyatına fayda verirdi. Nəticədə bütün bunlar Paşinyanın aktivinə yazılırdı. Rusiya tərəfi də bütün bunların fərqində olduğu üçün, məhdudiyyətləri artırır. Çünki yaxşı bilirlər ki, Ermənistanda mövcud hakimiyyətin strategiyası ölkəni Avropa İttifaqı ilə yaxınlaşdırmaq, Qərblə əlaqələri genişləndirməkdir. Putin Paşinyanla sonuncu görüşündə publik olaraq Paşinyanı qazla şantaj etdi. Bildirdi ki, Avropada qazın ixrac qiyməti 600 dollar olduğu halda, Rusiya bunu Ermənistana 177,7 dollara ixrac edir. Bütün bunlar təbii ki, təsadüfü deyildi. O baxımdan istisna etmirəm ki, may ayı ərzində Rusiya Ermənistana qarşı digər iqtisadi təzyiqləri işə sala bilər. Erməni cəmiyyətinə təzyiq xarakterli mesaj verirlər ki, Rusiya olmasa Ermənistanı iqtisadi çöküş gözləyir. Məqsəd əhalini qorxutmaq və 7 iyun seçkilərində revanşist müxalifətə səs verməyə məcbur etməkdir. Ancaq düşünmürəm ki, Rusiyanın bu planları hansısa ciddi effekt versin. Ən azından ona görə ki, Avropa İttifaqı mövqelərini Ermənistanda möhkəmləndirmək istəyir. Bu baxımdan Brüsseldən Ermənistana siyasi-iqtisadi dəstək arta bilər”.
Vidadi ORDAHALLI
