Elşən Manafov: “Avropa Parlamenti erməni diasporunun və Fransanın təşviqi ilə Azərbaycanı ittiham edir”
Məlum olduğu kimi, Avropa Parlamenti “Ermənistanın Demokratik Davamlılığına Dəstək” adlı qətnamə layihəsi qəbul edib. Qətnamədə bir sıra məqamlar öz əksini tapıb. Ancaq problem ondadır ki, 24 bənddən ibarət olan qətnamə layihəsinin 7 bəndi – 14, 15, 16, 18, 19, 20 və 21-ci bəndləri Azərbaycana qarşı qondarma ittihamlardan ibarətdir.
Məsələn, 14-cü bənddə qeyd olunur: “Hibrid müharibə, dezinformasiya və xarici müdaxilə, xüsusilə Rusiya və Azərbaycandan artan təhlükə fonunda maraqlı tərəflərin diqqətini bu prosesin vacibliyinə cəlb edir”. 15-ci bənddə iddia olunur: “Ermənistana qarşı əsassız ərazi iddiaları irəli sürməklə və Cənubi Qafqazda sülhü, sabitliyi və dialoqu pozmaqla hibrid təhdid forması təşkil edən “Qərbi Azərbaycan” və Zəngəzur dəhlizi” ritorikasını qətiyyətlə pisləyirik”.
Avropa İttifaqı bir tərəfdən Azərbaycanla enerji, tranzit daşımalarla bağlı əlaqələri genişləndirmək istəyir, o biri tərəfdən Aİ-nin digər təsisatı ölkəmizi hədəf alan qətnamə qəbul edir.
Sözügedən məsələni baki-xeber.com-a şərh edən politoloq Elşən Manafovun fikrincə, Avropa Parlamentinin Azərbaycana münasibəti bir qayda olaraq Avropa İttifaqı Komissiyasının ölkəmizə münasibətindən fərqli və həm də qərəzli, qeyri-obyektiv olub: “Bu, bir sıra amillərlə bağlıdır. Aİ Komissiyası (əslində Avropa hökuməti) Azərbaycanla münasibətlərə daha praqmatik mövqe sərgiləyərək Azərbaycanın Aİ-nin enerji təhlükəsizliyində oynadığı rola xüsusi önəm verir. Rusiya qazına (Ukrayna müharibəsi ilə əlaqədar) tətbiq edilən məhdudiyyətlərdən sonra bu, xüsusilə ciddi əhəmiyyət kəsb etməyə başlayıb. Avropa Parlamenti isə onun fəaliyyətinə təsir imkanları olan Avropa erməni diasporunun, habelə Fransanın təşviqi ilə rəsmi Bakını müxtəlif məsələlərdə ittiham edir. Reallıqları görməzdən gələrək Azərbaycan hakimiyyətini Qarabağ məsələsində sərgilədiyi mövqe, Qarabağ ermənilərinə münasibətdə guya ki, etnik təmizləmə siyasətinin aparılması və s.-ə görə ittiham edir. Qarabağda separatçı qurum və onun təmsilçilərinə münasibətdə rəsmi Bakının qəbul etdiyi məhkəmə qərarları, Aİ-də erməni diasporası ilə iş birliyində olan siyasətçilərin vaxtaşırı Azərbaycanın ünvanına səsləndirdiyi ittihamların leytmotivini təşkil edir. Rəsmi Bakı ilə təhdid dilində danışan Avropa Parlamentinə Azərbaycanın mövqeyi daim adekvat olub. Bundan əvvəl AŞPA-da Azərbaycan nümayəndə heyətinin səsvermə hüququndan məhrum edilməsinə cavab olaraq, Azərbaycan orada fəaliyyətini dayandırdı. Bu baxımdan hesab edirəm ki, rəsmi Bakı adekvat mövqe sərgiləyəcək. Hətta Azərbaycan AŞPA-nı tərk də edə bilər. Bu qərarla rəsmi Bakı onunla təhdid dilində danışan Avropa institutuna öz yerini göstərəcək və bir daha bəyan etmiş olacaq ki, suveren dövlət olaraq o regional və ya beynəlxalq təsisatlarla münasibətlərini bundan sonra da, bərabər üsullarla, beynəlxalq qanunvericiliyə müvafiq səviyyədə qurmağa və inkişaf etdirməyə sadiq qalacaq. Bu münasibətlər isə qarşılıqlı maraq və qarşılıqlı etimad müstəvisi üzərində aparılmalıdır”.
Vidadi ORDAHALLI
