Sahil Kərimli: “Bu qarşıdan gələn seçkilərdə Paşinyanın qələbəsinə dəstək kimi başa düşülə bilər”
Mayın 4-5-də İrəvanda Birinci Ermənistan-Avropa İttifaqı (Aİ) sammiti keçiriləcək. Sammitin keçirilməsi ilə əlaqədar Aİ Şurasının sədri Antonio Koşta və Avropa Komissiyasının sədri Ursula fon der Lyayen Ermənistana səfər edəcəklər. Ermənistanı Baş nazir Nikol Paşinyan təmsil edəcək.
İrəvanda keçiriləcək Aİ-Ermənistan Zirvə Görüşündə tərəflər ikitərəfli əməkdaşlığın dərinləşdirilməsi, regional təhlükəsizlik və əsas beynəlxalq çağırışları müzakirə edəcəklər.
Erməni mediası yazır ki, görüşün Aİ ilə Ermənistan arasında münasibətlərin inkişafında əhəmiyyətli bir mərhələ olacağı gözlənilir. Zirvə Görüşü ikitərəfli əməkdaşlığı dərinləşdirmək və Cənubi Qafqaz regionunda sülhü, əlaqəni və iqtisadi inkişafı gücləndirmək məqsədi daşıyır.
Əsas mövzulardan biri Cənubi Qafqazdakı vəziyyət olacaq. Liderlər Ermənistan və Azərbaycan arasında münasibətlərin normallaşdırılması da daxil olmaqla, sülh və sabitliyə doğru irəliləyişi müzakirə edəcəklər. Aİ əvvəllər sülh müqaviləsinin paraflanmasını və tərəflər arasında siyasi bəyannamənin imzalanmasını münaqişənin uzunmüddətli həlli istiqamətində mühüm addım kimi alqışlayırdı.
İrəvan sammiti Aİ-Ermənistan arasında ilk ikitərəfli sammit olacaq.
Bu sammiti keçirməkdə əsas hədəf Paşinyanın seçki qələbəsinə dəstək deyilmi? Nə nəticə verəcək?
Politoloq Sahil Kərimli baki-xeber.com-a bildirdi ki, Aİ-Ermənistan sammitinin İrəvanda keçirilməsi heç şübhəsiz, qarşıdan gələn seçkilərə Aİ səviyyəsində müəyən dəstəyin verilməsidir. “Bu qarşıdan gələn seçkilərdə Paşinyanın qələbəsinə dəstək kimi başa düşülə bilər. Bu tədbirin Ermənistanda keçirikməsi hələ bir il bundan əvvəl planlaşdırılmışdı. Həmin dövrdə məlum oldu ki, 2026-cı ilin iyun ayında Ermənistana seçki keçiriləcək, hakimiyyət uğrunda mübarizə aparılacaq. Daha çox Avropa meyilli siyasət yürüdən, Aİ-nin maraqlarına uyğun davranışlar ortaya qoyan Nikol Paşinyanın növbəti dəfə hakimiyyətdə qalması üçün seçki öncəsi ona həm siyasi, həm də digər istiqamətlərdə dəstəyin verilməsi əvvəlcədən planlaşdırılmışdı. Təbiidir ki, bu gün Aİ ölkələri, beynəlxalq Qərb dairələri tərəfindən Paşinyana qarşı birmənalı siyasətin yürüdülmədiyinin şahidi oluruq. Çünki son günlərdə Nikol Paşinyanın hakimiyyətdən devrilməsi istəkləri mövcuddur, yeni qüvvələrin hakimiyyətə gətirilməsi istiqamətində müəyyən addımların atıldığının şahidi oluruq. Seçkilər yaxınlaşdıqca Rusiyanın siyasi dairələri Ermənistanda öz maraqlarını qoruyub saxlaya biləcək bir hakimiyyətin olmasını istəyir. Bu baxımdan Paşinyanın siyasi durumu heç də yaxşı deyil. Çünki Paşinyan özü də yaxşı anlayır ki, onun Avropadakı dayaqları da sarsıla, son anda onun Avropanın siyasi dairələri tərəfindən də seçki təxribatları ola bilər”.
S.Kərimlinin sözlərinə görə, ümumilikdə hazırkı vəziyyət onu göstərir ki, erməni cəmiyyətində Paşinyana müəyyən qədər rəğbət var. O, hesab edir ki, əgər vəziyyət bu şəkildə davam edərsə, hər hansı bir sürrprizlər ortaya çıxmasa Paşinyan xalqın etimadını qazanıb seçkilərdə qələbə əldə edəcək.
İradə SARIYEVA
