Avropa İttifaqı Gümrü-Qars dəmir yolunun bərpası və istismara verilməsi üzrə Ermənistan-Türkiyə birgə işçi qrupunun iclasını alqışlayıb. Aİ-nin Cənubi Qafqaz və Gürcüstandakı böhran üzrə xüsusi nümayəndəsi Maqdalena Qrono bidirib: "Gümrü-Qars dəmir yolunun bərpası və istismara verilməsi üzrə Ermənistan-Türkiyə Birgə İşçi Qrupunun iclasını səmimi qəlbdən alqışlayırıq. Avropa İttifaqı regionda əlaqənin inkişafında və Ermənistanla Türkiyə arasında tam normallaşma yolunda atılan bu vacib yeni addımı tam dəstəkləyir".
Qeyd edək ki, Ermənistan Xarici İşlər Nazirliyi aprelin 28-də Qarsda Gümri-Qars dəmir yolunun bərpası və istismarı üzrə Ermənistan-Türkiyə birgə işçi qrupunun iclasının keçirildiyini bildirib. Görüşün Ermənistan-Türkiyə münasibətlərinin normallaşdırılması çərçivəsində əldə edilən razılaşmalara uyğun olaraq keçirildiyi qeyd edilib. Ermənistan Xarici İşlər Nazirliyi əlavə edib ki, regionda nəqliyyat əlaqələrinin genişləndirilməsi kontekstində tərəflər Gümrü- Qars dəmir yolunun tezliklə istifadəyə verilməsinin vacibliyini vurğulayıblar. ABŞ-ın Ermənistandakı səfirliyi də Ermənistan və Türkiyə arasında on illərdir bağlı olan iqtisadi və sosial əlaqələrin yenidən açılması istiqamətində atılan bu konkret addımları alqışlayıb. Səfirlik bunu dinc və çiçəklənən Cənubi Qafqazın qurulmasında tarixi bir addım adlandırıb. Səfirlik bildirib ki, Ermənistan və Türkiyə arasındakı bu əsas əlaqənin bərpası regional kanalların açılması və regional sabitliyin təmin edilməsində mühüm addımdır. Qurum həmçinin qeyd edib ki, bu "dönüş nöqtələri" üçün təməl 8 avqustda Vaşinqton sammitində qoyulub.
Ermənistan və Türkiyə nümayəndələri noyabr ayında da Gümrü-Qars dəmir yolunun bərpası və istismarına yönəlmiş texniki müzakirələrin ikinci mərhələsini keçiriblər. Baş nazir Nikol Paşinyan bir müddət əvvəl Ermənistanla Türkiyə arasında müsbət dialoqun Ermənistan-Türkiyə sərhədlərinin tezliklə açılacağına ümid verdiyini bildirmişdi. Türkiyənin xarici işlər naziri Hakan Fidan da İrəvan və Bakı yekun sülh müqaviləsi imzaladıqda, Ankaranın Ermənistanla münasibətləri normallaşdırmağa hazır olacağını açıqlayıb. Xatırladaq ki, 13 dekabr 2021-ci ildə Türkiyənin o vaxtkı xarici işlər naziri Mövlud Çavuşoğlu Ermənistan və Türkiyə arasında normallaşma prosesinin başladığını elan etdi. O, Ankaranın Ermənistanla münasibətlərin normallaşdırılması üçün atılacaq addımları Azərbaycanla əlaqələndirəcəyini vurğuladı. Tərəflər normallaşma prosesi üçün xüsusi nümayəndələr təyin etdilər. Serdar Kılıç və Ruben Rubinyan artıq bir neçə danışıqlar raundu keçiriblər, lakin hava yük və sərnişin daşımalarının bərpasından başqa heç bir irəliləyiş əldə edə bilməyiblər.
Ramil QULİYEV
