Məhəmməd Əsədullazadə: "Tramp çalışır ki, OPEC və OPEC+u ləğv etsin və ABŞ-a tabe olan yeni platformalar yaratsın"
Birləşmiş Ərəb Əmirlikləri aprelin 28-də elan etdi ki, 1 may 2026-cı il tarixindən etibarən həm OPEC, həm də geniş OPEC+ ittifaqından çıxır.
Prezident Donald Tramp bu qərarı dəstəklədiyini bildirdi. Onun fikrincə, bu addım ABŞ və İsrailin İranla müharibəyə başlamasından bəri yüksəlmiş enerji qiymətlərini aşağı salacaq. Tramp BƏƏ prezidenti Məhəmməd bin Zayedin "çox ağıllı" olduğunu söylədi və əlavə etdi ki, bu, qazın və neftin qiymətini aşağı salmaq üçün yaxşı bir addımdır.
BƏƏ Enerji naziri Suhail əl-Məzruei CNN-ə bildirib ki, çıxmaq üçün vaxt düzgün seçilib, çünki Hörmüz boğazı bağlı olduğundan bu addımın bazar üzərindəki təsiri məhdud olacaq. Ekspertlər bu addımı gözlənilən hesab edirlər, çünki BƏƏ illərdir OPEC-in istehsalı məhdudlaşdıran kvota siyasətindən narazılığını açıq şəkildə bildirirdi.
Harvard Universiteti eksperti Təriq Əlötaybaya görə, BƏƏ OPEC kvotaları ilə "zəncirlənmişdi" və bu kvotalar ölkənin iqtisadi strategiyasına uyğun gəlmirdi. BƏƏ "xərc-fayda təhlili" aparıb və nəticədə OPEC uduzub.
Bununla belə, Hörmüz boğazının bağlı qalması səbəbindən BƏƏ-nin çıxışının bu il bazar əsaslarına əhəmiyyətli təsir göstərəcəyi ehtimal edilmir.
Ola bilər ki, BƏƏ Trampın təlimatı ilə OPEK-dən çıxır? Axı Tramp çoxdan OPEK-i ittiham edir ki, OPEK yüksək neft qiymıtlıri ilə dünyanı soyur. Tramp bununla OPEK-in ümumiyyətlə ləğvini planlaya bilərmi?
Siyasi şərhçi Məhəmməd Əsədullazadə “Bakı-Xəbər” qəzetinə açıqlamasında bildirib ki, ABŞ əvvəldən OPEC-ə qarşı kəskin mövqe tutub. “Çünki OPEC daim ABŞ-ın neft siyasətinə qarşı çıxır, onlar arasında maraq toqquşmaları müşahidə edilir. Ona görə də düşünməyə əsas var ki, BƏƏ bu addımlarını ABŞ prezidenti Donald Trampın tapşırıqları əsasında atır. BƏƏ Ağ Evdən aldığı tapşırıqlar əsasında hərəkət edir. Tramp çalışır ki, OPEC və OPEC+ı ləğv etsin və ABŞ-a tabe olan yeni platformalar yaratsın. Hazırda dünya bazarında neftin qiymətlərini OPEC müəyyənləşdirir, Vaşinqton da bundan narahatdır. Yeni dünya düzəni qurmaq istəyən ABŞ yeni sistemdə OPEC-in varlığını istəmir. Gözlənilir ki, növbəti mərhələdə digər ərəb ölkələri də analoji addımlar atsın”, - deyə politoloq qeyd edib.
Dəniz NƏSİRLİ
