Əli Orucov: “İndiki halda yerüstü əməliyyatlara əl atılması...”
Rusiya prezidenti Vladimir Putin və ABŞ prezidenti Donald Tramp arasında baş tutan telefon danışığında Putin İranda quru əməliyyatlara başlamağın çox təhlükəli və yolverilmız olduğunu deyib.
Tramp quru əməliyyatlarına başlasa, Putin buna qarşı nə edə bilər?
Politoloq Əli Orucov baki-xeber.com-a bildirdi ki, ABŞ İsrail koalisiyasının İrana qarşı müharibədən gözlədikləri nəticələr alınmadı və bu qlobal düzəni silkələyən problemə çevrildi. “Tehran Hörmüz boğazını silah kimi istifadə edərək Vaşiqtonu dilemma qarşısında qoydu. Oman körfəzinin ABŞ tərəfindən blokadaya alınması doğrudur İran iqtisadiyyatına və onun ticari əlaqələrinə ağır zərbə olsa da, bundan digər dövlətlər də zərər çəkir. Neftin dünya bazarında qiymətinin artması avtomatik olar ümumi bahalaşmaya rəvac verir”. Ə.Orucovun fikrincə, Trampın ötən gün Rusiya prezidenti ilə telefon görüşməsi də məhz bu zərurətdən doğurdu. “Hava zərbələri İranın hərbi və siyasi gücünü xeyli dərəcədə zəiflətsə də, ancaq rejimi tam süquta uğrada bilmədi. ABŞ müharibəni qazanmaq və İranı təslimçilik sülhə məcbur etmək üçün onun əlindəki vasitələri almalıdır. Hörmüz boğazına və Xark adasına nəzarəti ələ keçirməlidir. Bunun üçün də yerüstü hərbi əməliyyatların olması lazımdır. Yerüstü əməliyyatlar isə yeni itkilər yeni risklər deməkdir. Onsuz da İrana hücumla bağlı Trampa qarşı ABŞ cəmiyyətində etirazlar artmaqdadır. Müharibənin uzanması çəkilən hərbi xərclərin artması və hələ də ortada ciddi uğurun olmaması Trampın reytinqinə kifayət qədər mənfi təsir göstərir. İndiki halda yerüstü əməliyyatlara əl atılması Ağ Ev rəhbərinin gələcək planlarına pozitiv heç nə verməyəcək. İtkilərin miqyasının genişlənməsi ABŞ cəmiyyətində etirazların genişlənməsinə gətirib çıxaracaq. Trampın problemi Hörmüzdə və Körfəzdə təkcə İranla bağlı deyil. Burda Çin faktoru və müəyyən qədər də Rusiya faktoru var. Odur ki yerüstü əməliyyatlara hətta müharibənin yenidən başlanılmasına ehtiyatla yanaşılır. Düşünürəm ki, bu qeyri-müəyyənlik də çox uzun çəkməyəcək. ABŞ prezidenti iki yoldan birini seçməlidir. Tramp artıq əlverişli sövləşəmlər yönündə fəaliyyətə başlayıb. Putinlə telefon danışıqları da həmin fəaliyyətin tərkib hissəsi kimi yozulmalıdır”-deyə Ə.Orucov qeyd etdi.
İradə SARIYEVA
