Fikrət Yusifov: “Ermənistanın ABŞ-la əməkdaşlıq etməsinin əsas hədəfi Rusiyadan asılılıqdan yaxa qurtarmaqdır”
ABŞ-ın vitse-prezidenti Ceyms Devid Vens və Ermənistan baş naziri Nikol Paşinyan İrəvanda nüvə əməkdaşlığı haqqında saziş imzalayıblar. Saziş tərəflər arasında aparılan danışıqların yekunlarına əsasən imzalanıb.
Ermənistanla Birləşmiş Ştatların imzaladığı dinc nüvə əməkdaşlığı sazişi birinciyə ilkin 5 milyard dollaradək ixracın gerçəkləşməsinə, həmçinin yanacaq tədarükü və texniki xidmət üzrə 4 milyard dollar dəyərində əlavə uzunmüddətli kontraktlar bağlamağa imkan verəcək. Enerji təchizatına görə Moskva ilə Tehrandan asılı olan Ermənistan indi ABŞ, Rusiya, Çin, Fransa və Cənubi Koreya şirkətlərinin təkliflərini nəzərdən keçirir. İrəvan SSRİ dönəmində inşa olunmuş Metsamor Atom Elektrik Stansiyası (AES) əvəzinə yeni nüvə reaktoru tikmək istəyir. Hələlik seçim edilməsə də, fevralın 9-da imzalanan saziş Amerika layihəsinə yol açır.
Bütün bunlar o qənaətə gəlməyə əsas verirmi ki, bir müddət sonra Ermənistan onsuz da ekoloji və təhlükəsiz tələblərə cavab verməyən Metsamor AES-i bağlayacaq? Yəni Rusiya ilə nüvə əməkdaşlığını dayandıracaq. Bu nə dərəcədə realdır?
Sözügedən məsələ ilə bağlı fikirlərini baki-xeber.com-la bölüşən sabiq maliyyə naziri, professor Fikrət Yusifov hesab edir ki, bu, prinsipcə mümkündür: “Ermənistanın ABŞ-la bu sahədə əməkdaşlıq etməsinin əsas hədəfi atom enerjisi istehsalı sahəsində Rusiyadan asılılıqdan yaxa qurtarmaqdır. Onsuz da Rusiya artıq uzun zamandır ki, Ermənistanda tikdiyi və qəza vəziyyətində olan, bölgə üçün böyük bir təhlükəyə çevrilmiş Metsamor AES-in təmiri üçün heç nə etmək istəmir. Heç kim şübhə etməsin ki, Rusiya hökuməti bu yolla da bölgəyə daxil olan ölkələri təhdid altında saxlamağa çalışır. ABŞ isə Cənubi Qafqazda əsas oyunçu olaraq bu vəziyyətin ən tez bir zamanda aradan qaldırılmasına çalışacaqdır. Rusiyadan fərqli olaraq ABŞ bölgəyə fitnə-fəsad yaratmaq üçün deyil, iqtisadi əməkdaşlıq və sülh üçün gəlir. Azərbaycan, Türkiyə və Gürcüstanda bölgədə potensial bir fəlakət mənbəyi olan Metsamor AES-dək qəzalı vəziyyətdən narahatdırlar. Bu səbəbdən hər üç ölkə ABŞ-la Ermənistan arasında nüvə əməkdaşlığının baş tutmasına normal yanaşırlar”.
Vidadi ORDAHALLI
