Əli Orucov: “Meksika ilə bağlı təhdidləri o qədər də real deyil”
ABŞ Prezidenti Donald Tramp bəyan edib ki, Meksikanı kartellər idarə edir, bu ölkə ilə bağlı nəsə etmək lazımdır. Trampın fikrincə, faktiki olaraq Meksikanı onun prezidenti Klaudiya Şeynbaum deyil, kartellər idarə edir: “Biz narkotiklər üzündən uduzmuşuq, onlar cənub sərhədindən keçir. Meksika ilə bağlı nəsə etmək lazım olacaq”.
Meksikaya qarşı bənzər əməliyyat nə dərəcədə realdır? Ən azından nəzərə almaq lazımdır ki, Venesueladan fərqli olaraq Meksikanın zəngin neft ehtiyatları yoxdur.
Sözügedən məsələ ilə bağlı fikirlərini baki-xeber.com-la bölüşən AMİP funksioneri Əli Orucov hesab edir ki, Trampın Meksika ilə bağlı təhdidləri o qədər də real deyil: “Birincisi, Meksika Venesuela deyil. Meksika həm əhalisinə, həm də ərazisinə görə çox böyük ölkədir. Birləşmiş Ştatlar bənzər formada Meksikaya müdaxilə etsə, ciddi müqavimətlə üzləşə bilər. Düzdür, bu, o demək deyil ki, Meksika güclü dövlətdir. Meksikada kifayət qədər ciddi problemlər mövcuddur, amma situasiya fərqlidir. İkincisi, ABŞ ordusunun Maduronu oğurlayaraq həbs etməsi o demək deyil ki, Tramp Venesuela xalqının ağır sosial vəziyyətindən narahatdır. Əlbəttə ki, yox. Məqsəd hansısa formada bu ölkənin neft resursları üzərində hegemonluğu təmin etməkdir. Yəni Venesuela neftinin hasil edilməsi ABŞ şirkətlərinin nəzarətinə keçsin. Nəticədə dünyada neftin qiyməti daha da ucuzlaşsın. Ona görə də hesab edirəm ki, ABŞ-ın Meksikaya müdaxiləsi baş verməyəcək”.
Vidadi ORDAHALLI
