F.Ələkbərli: “Aİ bu məsələyə yenidən baxmalı və Azərbaycana da eyni həcmdə maliyyə yardımı göstərməlidir”
Azərbaycanın xarici işlər naziri Ceyhun Bayramov ilin yekunlarına dair keçirilən mətbuat konfransında deyib ki, Avropa İttifaqından (Aİ) Ermənistana 20 milyon avro ayrılacaq, eyni məbləğin bizə də ayrılması vacibdir: “Avropa Sülh Fondu ilə bağlı müəyyən dövr əvvəl məsələ qalxmışdı. Ermənistana 10 milyon dollar vəsaitin ayrılması barədə qərar var idi”.
Nazir bildirib ki, bəzi ölkələrdən Ermənistana belə yardım edilirsə, Azərbaycana da edilməli olduğunu deyənlər oldu: “Bu prinsipial mövqedən çıxış edən ölkələrdən biri Macarıstan idi. Ondan sonra Avropa Sülh Fondu hesabına yox, başqa mənbələr hesabına Azərbaycana da 10 milyon avro vəsait ayrıldı. Bu minatəmizləmə işlərinə ayrılmışdı. Bizim məlumatımız var ki, Aİ-dən Ermənistana 20 milyon avro ayrılacaq, eyni məbləğin Azərbaycana da ayrılması vacibdir. Bu istiqamətdə iş davam etdiriləcək. Macarıstandan olan partnyorlarımız bu mövzuda bizə dəstək olurlar, bundan sonra da olacaqlar”.
“Azərbaycanın Aİ-dən maddi dəstək almağa daha çox haqqı çatır və buna böyük zərurət var”
AMEA-nın Fəsələfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli baki-xeber.com-a bildirdi ki, Aİ əvvəlki dövrlərdə olduğu kimi, bu gün də Ermənistana hərtərəfli dəstək verir. F.Ələkbərli qeyd etdi ki, 30 il torpaqları işğal altında qalan, əhalisi didərgin düşən, ərazilərində yüzminlərlə mina basdırılan Ermənistan yox, Azərbaycandır, bu baxımdan Aİ ermənipərəstliyindən əl çəkib Azərbaycana da maliyyə yardımları göstərməlidir. “ABŞ-ın, yaxud Avropa İttifaqının bir sıra qurumlarının Azərbaycandan çox Ermənistana yardımlar göstərməsi, maddi dəstək verməsi ilk hadisə deyil. Yəni biz müstəqiliyimizi bərpa etdiyimiz dövrə də baxsaq görərik ki, torpaqlarımızın işğal edilməsinə, 1 milyondan artıq qaçqınımızın olmasına baxmayaraq, Aİ də, digər Avropa qurumları da, beynəlxalq təşkilarlar da bizə yox, Ermənistana yardımlar göstərib. ABŞ da həmçinin.
İndi də o siyasət davam edir, bu anlamda dəyişən heç nə yoxdur. Düzdür, arabir Azərbaycana da yardımlar edilib, amma bu çox cüzi xarakter daşıyıb. Aİ-nin Ermənistana 20 milyon avro ayırması, onlara dəstəyi davam etdirməsi Avropa dövlətlərinin və təsisatlarının ölkələrə ikili standartlarla yanaşdığından xəbər verir. Azərbaycanın xarici işlər naziri Ceyhun Bayramovun da dediyi kimi, Aİ Azərbaycana da bu şəkildə dəstək göstərməlidir. Azərbaycanın Aİ-dən maddi dəstək almağa daha çox haqqı çatır və buna böyük zərurət var. Azərbaycan son 30 ildə çox böyük facilər yaşayıb, Birinci Qarabağ müharibəsi dövründə ərazilərimiz viran qoyulub, şəhərlərimiz, kəndlərimiz dağılıb, maddi-mədəni, dini irsimiz məhv edilib, dağıdılıb, insanlarımız böyük ziyan çəkib, 1 milyona yaxın qaçqın və məcburi köçkünümüz olub. Ermənistanın işğalı nəticəsində Azərbaycana böyük ziyan dəyib. İkinci Qarabağ müharibəsindən keçən beş il müddətində biz öz gücümüzə ərazilərimizi dirçəldirik, kəndlərimizi, şəhərlərimizi yenidən tikirik və sair. Bütün bunları nəzərə almadan Aİ yalnız Ermənistanı yada salır. Azərbaycanın unudulması, Ermənistana maddi yarım göstərilməsi həm doğru deyil, həm də ədalətsizlikdir”.
F.Ələkbərli qeyd etdi ki, həm birinci, həm də ikinci Qarabağ müharibəsi Azərbaycan ərazisində gedib və İkinci Qarabağ müharibəsində də bizə az ziyan dəyməyib, kifayət qədər ziyan çəkmişik, problemlər yaşamışıq. “Hesab edirik ki, Aİ bu məsələyə yenidən baxmalı və Azərbaycana da eyni həcmdə maliyyə yardımı göstərməlidir. Ancaq biz buna elə də böyük ümid bəsləmirik. Çünki Aİ ilə Ermənistan arasında çox isti münasibətlər mövcuddur və bu qurumun özü və institutları haqsız tərəf olan Ermənistana həmişə maliyyə yardımı ayırıb”.
F.Ələkbərli qeyd etdi ki, Tramp ABŞ prezidenti olana qədər Bayden adminstrasiyası da ermənilərə dəstək verməklə məşğul olub, Tramp hakimiyyətə gəldikdən sonra bizə münasibətdə müsbət istiqamətlər var. “Ümid etmək istəyirik ki, Aİ-dən də Azərbaycana müsabət yanaşmalar görə biləcəyək. Bu o qədər də inandırıcı deyil, amma ümid edək ki, belə ola bilər”-deyə F.Ələkbərli qeyd etdi.
İradə SARIYEVA
