Təbriz Musayev: “Paşinyan bütün bu gedişləri və davamlı şəkildə onların üzərinə getməsini Qərblə razılaşdırıb”
Ermənistanda hökumət tərəfindən Kilsəyə zərbələr davam etdirilir. Ermənistan hökuməti Kilsənin təsis etdiyi “Şoqakat” telekanalının fəaliyyətinin dayandırılması barədə qərar qəbul edib. “Şoqakat” telekanalı yanvarın 1-dən ləğv ediləcək.
Bu addım 24 oktyabr 2025-ci il tarixli "Audiovizual Media" haqqında qanuna edilən dəyişikliklə əsaslandırılıb. Qeyd edək ki, “Şoqakat” telekanalı 2011-ci ilin fevral ayından fəaliyyət göstərirdi.
Bundan başqa, hökumətin digər qərarı ilə Erməni Kilsəsi dövlət və bələdiyyə mülkiyyətində olan, mülkiyyət hüququ əsasında istifadə etdiyi torpaq sahələrindən ödənişsiz istifadə hüququndan məhrum edilib.
“Kilsənin sahib olduğu səlahiyyətlərin məhdudlaşdırılması onun əvvəlki təsirlərini ortadan qaldıracaq”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, Paşinyan mərhələli şəkildə Apostol Kilsəsinin dayaqlarını sıradan çıxarır: “Ermənistan konstitusiya quruluşuna malik dünyəvi dövlətdir. Yəni din dövlətdən ayrıdır. Ancaq Ermənistanda Erməni Kilsəsinə Konstitusiyada böyük səlahiyyətlər verilib. Faktiki olaraq Erməni Kilsəsi dövlət içində dövlət statusuna malik idi. Hakimiyyətin siyasətinə Kilsə təsir edirdi. Nəinki təsir edirdi, hətta yön verirdi. Ermənistanda Kilsənin bu qədər gücə malik olması həm də Rusiya amili ilə bağlıdır. Çünki Erməni Kilsəsi Rusiyanın Ermənistanda əsas güc mərkəzlərindən biridir. Hakimiyyətlər dəyişir, amma Kilsə ilə bağlı vəziyyət fərqlidir. İkinci Qaregin bilavasitə Rusiya kəşfiyyatına bağlı olan bir şəxsdir. Təsadüfi deyil ki, Paşinyan hakimiyyəti artıq bunu rəsmi şəkildə bəyan edir. Hesab edirəm ki, Erməni Kilsəsinin sahib olduğu səlahiyyətlərin məhdudlaşdırılması onun əvvəlki təsirlərini ortadan qaldıracaq. Yəni Kilsə əvvəlki kimi təsir imkanına malik olmayacaq. Bu, həm də o deməkdir ki, Rusiya Kilsə vasitəsi ilə Ermənistana təsir edə bilməyəcək. İstisna etmirəm ki, Paşinyan bütün bu gedişləri və davamlı şəkildə Kilsənin üzərinə getməsini Qərblə razılaşdırıb. Maraqlı olan odur ki, Paşinyanın Kilsə üzərinə getməsinə Qərbdən heç bir etiraz edilmir. Avropa İttifaqının qurumları bunu görməzdən gəlirlər. Sanki neçə müddətdir Ermənistanda Kilsə ilə hakimiyyət arasında bir belə həngamədən xəbərləri yoxdur. Halbuki, hər şeydən xəbərləri var. Sadəcə istəmirlər bu işdə Paşinyana mane olsunlar. Hansısa bəyanat Paşinyanın mövqelərinə mənfi təsir edə bilər. Qərb də maraqlıdır ki, Rusiyanın Ermənistanda əsas təsir vasitələrindən biri sıradan çıxsın və yaxud da hakimiyyətə yaxın olan bir şəxs Kilsənin başına gətirilsin”.
Vidadi ORDAHALLI
