Azər Həsrət: “Burada diqqət əslində açıq şəkildə ikili standartlara çəkilir”
“Separatçılar, separatçı liderlər, - hansılar ki, bu gün Bakıda məhkəmə qarşısında cavab verirlər, - oraya vizalar alırdılar. Necə ola bilər? Minsk Qrupunun həmsədr ölkələrinə separatçılar necə gedə bilərdilər?”. Bu sözləri Prezident İlham Əliyev Ağdam şəhərinə köçən sakinlərlə görüşündə deyib.
Daha sonra dövlət başçısı bunları qeyd edib: “Axı digər separatçı ərazilər də var. Onlara Amerikaya, yaxud da ki, Fransaya kimsə viza verə bilər? Gedin, baxın, bu gün nə qədər separatçı inzibati ərazi var?! Ukrayna ərazisində, Moldova ərazisində, Gürcüstan ərazisində separatçı yuvalar var. Onların rəhbərlərinə Amerika, Fransa, Avropa ölkələri viza verə bilər? Yox. Bəs erməni separatçılarına niyə vizalar verilirdi?”.
“Prezident İlham Əliyev elə bir siyasət yürütdü, elə bir strategiya qurdu ki, indi...”
Sözügedən məsələni “Bakı-Xəbər”ə şərh edən siyasi şərhçi Azər Həsrətin fikrincə, Prezident İlham Əliyevin çıxışları hər zaman dünyanı sirkələyəcək bu cür açıqlamalarla zəngin olur: “Yəni həqiqətən də bu suallara uzun illər ərzində Azərbaycan ictimaiyyəti cavab axtarırdı. Təbiidir ki, biz o cavabı bilirdik, amma qarşı tərəf bu cavabı vermək istəmirdi. Azərbaycan da ona görə dünyanı fakt qarşısında qoydu. Prezident İlham Əliyev elə bir siyasət yürütdü, elə bir strategiya qurdu ki, indi Birləşmiş Ştatların özü belə, fakt qarşısındadır və Azərbaycanın mövqeyi ilə hesablaşmaq məcburiyyətindədir. Yəni doğrudan da sual edilir ki, bölücü, terrorçu və s. qəbildən olan adamlar necə rahat bir şəkildə ABŞ-a, Fransaya, başqa Avropa ölkələrinə viza ala bilir? Rahat şəkildə Rusiyaya gedib-gəlirlər, vizasız-filansız. Kim bunlara qucaq açır? Eyni zamanda İrana rahat gedib-gəlirlər. Kimdir bunlara bu imkanı yaradan? Niyə bunlara bu şərait yaradılır? Nəyə görə Azərbaycanda cinayət törədən erməni separatçılarına qucaq açılır, ancaq post-sovet ölkələrində eyni əməli törədən separatçılara hər yer qapalıdır? Yəni burada diqqət əslində açıq şəkildə ikili standartlara çəkilir. Söhbət Azərbaycana münasibətdə tətbiq edilən ikili standartlardan gedir. Üstəlik də dünya fakt qarşısında qoyulur ki, baxın, bizə münasibətdə siz belə ədalətsiz davranmısınız. Ancaq buna baxmayaraq, Azərbaycan xalqı öz iradəsini və əzmini toplayaraq torpaqlarını işğaldan azad edib. O cümlədən sizə göstərib ki, özü haqlıdır, siz haqsızsınız. Hesab edirəm ki, Prezident İlham Əliyevin ara-sıra bu faktları dilə gətirməsi həqiqətən də müasir tariximizə yaxşı mənada əlavə damğa vurur”.
Vidadi ORDAHALLI
