Ceyhun Məmmədov: “Suallarımıza cavab verildikdən sonra bu məsələyə baxılacaq”
Son dövrlər ən çox müzakirə edlən məsələlərdən biri Azərbaycanın Qəzzaya sülhməramlı qüvvələrini göndərib-göndərməyəcəyidir. ABŞ-ın BMT-dəki daimi nümayəndəsi Mayk Uolts deyib ki, Azərbaycan Qəzza zolağına sülhməramlı kontingent göndərməyə razılıq verib.
“Azərbaycan Qəzza sektorunda yaradılması nəzərdə tutulan beynəlxalq sabitləşdirici qüvvələrin tərkibində iştirak etməyə razılıq verən ölkələr sırasındadır”-deyə Uolts qeyd edib.
Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev isə "Nikkei" nəşrinə bildirib ki, hazırkı mərhələdə Azərbaycanın Qəzzada beynəlxalq sabitləşdirmə missiyasında iştirakından danışmaq hələ tezdir.
H.Hacıyev qeyd edib ki, ABŞ Azərbaycana missiyaya qoşulmağı təklif edib, lakin hələ yekun qərar qəbul olunmayıb.
Prezidentin köməkçisi vurğulayıb ki, BMT Təhlükəsizlik Şurasının qətnaməsi Qəzzadakı missiyanın döyüş əməliyyatlarının aparılması qaydaları, fəaliyyət proseduru və səlahiyyətləri barədə aydın məlumat vermir.
Qeyd edək ki, Azərbaycan xarici işlər naziri Ceyhun Bayramov İran İslam Respublikasının xarici işlər naziri Abbas Əraqçi ilə dekabrın 9-da keçirdiyi birgə mətbuat konfransında bildirmişdi ki, Azərbaycan Qəzzada sülhməramlı missiyada iştirak üçün dəvət alıb. “Biz bizi maraqlandıran və narahat edən bir sıra məsələlərlə bağlı sorğular göndərmişik.
Tam təhlil aparırıq. Hər hansı qərarın qəbul edilməsi üçün cavabların dolğun olması zəruridir. Bir çox sualın cavabı yoxdur, açıq qalan məqamlar var. Hazırkı məqamda Qəzzada Azərbaycan qüvvələrinin həmin missiyada iştirakına dair heç bir qərar yoxdur”, - Ceyhun Bayramov bildirib.
Sorğumuza cavab gəldi ki, Azərbaycan Qəzzaya sülhməramlı kontingent göndərməyə razılıq versin?
“Azərbaycanı narahat edən bir sıra məsələlər var, ilk növbədə bu məsələlərin həllini tapması bizim üçün çox önəmlidir”
ABŞ-ın BMT-dəki daimi nümayəndəsinin açıqlamasına münasibət bildirən millət vəkili Ceyhun Məmmədov “Bakı-Xəbər”ə bildirdi ki, bu məsələ ilə bağlı Azərbaycan tərəfi dəfələrlə öz münasibətini bildirib, mövqeyini açıq şəkildə ortaya qoyub: “Yəni burada Azərbaycanı narahat edən bir sıra məsələlər var, ilk növbədə bu məsələlərin həllini tapması bizim üçün çox önəmlidir. Bilirsiz ki, hələ də o ərazilərdə problemlər var. Yəni hələ də o ərazidə sülhə tam nail olunmayıb. Orada prosesdə iştirak etmək kifayət qədər risqli bir məsələdir. Azərbaycanı narahat edən suallar var ki, biz ora hərbiçilərimizi göndərsək müəyyən təminatlar olmalıdır. Bizi narahat edən bir sıra suallara cavablar olmalıdır. Ona görə də cavablar və təminat olmadan, hesab edirəm ki, prosesdə iştirakı Azərbaycan tam haqlı olaraq rədd edir.
Amma qeyd etmək lazımdır ki, bir neçə dəfədir biz bunu müşahidə edirik və ən maraqlısı isə Ermənistan mediasının bu məsələni ardıcıl olaraq gündəmə çıxarması və bunun ətrafında müzakirələr aparmağa cəhd etməsidir”.
C.Məmmədovun fikrincə, Azərbaycanın mövqeyi məlumdur, sullarımıza cavab veriləndən, sorğularımıza cavab tapıldıqdan sonra Azərbaycan bu yöndə addımlar ata bilər. “Azərbaycan həmişə beynəlxalq aləmdə sülhə öz töhfəsini verib və bölgəmizə sülhün gəlməsi üçün hər zaman öz addımlarını atıb. Ona görə də bizim bu məsələdə yanaşmamız elədir ki, bizim suallarımıza cavab verildikdən sonra bu məsələyə baxılacaq. Ermənistan tərəfi də bizim yerimizə narahat olmasın. Biz bilirik nə edirik, nəyi necə edəcəyik. Azərbaycan bu məsələdə qərar qəbul etdikdən sonra, təbii ki, tərəfdaşlarımıza dövlətimizin mövqeyi açıq-aydın bildiriləcək”-deyə C.Məmmədov bildirdi.
İradə SARIYEVA
