Şakir Ağayev: “Ermənistan həyata keçirdiyi talançılıq siyasəti ilə ərazilərimizə, maddi-mədəni, tarixi, dini irsimizə, təbii sərvətlərimizə çox böyük ziyan vurdu”
Azərbaycan Prezidenti İlham Əliyev dekabrın 24-də Ağdamda 2-ci yaşayış kompleksinin açılışı mərasimində etdiyi çıxışda bir sıra məsələlərlə yanaşı torpaqlarımız işğal altında olduğu dövrlərdə Ermənistanın Azərbaycana qarşı həyata keçirdiyi talançılıq siyasətinə də toxunub.
Prezident çıxışında bildirib: “İşğal dövründə Ağdam demək olar ki, urbisidə məruz qalmışdır. Yəni şəhər Ermənistan dövləti tərəfindən tamamilə dağıdılmışdır. Bu, Ermənistan dövlətinin məqsədyönlü siyasəti, bizə qarşı olan düşmənçiliyin bariz nümunəsi idi. Məqsəd də tam aydın idi. Birincisi, talançılıq. Çünki bütün binaların daşları bir-bir sökülərək talan edilmişdir, müxtəlif yerlərdə, Ermənistan ərazisində satılmışdır. Digər tərəfdən, Ermənistan dövləti bu bölgələrdə Azərbaycan xalqının tarixi irsini tamamilə silmək istəyirdi. Üçüncü məqsəd isə bu şəhəri elə vəziyyətə salmaq idi ki, artıq burada yaşayış mümkün olmasın, azərbaycanlılar heç vaxt buraya qayıtmaq haqqında düşünməsinlər. Ancaq səhv etdilər. Biz, xalqımız bütün bu əzablı illər ərzində bir amalla yaşamışıq ki, öz doğma dədə-baba torpaqlarımıza qayıdaq və qayıdandan sonra bu torpaqları, bu şəhərləri, kəndləri bərpa edək. Azərbaycan xalqı heç vaxt işğalla barışmamışdır”.
“Prezident bu məsələni vurğlamaqla bir daha dünyaya göstərdi ki, Ermənistan 30 il müddətində...”
“Novoye vermya” qəzetinin baş redaktoru Şakir Ağayev “Bakı-Xəbər”ə bildirdi ki, Azərbaycan Prezidentinin Ermənistanın Azərbaycana qarşı talançılıq siyasətini vurğulaması erməni vandalizminin bir daha ifşa edilməsi deməkdir.
Ş.Ağayev qeyd etdi ki, işğal dövründə Ağdamın urbisidə məruz qoyulması Ermənistan dövlətinin məqsədyönlü siyasəti, Azərbaycana qarşı olan düşmənçiliyin bariz nümunəsi idi. “Prezident bu məsələni vurğlamaqla bir daha dünyaya göstərdi ki, Ermənistan 30 il müddətində Azərbaycan torpaqlarını işğal altında saxlamaqla burada talançılıqla məşğul olub. Ermənistanın işğal etdiyi ərazilər içində ən çox dağıdılan, daşı-daş üstə qoyulmayan, torpağının altı-üstünə çevrilən yer Ağdam olub. Əbəs yerə Ağdamı XXI əsrin “Qafqazın Xirosiması” adlandırmırlar. Özüm də bir ağdamlı, orada yaşamış bir şəxs kimi deyə bilərəm ki, Ağdam işğala qədər çox inkişaf etmiş gözəl bir şəhər idi. Amma Ermənistanın törətdiyi vandalizm və talançılıq aktları nəticəsində o gözəl Ağdamdan əsər-əlamət qalmamışdı. Ermənilər Ağdamdan qisas alırdılar. Çünki Ağdam onların daim qorxduqları yer olub. Ağdam bir qəhrəmanlıq rəmzi idi.
Ermənilər bu talanları, vandalizmləri, vəhşilikləri törətməklə Azərbaycana qarşı düşmənçiliklərini ortaya qoyurdular. Dağıtmaq, talan etmək, vandalizm törətmək erməni xislətindən irəli gələn məsələdədir. Hətta faşist Almaniyası evləri, qəbiristanlıqları bu qədər viran qoymamışdı, amma ermənilərin 30 illik işğal dövründə etmədiyi vəhşilik qalmadı.
Ermənistanın məqsədi o ərazilərdə xalqımızın tarixi irsini tamamilə məhv etmək, izlərimizi silmək, torpaqları yaşayışın mümkün olmayacağı əraziyə çevirmək idi. Ermənistan həyata keçirdiyi talançılıq siyasəti ilə ərazilərimizə, maddi-mədəni, tarixi, dini irsimizə, təbii sərvətlərimizə çox böyük ziyan vurdu.
Həmin ərazilərdə mədəni irsimizin silinməsi, müqəddəs yerlərimizin, məscidlərimizin təhqir olunması halları baş verdi”.
Ş.Ağayev vurğuladı ki, Ermənistanın işğal altında saxladığı ərazilərdə tikililərin sökülməsi, eyni zamanda xalqımızın varidatının, vətəndaşlarımızın əşyalarının, mal-mülkünün Ermənistana daşınması faktları da hər kəsə məlumdur. Ş.Ağayev qeyd etdi ki, Ermənistan Azərbaycanın təbii sərvətlərini, meşələrini, qızıl və qiymətli metal yataqlarını, mineral mədənləri və sairi taladı, bu talançılıq prosesinə xaricdəki havadarlarını da qoşdu. Ş.Ağayev bildirdi ki, Qərb şirkətlərinin Azərbaycanın işğal altında olan ərazilərində fəaliyyəti, Azərbaycanın milli sərvətlərinin talanmasında iştirak etmələri, bu günə kimi onlara qarşı beynəlxalq hüquq müstəvisində hər hansı tədbir görülməməsi faktı da var. “Prezident İlham Əliyev çıxışında Ermənistanın Ağdamı necə talan etdiyi, yurdumuzu viran qoyduğu, yaşanmaz hala gətirdiyi barədə ətraflı danışdı. Ölkə baçısı bir daha qeyd etdi ki, ermənilər bizim torpaqları işğal etsələr də, özlərinin burada həmişəlik yaşamayacaqlarını bildikləri üçün ərazilərimizi dağdıb viran qoydular. Azərbaycan Prezidenti bütün dünyaya sübut etdi ki, bu torpaqlar bizimdir və biz əbədi-əzəli torpaqlarımızda yaşayacağıq. Bu da baş verdi. Əhalimiz yenidən öz yurdlarına qayıdırlar. Prezident bəyan etdi ki, Ağdam ölkəmizin böyük sənaye şəhəri olacaq, Bakı, Sumqayıt və Gəncədən sonra yəqin ki, dördüncü sənaye mərkəzi olacaq.
Ağdamda tikilən evlər, salınan şəhər, qısa müddətdə həyata keçirilən işlər təqdim edildi. Bu bir daha sübut etdi ki, Azərbaycan Prezidenti “Böyük Qayıdış” planını böyük sürətlə həyata keçirməyi əlaqədar qurumlara tapşırıb. Ağdam şəhərinə köç başlayıb. Bu, dünyaya, ilk növbədə də Ermənistana ən böyük mesajdır ki, biz öz ata-baba yurdumuza qayıdırıq, bura bizim torpağımızdır”-deyə Ş.Ağayev qeyd etdi.
İradə SARIYEVA
