Akif Nağı: “İrəvan üzdə özünü sülhpərvər göstərsə də, müxtəlif müstəvilərdə bizə qarşı...”
Bu gün Ermənistandakı bəzi qüvvələr və xaricdəki ermənipərəst dairələr, siyasətçilər Azərbaycana qarşı fəaliyyətlərini davam etdirirlər.
Bəzi institutlar Azərbaycanın öz torpaqlarını işağaldan azad etməsi, ərazi bütövlüyünü və suverenliyini təmin etməsi, habelə, azad ərazilərdə genişmiqyaslı tikinti, yenidənqurma, bərpa işlərini davam etdirməsi, keçmiş məcburi köçkünləri öz doğma yuvalarına qaytarması faktını həzm edə bilmirlər. Bu səbəbdən də həm post-müharibə dövründə, həm də hazırda anti-Azərbaycan fəlaiyyətlərini davam etdirirlər.
Azərbaycan Prezidenti İlham Əliyev dekabrın 24-də Ağdamda 2-ci yaşayış kompleksinin açılışı mərasimində etdiyi çıxışda bir sıra məqamlara toxundu.
Prezident Əliyev çıxışında bildirdi: “Bugünkü yeni reallıqlar dünyanın aparıcı ölkəsinin Prezidentinin iştirakı ilə avqust ayında təsdiqləndi, möhürləndi. Bizim Qələbəmizin çox böyük və güclü möhürü də vuruldu, onunla da separatçılığın, bizə qarşı ərazi iddialarının, anti-Azərbaycan qüvvələrinin bizə qarşı açıq “soyuq savaşı”nın artıq sonu gəldi, separatçılığın kitabı bağlandı və Azərbaycan xalqı artıq bir neçə aydır ki, sülh içində yaşayır.
Bizim xalqımız böyük fəlakətlə üz-üzə qalmışdı. Bilmirəm, dünyada buna oxşar ədalətsizliklə üzləşən xalqlar var, yoxsa yox, - bəlkə də var, - amma son illərin tarixində ən böyük ədalətsizliklə biz üzləşmişdik. Çünki torpaqlarımız işğal altına düşdü. Belə hallar dünyada var. Biz nə birinci idik, nə də sonuncu. Amma bütün belə hallar olduğu vaxtda beynəlxalq təşkilatlar, böyük dövlətlər və müxtəlif ölkələrin siyasi dairələri bu işğalı qınayır, işğalçını məcbur etmək üçün müxtəlif üsullardan istifadə edir, sanksiyalar tətbiq edir. Bunu biz görürük, indi yaxın tariximiz bunu göstərir. Ermənistan-Azərbaycan müharibəsi zamanı və müharibədən sonra atəşkəs dövründə beynəlxalq təşkilatlar düzgün qərar qəbul etsələr də, bu qərarların icrası üçün bir addım belə atmayıblar. Bax, bu təşkilatların, böyük dövlətlərin riyakarlığı, necə deyərlər, özünü burada bariz şəkildə göstərir. Bizi işğalla barışdırmaq böyük dövlətlərin əsas vəzifəsi idi...”
Prezident İlham Əliyev çıxışında ATƏT-in Minsk Qrupunun anti-Azərbaycan mövqeyindən də danışıb. Prezident bu barədə qeyd edib: “Əminəm, bütün xalqımız, o cümlədən keçmiş köçkünlər bilirdilər və inanırdılar ki, tarixi ədalət bərpa ediləcək. Halbuki Ermənistan-Azərbaycan münaqişəsi ilə məşğul olan, hər halda beynəlxalq təşkilatlar tərəfindən bu vəzifəni icra etməli olan qurumlar başqa fikirdə idi. Onlar Ermənistan dövləti ilə, işğalçı, talançı dövlətlə həmrəy idilər. Xüsusilə ATƏT-in Minsk qrupunun yarıtmaz və anti-Azərbaycan fəaliyyətini qeyd etmək istərdim...”
“Ermənistanın xarici ölkələrdəki havadarları, erməni lobbisi, ermənipərəst institutlar, beynəlxalq təşkilatlar Azərbaycana qarşı məkrli addımlarından qalmırlar”
Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistandakı revanşist və anti-Azərbaycan qüvvələrin, eləcə də xaricdəki bəzi institutların, siyasilərin hazırda Azərbaycanda məhkəməsi gedən müharibə cinayətkarlarını əsir kimi qələmə verməsinə cəhdlər edir, onların ədalət məhkəməsi qarşısında cavab verməməsinə çalışır və bu canilərin azadlığa buraxılması kimi absurd tələblər irəli sürürlər. A.Nağı qeyd etdi ki, bəzi Qərb dairələri ermənilərin Azərbaycan ərazilərini könüllü tərk etməsi faktında başqa cür don geydirməyə çalışır, onların guya buradan “qovulduqlarını” iddia edirlər, hətta onların geri qaytarılmalı olduğunu deyirlər. O qüvvələrin bütün faktları təhrif etdiklərini deyən A.Nağı vurğuladı ki, bu, rəsmi İrəvanın Azərbaycana qarşı apardığı oyunların tərkib hissəsidir. “Ermənilərin və onların havadarlarının öz xislətlərini dəyişməsi mümkünsüzdür, əllərinə imkan düşən kimi yenidən Azərbaycana qarşı düşmənçilik siyasəti yürüdürlər. Hazırda işlərini sakit-sakit görürlər, əlaltdan bizə qarşı fəaliyyət göstərirlər. Çünki Azərbaycandan asılıdırlar, regionda vəziyyətləri elə də yaxşı deyil. Bu gün Azərbaycanın şərtlərini yerinə yetirirlər. Amma bütün bunların arxasında yenə də çirkin əməllərindən qalmırlar. Ermənistan cəmiyyətində anti-Azərbaycan əhval-ruhiyyəsi heç bir az da səngiməyib, yenə də davam edir. Eləcə də Ermənistanın xarici ölkələrdəki havadarları, erməni lobbisi, ermənipərəst institutlar, beynəlxalq təşkilatlar Azərbaycana qarşı məkrli addımlarından qalmırlar.
Paşinyan və onun komandası hakimiyyətdə qalmaq üçün Azərbaycanla və Türkiyə ilə münasibətləri normallaşdırmaq istəyirlər, amma cəmiyyət bütövlükdə bu xəstəlikdən xilas olmayıblar. Bütün sorğular göstərir ki, onlar hələ də Azərbaycana və Türkiyəyə nifrət edirlər. Bu onların hərəkətlərində də özünü göstərir. Bakıda məhkəməsi gedən canilərlə bağlı müəyyən fikirlər səsləndirirlər, ədalət məhkəməsinin üzərinə kölgə salmağa çalışırlar. Rəy yaratmağa çalışırlar ki, guya bunlar suçsuzdular, cinayətlər törətməyiblər və sair. Bununla Azərbaycana beynəlxalq aləm tərəfindən təzyiq göstərilməsinə nail olmaq istəyirlər. Azərbaycanla bağlı beynəlxalq ictimaiyyətdə yanlış fikir yaratmağa çalışırlar. Digər tərəfdən, hələ Qarabağ kartı bunların əlindədir, o mənada ki, oradan könüllü köçüb gedən ermənilərin geri qaytarılması ilə oynayırlar. Ermənilər özləri də, bəzi xarici qüvvələr, müəyyən institutlar da Azərbaycana qarşı təzyiq vasitəsi axtarırlar. Onlar çalışırlar ki, burdan gedən ermənilər geri qaytarılsın, onlara yaşamaq təminatı verilsin. Azərbaycan Prezidenti zaman-zaman bu məsələ ilə bağlı mövqeyini ortaya qoyub. Ağdama son səfəri zamanı da aydın şəkildə bildirdi ki, onların vəhşilikləri unudulmayacaq və bu hadisələr heç bir zaman yaddan çıxmayacaq. Bu, Azərbaycanda ermənilərlə barışmağa hazır olan, dostluğa cəhd edənlərə də cənab Prezidentinin verdiyi bir mesajdır...Ona görə də çox yaxınlıqdan, dostluqdan danışmaq olmaz, çünki onlar hər an bizə xəyanət edə bilərlər. Onlar öz xislətlərini dəyişməyəcəklər.
Sabah Ermənistanda vəziyyət bir az düzələrsə, Avropa Birliyi, ABŞ, Rusiya və başqa ölkələr onlara yaxından dəstək versə, onlar bizə qarşı çox böyük hücuma başlayarlar. Bunu hər kəs bilməlidir ki, erməniyə qətiyyən etibar etmək olmaz. Tutalım, nə vaxtsa ABŞ-da Co Bayden kimi bir adam prezident olarsa o da ermənilərə açıq dəstək verib anti-Azərbaycan mövqeyi tuta bilər, onda ermənilərin əl-qolu açıla bilər. Yəni demək istəyirəm ki, ermənilərlə məsafəli olmalıyıq. Çünki rəsmi İrəvan üzdə özünü sülhpərvər göstərsə də, müxtəlif müstəvilərdə bizə qarşı çirkin siyasətini davam etdirir”-deyə A.Nağı əlavə etdi.
A.Nağı onu da qeyd etdi ki, sülhə yaxınlaşılan bir vaxtda Ermənistanda və xaricdə anti-Azərbaycan qüvvələrin təxribatları sülhün özü üçün də böyük təhlükədir.
İradə SARIYEVA
