Azər Həsrət: “Qroznıda məlum abidənin açılması müsbət haldır”
"Azərbaycan Hava Yolları"nın (AZAL) J2-8243 nömrəli Bakı-Qroznı reysini yerinə yetirən "Embraer 190" təyyarəsinin Qazaxıstanın Aktau şəhərinin 3 km yaxınlığında qəzaya uğramasından bir il ötür.
Qeyd edək ki, təyyarə Qroznı şəhərinə yaxınlaşarkən Rusiyanın "Pantsir-S" HHM sistemi tərəfindən hücuma məruz qalıb. Qəza zamanı təyyarənin göyərtəsində 67 nəfər (62 sərnişin, 5 ekipaj üzvü) olub. Onlardan 42-si Azərbaycan (37 sərnişin, 5 ekipaj üzvü), 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Qəza nəticəsində 38 nəfər ölüb, 29 nəfər yaralanıb.
Baş vermis hadisə ilə bağlı Qroznıda, Ümummilli lider Heydər Əliyevin adını daşıyan meydanda 2024-cü il dekabrın 25-də Bakıdan Qroznıya uçan "Azərbaycan Hava Yolları"na (AZAL) məxsus sərnişin təyyarəsinin qəzaya uğraması nəticəsində həlak olanların xatirəsinə ucaldılmış memorial lövhənin açılış mərasimi keçirilib.
Maraqlıdır, bu hadisə Rusiya-Azərbaycan münasibətlərini normallaşdıra bilərmi? Nəzərə almaq lazımdır ki, Rusiya hələ qəza ilə bağlı Azərbaycanın tələblərini tam icra etməyib.
“Çeçenlər azərbaycanlılara qardaş kimi baxır, bizim acımızı, dərdimizi bizim qədər paylaşır, bu səbəbdən də…”
Siyasi şərhçi Azər Həsrət “Bakı-Xəbər”-ə şərhində bildirdi ki, Qroznıda məlum abidənin açılması müsbət haldır: “Məlumdur ki, təyyarənin vurulması Moskvanın məqsədyönlü planının tərkib hissəsidir. Onlar bir tərəfdən təyyarəni vurub məhv etməklə, izləri itirməklə Azərbaycanla Ukrayna arasında münasibətlərri gərginləşdirməyi nəzərdə tuturdu. Digər tərəfdən çeçen xalqının Azərbaycana olan sevgisini bu və ya digər şəkildə əngəlləməyə çalışırdı. Məlumdur ki, azərbaycanlılarla çeçenlər hər zaman can bir qəlb, çiyin-çiyinə olublar. Xatırladım ki, Birinci Qarabağ müharibəsi zamanında çeçenlər azərbaycanlılarla birlikdə savaşıb. Həmçinin, Çeçenistan müharibəsində də azərbaycanlılar onlara dəstək olub. İndinin özündə də çeçenlərlə azərbaycanlılar çox yaxşı, dost-qardaş münasibətindədir. Görünür, Moskva təyyarəni Qroznıda vurmaqla ikitərəfli siyasət işlətmək istəyib. Həm Ukrayna ilə Azərbaycan arasında münasibətləri korlamaq, həm də Çeçenistanla ölkəmizin arasını vurmaq istəyib. Düzdür, təyyarənin vurulmasından sonra Ramzan Kadırov bəzi şəxsləri mükafatlandırdı, ancaq onu da unutmaq lazım deyil ki, adıçəkilən şəxs Moskvanın adamıdır. Çeçenlər azərbaycanlılara qardaş kimi baxır, bizim acımızı, dərdimizi bizim qədər paylaşır. Bu səbəbdən də Qroznıda məlum abidənin açılması təqdirəlayiq haldır. Hesab edirəm ki, Çeçenistanı Moskvanın nəzarətindən ayırmaq lazımdır”.
Günel CƏLİLOVA
