SOCAR-ın istehsal etdiyi Aİ 95 markalı benzindən ibarət 22 vaqonluq yükün Ermənistana çatması və satışa çıxarılması ilə bağlı bu ölkədə isrerika davam edir. Bir daha xatırladaq ki, Azərbaycan neft məhsullarının Ermənistana göndərilməsi barədə razılaşma noyabrın 28-də Qəbələdə Azərbaycan və Ermənistanın baş nazirlərinin müavinləri Şahin Mustafayev və Mher Qriqoryan görüşündə əldə edilib.
Artıq Ermənistanın “Run Oil” yanacaqdoldurma məntəqələrində Azərbaycan benzininin satışına başlanıb. Yanacaqdoldurma məntəqələrinin daxil olduğu “Mega Trade” şirkətinin direktoru Karen Hayriyan “Azatutyun” radiosuna bildirib ki, Azərbaycan yanacağı artıq İrəvan da daxil olmaqla, Ermənistanın müxtəlif bölgələrindəki bütün “Run Oil” yanacaqdoldurma məntəqələrində 430 dramdan satılır ki, bu da əvvəllər elan edilmiş 440 dramdan daha ucuzdur: “Əvvəlcə ilkin qiymət elan etdik, amma hesablamalardan sonra benzinin qiymətini 430 dram olaraq təyin edə bildik”. O, Azərbaycan benzininin satışı ilə bağlı heç bir narahatlığının olmadığını, əgər narahat olsaydılar, 11 vaqon yanacaq almazdıqlarını bildirib. Hakimiyytə yaxın millət vəkili Xaçatur Sukiasyanın ailəsinə məxsus “Mega Trade” şirkəti Azərbaycandan təxminən 600 ton yanacaq alıb. Lakin bu günə qədər kimliyini gizli saxlayan başqa bir Ermənistan şirkəti təxminən eyni miqdarda Azərbaycan yanacağı alıb. “Run Oil” yanacaqdoldurma məntəqəsindən istifadə edən sürücülərin əksəriyyəti kamera qarşısında, ucuz olsa belə, Azərbaycan mənşəli yanacaq almayacaqlarını iddia edirlər. Amma “Run Oil” yanacaqdoldurma məntəqələri belə bir problemlə qarşılaşmadıqlarını bəyan edir. Ermənistan hakimiyyəti baş verənləri, Ermənistan-Azərbaycan razılaşmasını sülh yolunda vacib hesab etsə də, müxalifət nümayəndələri Azərbaycan benzininin boykot edilməsinə çağırırlar. "Parlaq Ermənistan" partiyasının rəhbəri Edmon Marukyan bildirib: “Biz Azərbaycan benzininin alışını boykot edəcəyik, çünki sonda müharibədə məğlub olmaq bir şeydir, amma bundan sonra da özümüzə hörmət etmədiyimizi göstərməyə davam etmək tamamilə başqa bir şeydir”. Azərbaycan benzini ətrafında qızğın ehtiraslar fonunda müxalifətə yaxın bir saxta “Facebook” istifadəçisi Vanadzordakı “Run Oil” yanacaqdoldurma məntəqəsində Azərbaycan yanacağı mövzusunda mübahisə olduğu və yanacaqdoldurma qurğularının itkin düşmüş hərbçinin qardaşı ilə yanacaqdoldurma məntəqəsi işçiləri arasında mübahisə nəticəsində zədələndiyi barədə məlumat yayıb. “Mega Trade" bu məlumatı təkzib edib. Polis həmçinin "Azatutyan"a belə bir halın olmadığını və həyəcan siqnalı verilmədiyini bildirib.
Müxalifətdə olan "Bizim Yol" hərəkatının koordinatoru Narek Karapetyan da hökumətin Azərbaycandan benzin idxalının iqtisadi cəhətdən faydalı olması ilə bağlı iddialarına münasibət bildirib: “Mediada yayılan məlumatlara görə, 1,5 milyon dollar dəyərində Azərbaycan benzini idxal edilib. Azərbaycan Vergi Xidmətinin məlumatına görə, ölkədə ÜDM-in vergi gəlirlərinə nisbəti 20-25 faizdir. Bu arada, Azərbaycanın dövlət xərclərinin 30-40 faizi, bəlkə də bir qədər az hissəsi hərbi xərclərə xərclənir. Buna görə də, mənim hesablamalarıma görə, 1,5 milyon dollar dəyərində benzin idxal etməklə, Azərbaycan ordusunu təxminən 80.000-100.000 dollar maliyyələşdirdik. Bəs Azərbaycandan təhlükə görmürükmü? Əgər biz artıq onları effektiv şəkildə maliyyələşdiririksə, bu böyüklükdə təhlükə görmürükmü? Benzin aldığımız zaman SOCAR vergi ödəyir. Vergilər neft fonduna gedir, neft fondu vəsaitləri büdcəyə, büdcə isə onları orduya köçürür. Ordu silah alır və onları erməni əsgərlərinə qarşı - bizim, sizin və mənim soyadımız olan insanlara qarşı istifadə edir. Məgər burada onların ordusunu maliyyələşdirməyimiz təhlükəsi yoxdurmu?”. Ermənistanın sabiq baş naziri Hrant Baqratyan da bu mövqeni bölüşür: “Hər nə olursa olsun, əsas məzəli məqam başqadır: erməni oliqarxlar niyə Azərbaycan büdcəsini doldurmağa qərar veriblər? Necə deyərlər, “səsi eşidib, haradan gəldiyini bilmirlər”. Axı ödənilən pullar həmin ölkənin büdcəsinə gedəcək və sonra silaha çevrilərək bizim ordumuza qarşı istifadə olunacaq. Siz nə edirsiniz? “Biznesdir, edirik” deyə özünüzü məsum göstərməyə ehtiyac yoxdur. “Nə olub ki, Ermənistan onlarla ölkə ilə ticarət edir”. “Niyə başqa yerdən alaq, qonşudan almaq olar”. Əminəm ki, bu addım hökumət tərəfindən təşviq edilib. Əlbəttə, haqlısınız, Gürcüstan və İranla da ticarət edirik. Ticarət balansı da mənfidir. Amma birincisi, nə biri, nə də digəri bizim mövcudluğumuza təhlükə yaradır. İkincisi, Ermənistanın məhsul və xidmətlərinin həmin ölkələrə ixracına qadağa yoxdur. Bir cəhd edin, baxın: Azərbaycana və ya Türkiyəyə on şüşə konyak ixrac edə biləcəksinizmi?. Ümumiyyətlə, Azərbaycan və Türkiyə ilə bağlı bizim idxal iqtisadi baxımdan nəzarət altında olmalıdır. Necə? Bu ölkələrdən nə qədər idxal ediriksə, o qədər də ixrac etməliyik. Əks halda, biz onların silahlı qüvvələrini maliyyələşdiririk. Baş nazir, onun iqtisadi məsələlər üzrə müavini və iqtisadiyyat naziri bu elementar məsələləri anlamalı idilər”. Amma “Qraparak” nəşri isə yazır ki, benzinin Ermənistanda satışa çıxarılması Paşinyan hakimiyyətinin ictimai şüuru dəyişmək məqsədindən qaynaqlanır: “Ermənistanda bir çox insan daha münasib qiymətə olan Azərbaycan benzini alacaq. Hökumət də deyəcək ki, baxın, cəmiyyətdə heç bir problem, yaxud düşmənçilik yoxdur, Azərbaycanla sülhü ictimaiyyət istəyir”.
Ramil QULİYEV
