Sahil Kərimli: “Türkiyədən Ermənistana təyyarə reysinin açılması və İstanbuldan İrəvana uçuşların həyata keçirilməsi ilə bağlı artıq qərar verilib”
Türkiyə höküməti İstanbul-İrəvan-İstanbul birbaşa uçuşlarının başlama tarixini açıqlayıb. Erməni mediasının yaydığı məlumata görə, bu barədə Türkiyənin Ermənistanla münasibətlərin normallaşdırılması üzrə xüsusi nümayəndəsi, səfir Serdar Kılıç sosial media hesabında yazıb:
“Milli aviaşirkətimiz Türk Hava Yolları (THY) İstanbul-İrəvan-İstanbul marşrutu üzrə gündəlik uçuşlar həyata keçirməyə başlayacaq".
O, birbaşa uçuşların 11 mart 2026-cı ildə başlayacağını açıqlayıb.
Qeyd olunur ki, sentyabr ayında Türk Hava Yolları (THY) İrəvana müntəzəm uçuşlara başlamaq qərarını açıqlayıb. Bildirilib ki, uçuşlar "tutumdan və bazar şərtlərindən asılı olaraq" həyata keçiriləcək.
“Ermənistanla münasibətlərin normallaşması istiqamətində atılan ilkin addımalardandır”
Məsələyə şərh verən politoloq Sahil Kərimli “Bakı-Xəbər”ə bildirdi ki, son illər Azərbaycan və Türkiyə bölgədə normallaşma prosesinin həyata keçirilməsi, Azərbaycanla Ermənistan arasında sülh müqaviləsinin imzalanması istiqamətində çox ciddi səylər ortaya qoyub. “Türkiyə də bu istiqamətdə öz ciddi və qətiyyətli mövqeyini sərgiləyir. Yəni Azərbaycanla Ermənistan arasında konkret sülh müqaviləsi imzalanmasa Türkiyə Ermənistanla bütün əlaqələri bərpa etməyəcək. Ancaq son dövrlərdə həm Azərbaycan, həm də Türkiyə Ermənistanla münasibətlərin normallaşması istiqamətində humanist prinsiplərə əsaslanan müəyyən addımlar atır, Azərbaycan ərazisindən Qazaxıstan və Rusiya taxılının Ermənistana maneəsi təmin olunur, bir neçə gün bundan əvvəl də Azərbaycanın neft məhsulları Ermənistana göndərildi. Paralel olaraq qardaş Türkiyə də bu istiqamətdə öz töhfələrini verir. Türkiyədən Ermənistana təyyarə reysinin açılması və İstanbuldan İrəvana uçuşların həyata keçirilməsi ilə bağlı artıq qərar verilib. Bu da, əlbəttə, Ermənistanla münasibətlərin normallaşması istiqamətində atılan ilkin addımalardandır. Hesab edirəm ki, həm Türkiyə, həm də Azərbaycan öz xoş niyyətini, humanizm prinsiplərindən irəli gələn niyyətini ortaya qoymuş olur”.
S.Kərimlinin fikrincə, bütün bunlar bölgədə sabitliyin və təhlükəsizliyin dayanıqlı və uzunömürlü olmasına hesablanmış addımlardır, Ermənistanın konstruktiv mövqeyə gətirilməsi və nəhayət sülh müqaviləsinin imzalanmasına təşviq etməkdən ibarətdir. “Təbiidir ki, Türkiyə və Azərbaycan bölgədə sülh və təhlükəsizliyin olmasına çalışır, bundan istifadə edərək iqtisadi şaxələnmə də həyata keçirilməlidir. Burada biz Zəngəzur dəhlizinin açıqlaması məsələsini də xüsusi vurğulamalıyıq. Çünki həm Türkiyənin, həm Azərbaycanın ortaq maraqları çərçivəsində bu dəhlizin açılması reallaşdırılacaq. Bu proseslərdən həm Türkiyə, həm Azərbaycan, eyni zamanda da Ermənistan özünə müəyyən gəlirlər və dividendlər əldə edəcək”-deyə S.Kərimli qeyd etdi.
İradə SARIYEVA
