Fikrət Yusifov: “Fransa anlayır ki, Azərbaycanla güc dilində danışmaq olmaz”
Fransa Azərbaycandan neft idxalını artırıb. Bununla bağlı Azərbaycan Dövlət Gömrük Komitəsinin yaydığı məlumata görə, 2025-ci ilin yanvar-noyabr aylarında Fransa Azərbaycandan 281,1 min ton neft və neft məhsulu idxal edib.
Bu həcmdə idxalın dəyəri 143,1 milyon dollar təşkil edib. Bu göstərici ötən ilin eyni dövrü ilə müqayisədə dəyər baxımından təxminən 2,5 dəfə, həcmi baxımından isə 3,1 dəfə çoxdur.
Görünən odur ki, Azərbaycan onlara neft ixracını artırır, amma onlar adam olmur. Fransa hələ də Avropa İttifaqı timsalında Azərbaycana münasibətdə qərəzli siyasət yeridir. Bu nə vaxta kimi belə davam edəcək?
“Ona görə də bu siyasətə yenidən baxıb iqtisadi əlaqələri genişləndirirlər”
Sözügedən məsələni “Bakı-Xəbər”ə şərh edən sabiq maliyyə naziri, professor Fikrət Yusifovun fikrincə, Fransanın Azərbaycana qarşı davranışları bizim müstəqilliyimizin ilk günlərindən, Ermənistanın Qarabağı işğal etdiyi vaxt çox yaramaz bir səviyyədə olub: “Fransa 30 ərzində Ermənistan işğalını dəstəkləyən bir siyasət yürütdü. Həmçinin 44 günlük Vətən müharibəsində bəlkə də bizə qarşı çıxan yeganə Qərb dövləti oldu. Dəfələrlə çalışdı ki, Azərbaycana qarşı BMT Təhlükəsizlik Şurası qətnamə qəbul etsin. Azərbaycana qarşı sanksiya qəbul edilsin deyə bütün siyasi oyunlara getdi. Azərbaycana qarşı beynəlxalq məhkəmələrdə müəyyən təşəbbüslərlə çıxış etdi. Guya Qarabağdan erməniləri zorla çıxarmışıq. Makron qədər Azərbaycana pislik edən Fransa prezidenti olmayıb. Biz bunu heç vaxt unutmamalıyıq. Təbii ki, reallıqlar öz sözünü sonda dedi və bütün sular duruldu. Avqustun 8-də Vaşinüqtonda Azərbaycanla Ermənistan arasında sülh müqaviləsinin paraflanmasından sonra Fransa hökuməti sanki qəflət yuxusundan ayıldı. Nəhayət anladılar ki, Azərbaycan ərazicə kiçik olsa da, sıradan bir dövlət deyil. Nəhayət anladılar ki, Azərbaycan Cənubi Qafqazın açar dövlətidir. Regiona gəlmək, burada möhkəmlənmək, Mərkəzi Asiya ilə etibarlı tranzit əlaqəsi yalnız Azərbaycan vasitəsilə mümkündür. Azərbaycan bu müddət ərzində çox müdrükcəsinə davrandı. Azərbaycan rəhbərliyi Makron kimi cılız davranmadı. Azərbaycan Fransa ilə iqtisadi əlaqələrini kəsmədi, fransız şirkətlərinə hər hansı maneə yaratmadı. Sivil dövlətə yaraşan addımlar atdı. Hiss olunur ki, Fransa hökuməti Azərbaycana münasibətdə bir dönüş etmək istəyir. Düzdür, bu o qədər də nəzərə çarpmır. Hələ də Avropa Parlamenti timsalında Azərbaycana münasibətdə qərəzli siyasət davam edir. Ancaq hesab edirəm ki, bu, davamlı olmayacaq. Fransa anlayır ki, Azərbaycanla güc dilində danışmaq olmaz. Ona görə də bu siyasətə yenidən baxıb iqtisadi əlaqələri genişləndirirlər. Hesab edirəm ki, ticarət əlaqələrini şərtləndirən əsas amil budur”.
Vidadi ORDAHALLI
