Arzuxan Əlizadə: “Erməni lobbisi düzəlişin birdəfəlik ləğvinə mane ola bilməyəcək”
ABŞ Konqresində Azərbaycan əleyhinə yeni təşəbbüs: Trampın müttəfiqinə cavab kimi erməni lobbisindən hücum. ABŞ prezidenti Donald Trampın yaxın tərəfdarı, Floridadan olan konqresmen Anna Paulina Lunanın Azərbaycana qarşı tətbiq edilən 907-ci düzəlişin ləğvini nəzərdə tutan qanun layihəsini təqdim etməsindən sonra Vaşinqtondakı erməni lobbisi əks-hücuma keçib.
Erməni diasporu ilə əlaqəli olan Nümayəndələr Palatasının üzvləri Vaşinqtonla Ermənistan arasında təhlükəsizlik sahəsində tərəfdaşlığı əhatə edən yeni qanun layihəsini Konqresə təqdim ediblər. Sənəd Floridadan olan respublikaçı Qas Bilarakis və Nyu-Cersidən demokrat Frenk Pallonenin adından təqdim olunub. Layihə ABŞ prezidentinə Azərbaycana qarşı 907-ci düzəliş əsasında tətbiq edilən məhdudiyyətləri ləğv etməyi qadağan etməyi təklif edir. Sənəddə qeyd olunur ki, ABŞ tərəfindən Azərbaycana göstəriləcək hər hansı gələcək yardım bir sıra şərtlərin yerinə yetirilməsindən asılı olmalıdır. Bu şərtlərə Qarabağı tərk etmiş ermənilərin “qaytarılması”, “əsirlərin azad edilməsi” və “Ermənistana qarşı hərbi əməliyyatların dayandırılması” daxildir.
Göründüyü kimi, erməni lobbisi bədnam 907-ci düzəlişin tamamilə ləğv edilməsini önləmək üçün hərəkətə keçib.
“Geosiyasi proseslər Birləşmiş Ştatlar maraqlarından çıxış edərək bunu bir zərurətə çevirib”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədri, millət vəkili Arzuxan Əlizadə hesab edir ki, ABŞ-dakı erməni lobbisinin belə mövqe sərgiləyəcəyi gözlənilən idi: “Ən azından ona görə ki, erməni lobbisi Tramp administrasiyasının Azərbaycanla qurduğu normal siyasi əlaqələrdən narahat idi. Onlar hələ yanvardan əmin idilər ki, Tramp 907-ci düzəlişi donduracaq. Onları ən çox narahat edən məqam isə 8 avqustda Vaşinqtonda Trampın şahidliyi ilə Azərbaycanla Ermənistan dövlət başçılarının sülh sazişinin bəndlərini paraflamaları idi. Üstəlik, Azərbaycanla ABŞ arasında Strateji Tərəfdaşlıq Xartiyasının imzalanması ilə bağlı başlayan birgə fəaliyyət də bura daxildir. Erməni lobbisini narahat edən odur ki, 907-ci düzəlişi saxlamaq üçün heç bir əsas qalmayıb. 1992-ci ildə bu bədnam düzəliş ona görə qəbul edildi ki, guya Azərbaycan Ermənistanı blokadaya salıb. Halbuki, o zaman Ermənistan həm Azərbaycan ərazilərini işğal edirdi, həm də Naxçıvanı blokadada saxlayırdı. Erməni lobbisi öz imkanlarından istifadə edərək, ABŞ-ın Azərbaycana dövlət yardımını Konqresdə blokladı. İndi isə görürlər ki, 907-ci düzəlişi qüvvədə saxlamaq üçün əldə heç bir əsas qalmayıb. Azərbaycanla Ermənistan arasında sülh gündəliyi gündəmdədir. Azərbaycan üzərindən qatarlar Ermənistana taxıl daşıyır. Azərbaycan Ermənistana yanacaq ixrac edir. Bilavasitə Birləşmiş Ştatların iştirakı ilə iki ölkə arasında sülh sazişinin bəndləri paraflanıb. ABŞ Zəngəzur dəhlizi timsalında Orta Dəhliz layihəsinin iştirakçısına çevrilib. Bütün bunlardan sonra ABŞ 907-ci düzəlişi niyə birdəfəlik ləğv etməsin ki? O baxımdan hesab edirəm ki, erməni lobbisi nə qədər mane olmağa çalışsa da düzəlişin birdəfəlik ləğvinə mane ola bilməyəcək. Konqresdə çoxluq Respublikaçılar Partiyasının tərəfindədir. Üstəlik, geosiyasi proseslər ABŞ maraqlarından çıxış edərək bədnam 907-ci düzəlişin ləğvini zərurətə çevirib. Söhbət Birləşmiş Ştatların Mərkəzi Asiyada artan maraqlarından gedir. Azərbaycan bu yöndə körpünün qurulmasında önəmli halqadır”.
Vidadi ORDAHALLI
