Məhəmməd Əsədullazadə: “Bu o deməkdir ki, NATO Ermənistanla hərbi əməkdaşlığı institusional müstəviyə keçirir”
NATO Ermənistanla münasibətlərdə yeni mərhələyə keçməyə hazırlaşır. Alyansın baş katibinin müavini Radmila Şekerinska Ermənistanın müdafiə naziri Suren Papikyanla görüşdən sonra X sosial şəbəkəsində verdiyi açıqlamada bu niyyəti açıq şəkildə ifadə edib.
Şekerinskanın sözlərinə görə, NATO Ermənistanda həyata keçirilən islahatları dəstəkləməyə hazırdır və tərəflər gələn il əməkdaşlığa dair yeni çərçivə sənədinin razılaşdırılmasına ümid edirlər. O bildirib ki, bu sənəd NATO-Ermənistan tərəfdaşlığının əsas istiqamətlərini və gələcək prioritetlərini müəyyən edəcək.
Göründüyü kimi, NATO Ermənistanla gələn il yeni çərçivə sənədi imzalamaq istəyir. Maraqlıdır, bu nə sənəddir?
“İmzalanacaq sənəddə hərbi-texniki əməkdaşlıq, birgə hərbi təlimlər, ölkənin NATO-ya inteqrasiyası öz əksini tapa bilər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə konteksdən yanaşdı: “Ermənistanda səfərdə olan NATO-nun baş katibinin müavini bir sıra görüşlər keçirib, o cümlədən ölkənin müdafiə naziri ilə də görüşüb. Görünən odur ki, NATO Cənubi Qafqazda məhz Ermənistanla münasibətləri sıx inkişaf etdirir. Bunun səbəbi onunla bağlıdır ki, Paşinyan hakimiyyəti Qərbə inteqrasiya kursunu götürüb. Halbuki, Rusiyanın Ermənistanda hərbi bazası var, bu ölkənin Türkiyə və İranla olan sərhədlərini rus sərhədçiləri mühafizə edir. Bu o deməkdir ki, Ermənistan uğrunda artıq Rusiya-NATO rəqabəti var. NATO Ermənistanla hərbi əməkdaşlığı institusional müstəviyə keçirir. Hesab edirəm ki, tərəflər arasında nəzərdə tutulan çərçivə sənədində bundan söhbət gedir. Halbuki, bunun Ermənistan üçün hansı nəticələrə gətirib çıxaracağı sual doğurur. Ona görə ki, Ermənistan KTMT adlı hərbi blokun üzvüdür. Nəzərə almaq lazımdır ki, Rusiya NATO-nun genişlənməsini bəhanə edərək Ukraynaya qarşı müharibə elan edib. Ancaq KTMT üzvü olan Ermənistanla NATO arasında müəyyən bir sənəd, hərbi əməkdaşlıq, birgə hərbi təlimlərin keçirilməsi də nəzərdə tutulub. Bir sözlə, Nikol Paşinyan NATO ilə əməkdaşlığı inkişaf etdirməyə çalışır. Ancaq hesab edirəm ki, NATO bu əməkdaşlıq çəçivəsində Rusiyaya qarşıdır. Çünki artıq Ermənistanla Azərbaycan arasında sülh mövcuddur. Bu, rəsmi sülh sazişi ilə olmasa da, artıq praktiki müstəvidə özünü göstərir. Müəyyən çərçivədə iqtisadi əlaqələr inkişaf edir, Azərbaycan Ermənistanı blokadadan çıxarır və s. Yəni mən düşünmürəm ki, Ermənistan-NATO əməkdaşlığı Azərbaycana qarşı ola bilər. Sadəcə olaraq, NATO Cənubi Qafqaza girir. Gürcüstanla münasibətlər alınmadı. Azərbaycan müstəqil siyasət həyata keçirir. Ancaq Ermənistan NATO ilə daha da sıx əməkdaşlıqda maraqlıdır. İmzalanacaq sənəddə hərbi-texniki əməkdaşlıq, birgə hərbi təlimlər, o cümlədən, Ermənistanın NATO-ya inteqrasiyası öz əksini tapa bilər”.
Vidadi ORDAHALLI
