Əli Orucov: “Tam əksinə, Rusiyada əhalinin güzəranı daha da ağırlaşıb”
Rusiya prezidenti Vladimir Putin ilin yekunları ilə bağlı ənənəvi mətbuat konfransı keçirib. Canlı yayım zamanı o, ABŞ prezidenti Donald Trampın Rusiya-Ukrayna müharibəsinə son qoymaq məqsədi daşıyan sülh planı ilə bağlı sualı cavablandırıb.
"NBC News" kanalının müxbiri Keir Brennan-Simmons Putinə müraciətlə bildirib ki, “Əgər Trampın sülh planını rədd etsəniz, 2026-cı ildə rusların və ukraynalıların ölümünə görə özünüzü məsul sayacaqsınızmı?”
Putin suala cavabında vurğulayıb ki, Rusiya müharibəni başladan tərəf olmadığını düşünür və buna görə də insan tələfatına görə məsuliyyət daşımır. Onun sözlərinə görə, müharibə Ukraynada konstitusiyaya zidd silahlı çevrilişdən sonra başlayıb: “Biz insanların ölümünə görə məsuliyyət daşımırıq, çünki bu müharibəni biz başlatmamışıq. Bizi aldadandan və Minsk razılaşmaları yerinə yetirilməyəndən sonra Qərb dövlətlərinin dəstəyi ilə “Kiyev rejimi”nin başladığı müharibəni başa çatdırmaq üçün hərbi gücdən istifadə etməyə məcbur olduq”.
Bununla belə, Putin müharibə başlayandan Rusiyanın hərbi, iqtisadi, siyasi, texnoloji inkişafından dəm vurub. Guya bu müddət ərzində Rusiya inkişaf edib. Ancaq bu inkişafa uyğun olaraq əhalinin vəziyyətinin nə dərəcədə yaxşılaşdığı ilə bağlı heç nə deməyib. İkincisi, Putin deyir ki, müharibədə insanların ölümünə görə Rusiya məsuliyyət daşımır. Çünki müharibəni onlar başlamayıb. Burada bir sıra suallar ortaya çıxır. Rusiya doğrudanmı müharibə başlayandan iqtisadi və hərbi-texnoloji baxımdan inkişaf edib? Əgər inkişaf varsa, o zaman Putin əhalinin sosial-iqtisadi durumu ilə bağlı niyə izahat vermədi? Ən nəhayət, Putin insanların ölümünə görə məsuliyyət daşımırsa, o zaman Rusiya müharibəni başlayan tərəf deyilmi?
“Hər iki tərəfdə bütün həlak olanlara görə şəxsən Putin məsuliyyət daşıyır”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, Putinin səsləndirdiyi bütün arqumentlər əsassızdır: “Ondan başlayaq ki, müharibə başlayandan sonra hərbi sənayedə bəzi yeniliklər var. Adətən istənilən müharibədə silah istehsal edən ölkələrdə bu baş verir. Ukraynanın da hərbi sənayesi inkişaf edir, ən müasir PUA-lar, artilleriya qurğuları istehsal edirlər. Ancaq dövlət sifarişləri hesabına inkişaf edən Rusiyanın hərbi sənayesi ölkədə iqtisadi inkişafa gətirib çıxarmayıb. Bu, Rusiya əhalisinin sosial-iqtisadi vəziyyətinin yaxşılaşmasında özünü göstərmir. Tam əksinə, Rusiyada əhalinin güzəranı daha da ağırlaşıb. İnflyasiya artıb, məhsulların qiyməti bahalaşıb. Xüsusən zəruri istehlak məhsullarının qiyməti. Sanksiyalar səbəbindən bir sıra məhsullar ya tapılmır, ya da az tapılır. Ehtiyat hissələri çatışmır. İdxal zənciri pozulub. Rusiya əvvəlki kimi sanksiyalardan yayına bilmir. Rusiyanın dövlət büdcəsində kəsir 40 milyard dollara yaxınlaşır. Bir sözlə, hərbi sənayedə qeydə alınan artım ümumi iqtisadi inkişafa, əhalinin sosial durumuna müsbət təsir etmir. Ölənlərlə bağlı məsuliyyət məsələsinə gəldikdə isə, bütün həlak olanlara görə şəxsən Putin məsuliyyət daşıyır. İstər Rusiya, istərsə də Ukraynada ölənlərə görə. Çünki 2022-ci ilin 24 fevralında Ukraynaya qarşı müharibə əmrini Putin verib. Müharibənin bünövrəsini də 2014-cü ildə Putin Krımı ilhaq etməklə qoyub. Daha sonra Donetsk və Liqansk vilayətlərinin müəyyən hissəsi işğal edilib. Rusiya 2022-ci ilin 24 fevralından bəri Ukraynanın mülki yaşayış məntəqələrini amansızcasına bombalayır, dinc insanları qətlə yetirir. Böyük insanlıq faciəsi yaşanır. Rusiya müharibədə böyük əsgəri itkilər verir. Bütün bunların qanı Putinin böynundadır”.
Vidadi ORDAHALLI
