Bəhruz Quliyev: “Putinin “ruslar Qafqaz xalqlarından nümunə götürməlidir” fikri təsadüfi deyil”
Bu günlərdə Rusiya prezidenti Vladimir Putin demoqrafik problemdən bəhs edib. O qeyd edib ki, gənclər ailə qurmalı, uşaq sahibi olmalı və "maddi vəziyyətlərinin yaxşılaşmasını, təhsil almasını və sairəni sonsuz gözləməməlidirlər:
“Ruslar Qafqaz xalqlarından nümunə götürməlidir Onlar uşaqlarını kifayət qədər erkən yaşda evləndirirlər ki, bu, həqiqətən də doğrudur və biz də onların nümunəsini izləməliyik”
V.Putinin bu açıqlaması Rusiyada əhali sayının azalmasından xəbər verir. Məlum Rusiya-Ukrayna müharibəsinə görə hər iki ölkədə əhali sayı azalıb. Ekspertlər hesab edir ki, Putin məhz bu səbəbdən belə bir açıqlama ilə çıxış edib.
“Putinin açıqlaması bir daha göstərir ki, ailə institutunu qorumaq milli təhlükəsizlik məsələsidir və bu sahədə Qafqaz modeli, təcrübəsi diqqətlə öyrənilməlidir"
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, Rusiya Prezidenti Vladimir Putinin demoqrafik çağırışı əslində təkcə Rusiyanın deyil, müasir dünyanın üzləşdiyi ciddi sosial böhranın etirafıdır. Əhali artımının dayanması, ailə institutunun zəifləməsi və doğum səviyyəsinin kəskin aşağı düşməsi bu gün böyük dövlətlərin belə strateji təhlükəsizlik məsələsinə çevrilib: “Putinin “ruslar Qafqaz xalqlarından nümunə götürməlidir” fikri təsadüfi deyil. Qafqaz ailə modeli əsrlər boyu milli-mənəvi dəyərlərə söykənən, ailəni cəmiyyətin əsas dayağı hesab edən sağlam sosial mexanizm kimi formalaşıb. Bu modeldə ailə qurmaq gecikdirilən plan deyil, həyatın təbii mərhələsi kimi qəbul olunur. Gənclərin erkən ailə qurması isə təkcə demoqrafik artıma deyil, həm də sosial məsuliyyətin, milli bağlılığın və ictimai sabitliyin möhkəmlənməsinə xidmət edir".
Ekspertin sözlərinə görə, Rusiya–Ukrayna müharibəsi fonunda hər iki ölkədə əhali sayının azalması demoqrafik böhranın nə qədər dərin olduğunu göstərir. Müharibə yalnız cəbhədə itkilərlə ölçülmür, o, doğulmayan uşaqlar, dağılmış ailələr və gələcək nəsillərin azalması ilə də öz izini buraxır. Bu baxımdan Putinin çağırışı gecikmiş, lakin etiraf xarakterli mesajdır: “Onu da əlavə edim ki, Qafqaz xalqlarında, o cümlədən Azərbaycanda ailə institutunun güclü qalmasının əsas səbəbi maddi imkanları hər şeyin önünə qoymamaqdır. Ailə qurmaq üçün “ideal şərait” gözləmək yox, birgə həyat quraraq inkişaf etmək fəlsəfəsi bu modelin əsasını təşkil edir. Dövlət də bu modeli dəstəkləyən sosial siyasət yürütməlidir. Demoqrafiya təkcə statistik rəqəm deyil, bu, dövlətlərin gələcəyidir. Qafqaz ailə modeli isə bu gün postsovet məkanında və Avrasiya coğrafiyasında nümunə göstərilə biləcək nadir sosial dəyərlər sistemidir. Putinin açıqlaması bir daha göstərir ki, ailə institutunu qorumaq milli təhlükəsizlik məsələsidir və bu sahədə Qafqaz modeli, təcrübəsi diqqətlə öyrənilməlidir".
Günel CƏLİLOVA
