Təbriz Musayev: “Aİ qurumları sinxron formada Azərbaycanı hədəf alaraq təzyiq göstərirlər”
Ermənistan ərazisində fəaliyyət göstərən Avropa İttifaqının müşahidə missiyası Cənubi Qafqazda sülhün və təhlükəsizliyin qorunmasına dəstək verməkdən qürur duyduğunu bildirib.
Bununla bağlı Avropa İttifaqının Ermənistandakı müşahidə missiyası “X” səhifəsində paylaşım edib və paylaşımda missiyanın fəaliyyətini əks etdirən video da yayımlanıb.
“Biz regionda sülhün və təhlükəsizliyin dəstəklənməsinə sadiq qalmağı davam etdirdiyimiz üçün qürur duyuruq və Ermənistan-Azərbaycan sərhədində fasiləsiz, sutkalıq müşahidə həyata keçiririk”, - deyə missiyanın paylaşımında qeyd olunub.
Məlum olduğu kimi, Azərbaycan sərhəddə istənilən üçüncü qüvvənin təmsilçiliyinə qarşı çıxdığı halda, Aİ-nin Ermənistandakı müşahidə missiyası isə yerlərini daha da bərkidirlər. Özü də Avropa Parlamentinin Azərbaycana qarşı qərəzli qətnamə qəbul etməsinin ardınca Ermənistandakı müşahidə missiyasının bu bəyanatı təsadüfi deyil və bunlar bir-birini tamamlayır. Yəni bu, Azərbaycana basqıdır.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, Avroittifaq müxtəlif formalarda Azərbaycana qarşı ədalətsiz siyasətini davam etdirir: “Əvvəla qeyd etmək istəyirəm ki, Avropa Parlamentinin Cənubi Qafqaz siyasəti ilə bağlı son addımları bu təsisatların regionda dayanıqlı sülh və sabitliyin, iqtisadi inkişafın əleyhinə olduqlarını nümayiş etdirdi. Əfsuslar olsun ki, Avropa İttifaqının təsisatları Azərbaycana qarşı qərəzli mövqedən, münasibətdən əl çəkmək istəmirlər. Bütün vasitələrlə ölkəmizə qarşı əsassız iddialarla çıxış edir, qərəzli bəyanatlar qəbul edirlər. Hazırkı həssas məqamda bu cür mövqeyin sərgilənməsi isə təkcə Azərbaycana deyil, ümumilikdə regiondakı proseslərə, iki ölkənin sülh gündəliyinə qarşı yönəlib. Bu kimi bəyanatlarla sülh gündəliyini sarsıtmaq istəyirlər. Məsələ ondadır ki, dekabrın 2-də Avropa İttifaqı ilə Ermənistan arasında “Avropa İttifaqı-Ermənistan Tərəfdaşlığı üçün Strateji Gündəlik” adlı sənəd qəbul edildi. Burada Azərbaycanın narazılığına o səbəb olub ki, ölkənin maraqlarına, sülh prosesinə qarşı bəzi məqamlar yer alıb. Bundan iki həftə sonra Avropa Parlamenti Azərbaycanla bağlı qərəzli qətnamə qəbul edib. AP-nin qəbul etdiyi qətnamədən dərhal sonra Aİ-nin Ermənistandakı müşahidə missiyası sərhəddəki fəaliyyəti ilə bağlı nümayişkəranə formada açıqlama ilə çıxış edir. Göründüyü kimi, Aİ qurumları sinxron formada Azərbaycanı hədəf alaraq təzyiq göstərirlər. Bütün bunlarda məqsəd regionda Ermənistana daha çox dəstək vermək və bu ölkəni himayə etməkdir”.
Vidadi ORDAHALLI
