Azər Həsrət: “Erməni ictimaiyyətini ayıldırlar ki, II Qaregin ailəsi Rusiya kəşfiyyatına bağlıdır”
Ermənistan Milli Təhlükəsizlik Xidməti (MTX) sensasion açıqlama ilə çıxış edib. Qurumun yaydığı məlumata görə, Erməni Apostol Kilsəsinin rəhbəri, Katolikos II Qareginin qardaşı Ezras sovet dövründə KQB tərəfindən əməkdaşlığa cəlb edilib və ona “Karo” agentura ləqəbi verilib.
MTX-nin iddiasına əsasən, Ezras hazırda da xarici xüsusi xidmət orqanları ilə əlaqələrini davam etdirir. Açıqlamada konkret adlar çəkilməsə də, bu əlaqələrin Rusiya Federal Təhlükəsizlik Xidməti (FSB) ilə mümkün təmaslara işarə etdiyi bildirilir. Qeyd olunur ki, məsələ ilə bağlı araşdırmalar davam etdirilir. Rəsmi qurum əlavə detallar açıqlamasa da, yayılan məlumat ölkə ictimaiyyətində və dini dairələrdə ciddi rezonans doğurub.
Burada diqqəti çəkən məqam həm də odur ki, Ermənistan rəsmi səviyyədə II Qareginin Rusiya kəşfiyyatına bağlılığına eyham vurur. Çünki 1990-cı ildən Erməni Apostol Kilsəsinin rəhbəri olan II Qareginin KQB-yə bağlı olması barədə zaman-zaman iddialar səslənib. İndi II Qareginin qardaşını ittiham etsələr də, əslində bununla katolikosun üzərinə gedirlər. Yəni onlar Rusiya kəşfiyyatına bağladılar.
Sözügedən məsələni baki-xeber.com-a şərh edən siyasi ekspert Azər Həsrətin fikrincə, prinsipcə, burada təəccüblü heç nə yoxdur: “Ona görə ki, SSRİ dönəmində din xadimləri KQB-yə bağlı olublar. Çünki özbaşına heç kəs dini fəaliyyətlə məşğul ola bilməzdi. Dini rəhbər sıradan bir adam ola bilməzdi. Hətta azsaylı dini məktəblər belə, KQB-yə bağlı idi. Ona görə də hardasa dini rəhbərlər təyin olunanda, irəli çəkiləndə mütləq kəşfiyyat orqanının rəyi alınırdı. Yəni KQB özü məsləhət bilirdi ki, onlar irəli çəkilsinlər. Bu baxımdan katolikos II Qareginin qardaşının xidmətə cəlb edilməsi sensasion sayılmamalıdır. Sadəcə olaraq uzun illər idi erməni ictimai rəyi yatmaqda idi, xəbərləri yox idi. Düşünürdülər ki, II Qaregin erməni xalqının maraqlarına qulluq edir. Paşinyan hökuməti də bunun belə olmadığını göstərməyə çalışır. Görünür, iş o həddə çatıb ki, Paşinyan artıq məcburiyyətdən bunların KQB-yə bağlı olduğunu ifşa etməyə başlayıb. Yəni cəmiyyəti sonda inandırmaq üçün, onların real kimliyini göstərmək, əsl üzlərini ortaya çıxarmaq üçün bu faktı açmalı olublar. KQB və bənzəri qurumlarla iş birliyində olan agentlər, adamlar haqqında olan məlumatlar gizli saxlanılır. Bunu açıqlamırlar. Ona görə ki, açıqlayanda əks-effekt verə bilir. Kəşfiyyat qurumu ilə əməkdaşlıq etmək istəyənlər çəkinir. Hesab edirlər ki, bir gün onlar da ifşa olunacaqlar. Ona görə də bir qayda olaraq dövlətlər xüsusi xidmət orqanları ilə əməkdaşlıq edənlərin adlarını açıqlamırlar. Ancaq Ermənistan Nerses ailəsinin SSRİ dönəmindən KQB ilə iş birliyində olmasını açıqlayır. Bununla bir növ müstəqil Ermənistanda da bu fəaliyyətlə məşğul olanlara xəbər ötürür ki, narahat olmayın. Yəni siz Ermənistan xüsusi xidmət orqanları ilə iş birliyindən narahat olmayın. Onu açıqlamayacağıq. Ancaq bu adamların KQB ilə əlaqələrini açıqlamaqla onlara o tərəfdən zərbə vurmaq istəyirlər. Onsuz da II Qareginin Rusiya kəşfiyyatı ilə bağlı olması bəlli idi. İndi bunun rəsmi səviyyədə ifşa edilməsi kilsəyə endirilən növbəti zərbədir. Erməni ictimaiyyətini ayıldırlar ki, II Qaregin ailəsi Rusiya kəşfiyyatına bağlıdır”.
Vidadi ORDAHALLI
