Azərbaycanda istehsal olunan neft məhsullarının Ermənistana ixracından danışan Ermənistanın baş naziri Nikol Paşinyan bildirib ki, xalis ticarət özəl şirkətlər arasında baş verir:
“Amma təbii ki, bu ticarət üçün siyasi şərait yaradan Ermənistanla Azərbaycan arasında bərqərar olan sülhdür. Əlbəttə ki, siyasi səviyyədə iki ölkənin biznes dairələrinin imkanlar barədə məlumatlandırılacağı və müvafiq maraq yaranarsa, artıq müqavilələr imzalayacaqları barədə razılaşmalar da olub...”
Paşinyan deyib ki, Azərbaycanla Ermənistan arasında bu ticarət özəl qurumlar vasitəsilə baş verir.
Doğrudan da maraqlıdır, Azərbaycan neftinin Ermənistana satılması hansı özəl şirkət tərəfindən həyata keçirilir? Yoxsa bu ixrac prosesini SOCAR gerçəkləşdirir?
İlham Şaban: “Azərbaycan tərəfindən satış şirkəti SOCAR-dır, Ermənistanda alış prosesini özəl şirkət həyata keçirib”
Neft üzrə ekspert İlham Şaban “Bakı-Xəbər”ə bildirdi ki, Azərbaycan SOCAR tərəfindən ilk dəfə olaraq yerli mənşəli neft yükünün Ermənistana tədarükünü həyata keçirib. “Azərbaycan tərəfindən satış şirkəti SOCAR-dır, Ermənistanda isə alış prosesini özəl şirkət həyata keçirib. Yəni SOCAR satıb, özəl şirkət də alıb. Çünki Ermənistanda neft məhsullarının ölkəyə idxalı ilə dövlət məşğul olmur, bu işlə məşğul olanlar özəl şirkətlərdir. Orada neft ticarəti ilə özəl qurumlar məşğuldur”-deyə İ.Şaban bildirdi.
Fuad İbrahimov: “Bu işi hansı şirkətin həyata keçirdiyinin...”
İqtisadçı Fuad İbrahimov “Bakı-Xəbər”ə açıqlamasında ilk növbədə onu qeyd etdi ki, Azərbaycan Respublikası ərazisində, eyni zamanda ölkədən kənara ixrac əməliyyatları neft məhsullarının satışı ilə bağlı xüsusi lisenziyası olan şirkətlər tərəfindən aparıla bilər. “Bu prosesdə hansısa şirkət önəmli deyil. Tutalım, “N” saylı şirkət “M” saylı şirkətə bu məhsulu satıb. Burada məsələ ondan ibarətdir ki, hələ sülh müqaviləsi imzalanmadığı halda ticarət dövriyyəsinin artıq bir başlanğıc addımı var. Çox önəmli bir məsələdir. Bu o deməkdir ki, həqiqətən də biz sülhə doğru gedirik. Hər hansısa üçüncü dövlətin bu iki xalq arasında yenə də münaqişə yaratmaq gücü azalıb. Bunun sətiraltı göstəriciləri var. Hesab edirəm ki, sülhə doğru aparacaq bir addımdır. Buna pozitiv istiqamətdə gedirik.
Xatırlayırsınızsa, Rövnəq Abdullayev Dövlət Neft Şirkətinin rəhbəri olduğu dövrdə erməni kilsələrinə Azərbaycan qazının verilməsi ilə bağlı açıqlama vermişdi. O dövrdə də Gürcüstan vasitəsilə bunu edirdik və bir daha sübut edirdik ki, mülki insanlara münasibətdə, xoş qonşuluq davranışlarında Azərbaycan xalqı dəyişməyib...Biz millət olaraq buyuq.
44 günlük müharibədə qələbə qazandıqdan sonra yenə də sülhə, xoş qonşuluq siyasətinə qayıdırıq. Burada neqativ bir şey yoxdur. Eyni zamanda bu işi hansı şirkətin həyata keçirdiyinin əhəmiyyəti yoxdur. Çünki bu gün bu şirkət onu həyata keçirəcək, sabah da başqa şirkət. Əsas odur ki, ona start verilib. Bu ticarət dövriyyəsinin həm Ermənistana, həm də Azərbaycana müsbət təsiri olacaq. Söhbət bölgənin inkişafından gedir. Düşünürəm, bu pozitiv dəstək olacaq. Bilavasitə Zəngəzur dəhlizinin açılması isə, ümumiyyətlə, Azərbaycan və Ermənistan üçün 100 illiyin ən vacib və gəlirli gələcəyini qurmaq hadisəsi olacaq”-deyə F.İbrahimov bildirdi.
Qeyd edək ki, 22 vaqona yüklənmiş 1220 ton Aİ-95 markalı avtomobil yanacağı ADY-nin yük qatarı ilə Bakı Yük Stansiyasından Böyük Kəsik stansiyası istiqamətində yola salınıb.
İradə SARIYEVA
