Ramil Hüseynov: “Rusiya Ermənistana görə ABŞ-la qarşı-qarşıya gəlmək istəyəcəkmi?”
Rusiyanın 2026-cı ildə Ermənistanda keçiriləcək parlament seçkilərinə ciddi müdaxilə edəcəyinə dair iddialar getdikcə artır. İrəvan hökumətinin bu məsələ ilə bağlı Avropa İttifaqına müraciət etməsi isə gərginliyi daha da artırıb.
Artıq Ermənistan rəhbərliyinin bu addımının Moskvada birmənalı qarşılanmadığı, seçkilərdə Kremlə bağlı qüvvələrin hakimiyyətə gətirilməsi üçün ən gözlənilməz yollara əl ata biləcəkləri deyilir.
Ermənistan müxalifəti ittiham edir ki, seçkiyə görə Paşinyan xaricdən qüvvə cəlb edir. Məsələ ondadır ki, Ermənistan hökumətinin gələn il keçiriləcək parlament seçkiləri ilə bağlı Aİ-dən kömək istəməsi, qurumun xarici siyasət rəhbəri Kaya Kallasın məsələ ilə bağlı çıxışı İrəvanda geniş rezonans doğurub. Kallas danışıqlardan sonra bildirib ki, Aİ Ermənistana əlavə 15 milyon avro yardım edəcək, bu məbləğin bir hissəsi Rusiyanın yaydığı dezinformasiyaya qarşı mübarizəyə xərclənəcək. Paşinyan isə müxalifəti ölkədə sabitliyi pozmaqda ittiham edir.
Bu arada Rusiya da Avroittifaqın Ermənistana seçki ilə bağlı kömək etməsindən məmnun deyil və bunu açıq deyir.
Maraqlıdır, Rusiya müxalifətlə birlikdə iddia edə bilərmi ki, Aİ Ermənistanın daxili işinə müdaxilə edir və bundan istifadə edib Ermənistana hərbi müdaxilə edə bilərmi?
“Ukraynada gedən müharibə fonunda bu, Kremlin maraqlarına uyğun deyil”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Rusiyanın Ermənistana müdaxiləsi situasiyadan asılı olacaq: “Əvvəla, Rusiya uyğun məqamda belə bir müdaxilə etmək istəyər. Ancaq məsələ ondadır ki, Rusiya Ermənistanla quru sərhədinə malik olmadığına görə, belə bir imkanı o qədər də yoxdur. Bunun üçün gərək Rusiya ya Gürcüstan, ya da İran və Azərbaycan ərazisindən istifadə etsin. Bu da hazırda real görünmür. Bəli, bir müddət əvvəl Moldovada keçirilən parlament seçkilərində Rusiyapərəst qüvvələrin məğlub olması Moskva üçün böyük zərbə oldu. Gələn ilin iyununda Ermənistanda keçiriləcək seçkilərdə analoji vəziyyətin təkrarlanması Rusiya üçün zərbə olacaq. Ancaq o da var ki, Ermənistanda Rusiyaya bağlı qüvvələrin mövqeyi çox zəifdir. Elə bir xarizmatik güclü lider də yoxdur ki, müxalifəti ətrafında birləşdirsin. Bunu Moskvada da yaxşı bilirlər. Avropa İttifaqı ona görə maliyyə dəstəyi göstərir ki, Rusiyanın Ermənistana siyasi, hibrid müdaxiləsinin qarşısını hakimiyyət ala bilsin. Ukraynada gedən amansız müharibə fonunda Rusiyanın Ermənistana hərbi müdaxiləsi o qədər də real görünmür. Çünki bütün resurslarını Ukrayna istiqamətinə yönəldib. Başqa bir problem odur ki, Rusiyanın hərbi müdaxiləsinə təkcə Aİ etiraz etməyəcək. Buna həm də Birləşmiş Ştatlar qarşı çıxacaq. Çünki hərbi müdaxilə ABŞ-ın iştirak etdiyi “Tramp marşrutu”nu sual altında qoyacaq. O baxımdan Rusiya Ermənistana görə ABŞ-la qarşı-qarşıya gəlmək istəyəcəkmi? Hesab edirəm ki, yox. Ona görə ki, bu, ABŞ-ı Aİ ilə birgə hərəkət etməyə sövq edəcək. Ukraynada gedən müharibə fonunda bu, Kremlin maraqlarına uyğun deyil. O baxımdan Rusiyanın belə şəraitdə Ermənistana hərbi müdaxiləsi real görünmür”.
Vidadi ORDAHALLI
