“Bakı-Xəbər" Media Qrupunun rəhbəri, politoloq Aydın Quliyev Facebook səhifəsində İsrailin Baş naziri Netanyahunun ABŞ-la bağlı son açıqlamalarına münasibət bildirib.
A.Quliyev yazır:
“Trampın prezidentlikdən daha çox böyük Amerika vətənpərvəri olaraq Netanyahunun bu sözlərinə necə dözümlü yanaşa biləcəyi maraqlıdır. Netanyahu Yerusəlimdə məşhur Əl-Əqsa mıscidinə bitişik olan yəhudilərin "Ağlama divarı" qarşısında Hanuka tədbirində deyib - "Yəhudilər bacarıqsız olsaydılar, ABŞ olmazdı. ABŞ, xristian mədəniyyəti öz varlığına görə yəhudilərə borcludur"...
Daha bu qədər yox daaa... Bu günkü Amerikada yəhudi diasporunun və yəhudi lobbisinin hansı qüdrətin sahibi olması mübahisə doğurmur. Lakin 1770-1790-larda ABŞ dövlətinin quruculuğunda yəhudilərin müstəsna roluna dair faktlar yoxdur. Netanyahu Corc Vaşinqtonun, Tomas Ceffersonun, Bencamin Franklinin və digərləri kimi ABŞ-ın İstiqlaliyyət Bəyannaməsinin müəlliflərinin milliyyətcə yəhudi olduqlarını iddia edirsə, bu iddia əsassızdır... Onların çoxunun Avropadan mühacirət etmiş protestant və anqlikan məzhəbli ingilis və irland kökənli olduqları təsdiqlənmiş faktlardır...
İndi söz Trampdadır... Tramp deyəcəkmi ki, cənab Netanyahu, tarix var, həqiqət var, ABŞ-ın qurulmasına görə biz yəhudilərə yox, İsrailin yaradılmasına görə yəhudilər biz amerikalılara borcludur...”
Tahir TAĞIYEV
