İlyas Hüseynov: “Sülhün təşəbbüskarı bizik, sülh yolunda ardıcıl addımlar atan Azərbaycandır”
Ermənistanın İrandakı səfiri Qriqor Akopyan İranın Tasnim xəbər agentliyinə müsahibəsində bildirib ki, son aylarda Ermənistan və Azərbaycan arasındakı sülh prosesində əhəmiyyətli irəliləyişlər olduğunu söyləmək olar.
Səfir deyib ki, biz Azərbaycan-Ermənistan sülhünün institutlaşmasında başqa ölkələrin, o cümlədən bizə dost qardaş İranın dəstəyini yüksək qiymətləndiririk. “Bu kontekstdə Ermənistan əldə edilən sülhün təsisatlaşdırılmasına yönəlmiş dost İran da daxil olmaqla, beynəlxalq tərəfdaşlarının fəal dəstəyini və səylərini yüksək qiymətləndirir. Əminik ki, beynəlxalq ictimaiyyət Azərbaycanı lazımi siyasi iradə nümayiş etdirməyə və son addımı - sülh müqaviləsinin yekun imzalanmasını atmağa təşviq edəcək”-deyə Akopyan bildirib.
Akopyanın sözündən belə çıxır ki, Azərbaycan sülh sazişini guya imzalamaq istəmir, Ermənistan isə sülh müqaviləsini guya tezliklə imzalamaq istəyir. Halbuki, Akopyanın sözlərində həqiqət yoxdur. Çünki müharibə bitəndən dərhal sonra qalib Azərbaycan dövləti sülh müqaviləsi imzalamaq təklifi ilə çıxış etdi, Ermənistan isə hələ də prosesi yubatmaqla məşğuldur. Azərbaycanı əsassız ittiham edən səfir nədənsə gerçəyi etiraf edib sülh müqaviləsinin imzalanması prosesini məhz Ermənistanın ləngitdiyini dilə gətirmək istəmir.
“Sülh müqaviləsinin mətninin ABŞ-da paraflanması üçün Azərbaycan əlindən gələni edib”
Politoloq İlyas Hüseynov “Bakı-Xəbər”ə bildirdi ki, Ermənistanın İrandakı səfirinin düşüncələri həm də İranla Azərbaycanı üz-üzə qoymağa yönəlib. “Çox səhv düşüncələr paylaşılır və guya ki, Azərbaycana sülh müqaviləsini imzalaması üçün təzyiq etmək lazımdır. Nəzərə almaq lazımdır ki, sülh müqaviləsinin mətninin ABŞ-da paraflanması üçün Azərbaycan əlindən gələni edib və müharibədən sonra qalib hüququnda çıxış edən Azərbaycan 5 maddəlik sülh təkliflərini Ermənistana təqdim edib. Yəni sülhün təşəbbüskarı bizik, sülh yolunda ardıcıl addımlar atan Azərbaycandır. Belə bir təəssürat yaranır ki, Ermənistanın İrandakı və İranın Ermənistandakı səfirləri çox neqativ fəaliyyəti təşviq etməkdə bir-birinə oxşayırlar. Çünki İranın Ermənistandakı səfiri Mehdi Sobhani də çox tez-tez tamamilə regionun siyasi gündəliyindən uzaq fikirlər ortaya qoyur və bu birmənalı olaraq qəbulolunmazdır. Nəzərə almaq lazımdır ki, TRİPP marşrutuna qarşı İranın Təhlükəsizlik Şurasının katibi Əli Əkbər Vilayəti ali dini liderinin nümayəndəsi qismində çıxış edib. Bu da ümumiyyətlə Cənubi Qafqazda gedən proseslər fonunda İranın tamamilə zidd yanaşmalarını ortaya qoyur. Bütün bunların fonunda Ermənistanın İrandakı səfirinin Azərbaycana sülh yolunda təzyiqlərlə bağlı fikirləri, düşünürəm ki, heç də təsadüfi deyil, bunu bir prosesin tərkib hissəsi kimi də qiymətləndirmək olar”. İ.Hüseynovun sözlərinə görə, burada məqsəd Azərbaycanın regional infrastruktur və kommunikasiya ilə bağlı baxışlarını mübahisələndirmək, Azərbaycanın sülh yolunda praqmatik düşüncəsinə zərbə vurmaq niyyətləridir: “Hesab edirəm ki, bu niyyətlər puça çıxacaq və heç bir nəticəsi olmayacaq. Azərbaycanın diqtəsi, Azərbaycanın yanaşması ilə sülh formalaşacaq, eləcə də nəqliyyat-kommunikasiya xətləri də suverenlik prinsipi əsasında açılacaq, nəqliyyat arteriyaları regionun təhlükəsizliyinə xidmət edəcək”.
İradə SARIYEVA
