Firdovsi Şahbazov: “Bu, sadəcə mühafizəkarların uydurduğu bəhanədir”
İranın Ali liderinin müşaviri Əli Əkbər Vilayəti bildirib ki, “Tramp marşrutu” mahiyyət etibarı ilə Zəngəzur dəhlizinin özüdür.
Vilayəti Ermənistanın Tehrandakı səfiri Qriqor Akopyanla görüşü zamanı "Tramp marşrutu"nu İslam Respublikasının "milli təhlükəsizliyinə təhdid" kimi qiymətləndirib: “İran əvvəldən Zəngəzur dəhlizinin əleyhinə çıxıb, çünki Tehran regional sərhədlərin hər hansı bir dəyişdirilməsini rədd edir və öz təhlükəsizliyinə xarici perimetr üzrə yaranan təhdidlərə ehtiyatla yanaşır”.
Vilayəti onu da əlavə edib ki, dəhlizin reallaşması İranın şimalında NATO-nun iştirakına səbəb ola bilər və bu da İranın şimal rayonları və Rusiyanın cənubu üçün ciddi təhlükəsizlik risqləri yaradar.
Gələn ilin martında Ağbənd-Kəlalə avtomobil yolu işə düşəcək. Azərbaycan İranın nəqliyyat layihələrindən kənarda qalmamasına töhfə verir, bunlar isə köhnə ritorikadan əl çəkmir.
“Zəngəzur dəhlizinin açılması iqtisadi baxımdan İranın da xeyrinədir”
Sözügedən məsələ ilə bağlı fikirlərini “Bakı-Xəbər”lə bölüşən iqtisad üzrə fəlsəfə doktoru Firdovsi Şahbazov hesab edir ki, İranın Zəngəzur dəhlizi ilə bağlı belə mövqe sərgiləməsi yersizdir: “Əvvəla, Əli Əkbər Vilayəti İranda mühafizəkar qanadı təmsil edir. Mühafizəkarlar ənənəvi olaraq Zəngəzur dəhlizinə qarşı çıxış edirlər. Guya bu, İran üçün ciddi təhdid mənbəyidir. Ancaq bunun nə siyasi, nə də iqtisadi əsası var. Çünki Zəngəzur dəhlizinin işə düşməsi o demək deyil ki, İranla Ermənistan arasında əlaqə kəsiləcək. Bu, sadəcə mühafizəkarların uydurduğu bəhanədir. Dəhlizin açılması o demək deyil ki, sərhədlər dəyişir. İran əgər ABŞ-ın prosesdə iştirakından belə narahatdırsa, o zaman bəs nəyə görə indiyə qədər Avropa İttifaqının Ermənistanda fəaliyyət göstərən müşahidə missiyasına bir dəfə də rəsmi etiraz etməyib? Zəngəzur dəhlizinin açılması iqtisadi baxımdan İranın da xeyrinədir. Çünki bu imkan verəcək ki, İran-Culfa dəmir yolu fəaliyyətə başlasın. Nəticədə İran daha qısa yolla dəmir yolu vasitəsi ilə İrəvana Naxçıvan üzərindən yüklərin daşınmasını təmin edə bilər. Başqa bir tərəfdən, kommunikasiyaların açılması İranın da nəqliyyat daşımalarında iştirakına imkanlar yaradır. Gələn il İrandan keçən Araz dəhlizinin avtomobil yolu fəaliyyətə başlayacaq. İstisna deyil ki, gələcəkdə dəmir yolu da çəkiləcək. Çünki Orta Dəhliz vasitəsi ilə daşınan yüklərin həcminin artması yeni dəmir yollarının çəkilməsinə olan tələbatı formalaşdırır. Bu imkanlardan faydalanmaq əvəzinə, mühafizəkarlar yersiz olaraq Zəngəzur dəhlizini təhdid olaraq təqdim edirlər. Belə fikirlər sadəcə mənasızdır”.
Vidadi ORDAHALLI
