Ramil Məmmədli: “SBU dronları Qara dəniz üzərindən Xəzərdəki neft platformalarına yönəldir”
Ukrayna Təhlükəsizlik Xidməti (SBU) tərəfindən idarə olunan uzunmənzilli pilotsuz uçuş aparatları (PUA) bu ay ərzində üçüncü dəfə Rusiyanın Xəzər dənizindəki obyektlərinə hücumlar həyata keçirib. Bu dəfə zərbə Korçagin neft-qaz-kondensat yatağındakı platformaya endirilib. Hücum nəticəsində platformanın vacib avadanlığı zədələnib və istehsal prosesləri tamamilə dayandırılıb.
Məlumata görə, SBU-nun elit xüsusi əməliyyat bölməsinin təşkil etdiyi hücumlarda uzaqmənzilli taktiki PUA-lardan istifadə olunub.
Məlumat üçün qeyd edək ki, əvvəlki iki hücum dekabrın 11-i və 12-də baş vermişdi. Ayın 11-də SBU PUA-ları “Lukoyl”a məxsus Filanovskaya platformasını hədəfə almışdı. 4 dəqiqə davam edən hücum zamanı avadanlıq zədələnməsi nəticəsində 20-dən çox quyuda neft və qaz hasilatı dayandırılmışdı. Dekabrın 12-də isə Ukraynanın Xüsusi Əməliyyat Qüvvələri və müttəfiq “Çernaya iskra” qrupu Xəzər dənizində Rusiya sahillərinə yaxın hərəkət edən iki gəmini hədəf alıb. Xüsusi əməliyyatlar nəticəsində İrana silah daşıdığına görə ABŞ sanksiyalarına məruz qalan “Kompozitor Raxmaninov” və “Askar Sarıdja” adlı iki gəmiyə zərbə endirilib.
O da məlumdur ki, Ukrayna ilə Xəzər dənizi arasında məsafə yaxın deyil. Üstəlik, Rusiyanın Ukraynanın cənubunu və şərqini işğal etdiyini nəzərə alsaq məsafə bir az da uzanır. O zaman Ukrayna Xəzərdə Rusiyanın neft platformalarını dronlarla necə vurur? Dronlar haradan uçub gəlir?
“Ukrayna Rusiyanın dərinliklərdində yerləşən strateji məntəqələri belə, uzunmənzilli PUA-larla vura bilir”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, Ukrayna Təhlükəsizlik Xidməti dronları Qara dəniz üzərindən Xəzərdəki neft platformalarına yönəldir: “Əvvəla, son illər Ukraynaya edilən hərbi-texniki yardım bu sahədə ciddi nəticələrin əldə edilməsinə səbəb olub. Ukrayna Rusiyanın dərinliklərdində yerləşən strateji məntəqələri belə, uzunmənzilli PUA-larla vura bilir. Bu baxımdan Ukraynanın Rusiyanın Xəzərdəki platformalarını hədəf alması elə də çətin deyil. Bundan əvvəl Şimali Qafqazda yerləşən Qroznı şəhəri PUA-ların hücumuna məruz qalıb. Qara dənizin müəyyən hissəsi Ukraynanın nəzarətində olduğu üçün, çox güman ki, Xəzər dənizinə istiqamətlənən dronlar oradan havaya qaldırılıb. Həmin dronlar Şimali Qafqazın hava məkanını keçərək Xəzərdəki neft platformalarına çırpılıb. Ya da ola bilsin ki, SBU hansısa vasitələrlə PUA-ları Rusiya ərazisinə keçirib və oradan neft platformalarına yönəldib. Necə ki, bir neçə ay əvvəl “Hörümçək” əməliyyatında bu taktikadan istifadə etdi. Ancaq Xəzərdəki platformalara dron hücumunda bu taktikadan istifadə edilməsi barədə məlumat yoxdur. Ona görə də hesab edirəm ki, Ukrayna gecə saatlarında Qara dənizdən həmin PUA-ları havaya qaldırıb. Rusiya da əsasən gecə saatlarında Ukraynaya qarşı raket və dron zərbələri endirir. Çünki gecələr raket və PUA-ların zərərsizləşdirilməsi gündüzlə müqayisədə çətin olur”.
Vidadi ORDAHALLI
