Son günlər erməni mediası Azərbaycan hakimiyyətinə qarşı növbəti yalan və qarayaxma kampaniyasına start verib. Onlar iddia edirlər ki, Prezident İlham Əliyevin imzaladığı amnistiya aktı layihəsi 44 günlük Vətən müharibəsi və Dağlıq Qarabağın azad edilməsi əməliyyatlarında iştirak etmiş şəxslərin, habelə bu əməliyyatlarda həlak olmuş, itkin düşmüş və əlil olmuş şəxslərin yaxınlarının cəzadan azad edilməsini nəzərdə tutur.
Erməni mediası daha da irəli gedərək, bu humanist addımı “ermənifobiya siyasətini gücləndirmək” kimi qələmə verməyə çalışır.
Əslində isə burada söhbət Azərbaycan dövlətinin vətəninə, xalqına və insanlığa verdiyi dəyərdən gedir. Bu fərman 20 mindən çox vətəndaşın və ailənin haqqını tanıyan, igid əsgərlərə vətənpərvərliklərinə görə verilmiş ən yüksək qiymət və hörmət aktıdır. Vətənini qoruyan hər bir şəxs, hər bir qazinin və ailəsinin dövlət tərəfindən tanınması və müdafiə edilməsi ədalətin, insanpərvərliyin və milli qürurun nümunəsidir.
Erməni mediasının bu yalan kampaniyası bir şeyi açıq göstərir: həqiqətin səsini boğmaq, tarixi manipulyasiyaya uğratmaq və öz təcavüzkar siyasətini ört-basdır etmək istəyi. Ermənistan 30 il ərzində Azərbaycanın torpaqlarını işğalda saxlamış, bir milyon nəfər əhalini evindən-eşiyindən didərgin salmışdı. Bu gün əfv edilənlər məhz həmin işğala son qoyulmasında xidməti olanların özləri və ailə üzvləridir. Azərbaycanın işğaldan azad etdiyi ərazilər isə BMT tərəfindən tanınan suveren torpaqlardır. Lakin Azərbaycan heç bir vaxt Ermənistanın bir qarış torpağını belə işğal etməyib. 2020-ci ilin noyabrında Azərbaycan ordusuna əmr verilsəydi, İrəvana qədər irəliləmək imkanı var idı. Amma Azərbaycan dövlətinin rəhbərliyi bu imkanı insanlıq, prinsipiallıq və beynəlxalq ədalət naminə istifadə etmədi. Bu, yalnız gücün göstəricisi deyil, eyni zamanda humanizmin və strateji qətiyyətin təcəssümüdür.
"Dağlıq Qarabağda yaşayan ermənilər"ə gəldikdə isə, onların bir qismi işğal dövründə Ermənistan hökuməti tərəfindən qeyri-qanuni şəkildə başqa ölkələrdən köçürülmüşdü. Azərbaycan hökuməti yalnız qanuni əsaslarla ərazidə yaşayan yerli sakinlərə reinteqrasiya imkanı təklif edib. Qeyri-qanuni miqrant sayılanların isə ərazidən çıxarılması tələbi hüquqi və beynəlxalq standartlara uyğundur. Amma onları da Azərbaycan ordusu Qarabağdan zorla çıxarmayıb. Nikol Paşinyan köçdən dərhal sonra etirafedici bir bəyanat verdi ki, dinc əhaliyə qarşı zorakılıq faktı qeydə alınmayıb. Lakin erməni separatçıları onlara Ermənistana köçməyi tapşırmış, sonradan məcburi qaçqın statusu almaq planı qurmuşdu - bu plan uğursuzluğa düçar oldu. Azərbaycanın humanist siyasəti isə yalnız 25-30 min yerli sakin üçün real reinteqrasiya imkanı yaradırdı.
Erməni mediasının məqsədi açıqdır: Azərbaycanın humanist addımını qaralamaq, dünyaya yanlış mesaj vermək, öz təcavüzkar və işğalçı siyasətini normal kimi təqdim etmək. Amma unudurlar ki, tarix manipulyasiya edilə, haqqın səsi boğula bilməz. Azərbaycan dövləti və xalqı vətənini qoruyan hər bir vətəndaşının yanında durur, onları cəzalandırmaq yox, dəstəkləmək prinsipi ilə hərəkət edir. Erməni mediası və cəmiyyəti ölkənin şəhərlərində Azərbaycan xalqına qarşı cinayət törətmiş şəxslərə - Stepan Şaumyana, Monte Melkonyana, Vazgen Sargsyana, Andranik Ozaniana və başqa cinayətkarlara qoyulan heykəllərdən söhbət açsa bu daha ədalətli olar. Çünki bu "qəhrəman"ların işgəncələrlə öldürdüyü azərbaycanlıların hüquqi statusu araşdırılsa, onların 99 faizinin mülki əhali - uşaqlar, qocalar və qadınlar olduğuortaya çıxar. Erməni cəmiyyəti Azərbaycan xalqının qəhrəmanları ilə özlərinin "qəhrəman" adlandırdığı cinayətkarlarını bir sıraya qoya bilməz. Azərbaycan əsgəri bir nəfər də olsun mülki erməniyə qəsdən atəş açmayıb, əksinə, onları qoruyub və təhlükəsizliyini təmin edib.
Bu əfv yalnız vətəndaşlar üçün deyil, bütün dünyaya Azərbaycanın ədalətə, insanlığa və tarixi həqiqətə bağlılığını göstərir. Ermənistan və onun media qurumları isə yalanları ilə yalnız öz cəmiyyətlərini aldatmağa çalışır. Amma haqq və ədalət hər zaman qalib gəlir. Azərbaycan haqq işində, humanist siyasətində və vətənpərvərlikdə möhkəmdir və heç bir böhtan, heç bir qaralama kampaniyası bu həqiqəti dəyişdirə bilməz.
Azərbaycanın humanist əfv fərmanı tarixdə bir nümunə kimi qalacaq: vətənini qoruyan hər bir vətəndaşa verilmiş yüksək qiymət igidliyə və insanlığa verilmiş ən böyük hörmətdir. Ermənistanın böhtan kampaniyası isə sadəcə onun tarix qarşısında iflasıdır.
Akif NƏSİRLİ
