Məhəmməd Əsədullazadə: “Avroittifaq Cənubi Qafqazda daha çox Ermənistana diqqət ayırır, iqtisadi dəstək verir”
Brüsseldə keçirilən Avropa İttifaqının Xarici İşlər Şurasının iclasında Ermənistanla Aİ arasında tərəfdaşlığın əsas nailiyyətləri müzakirə olunub. Bu barədə Ermənistanın xarici işlər naziri Ararat Mirzoyan məlumat verib.
Onun sözlərinə görə, Avropa diplomatiyasının rəhbəri Kaya Kallasın sədrliyi ilə keçirilən iclasda iqtisadi əməkdaşlıqdan tutmuş təhlükəsizlik sahəsində dayanıqlığın gücləndirilməsinə qədər geniş spektrli məsələlər, o cümlədən hibrid təhdidlərə qarşı mübarizə və Avropa Sülhə Dəstək Mexanizmi çərçivəsində yardım məsələləri müzakirə olunub. Mirzoyan bildirib ki, iclasda həmçinin Cənubi Qafqazda vəziyyət, region ölkələri arasında kommunikasiyaların açılması və bunun yaradacağı yeni imkanlar da gündəmdə olub: “Bu məsələləri müzakirə etdik və Aİ-nin Cənubi Qafqazda infrastruktur layihələrində iştirakını alqışlayacağıq”.
Məgər, Avropa Sülhə Dəstək Mexanizmi tək iqtisadi olacaq ki? Bunun arxasında nə gizlənir?
“Söhbət ondan gedir ki, Brüssel hazırkı səhv siyasəti ilə revanşistlərə yardım etmiş olur”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin fikrincə, Avropa İttifaqı ilə Ermənistan arasında keçirilən görüş, sazişin imzalanması bir sıra məsələlərdən xəbər verir: “Görünən odur ki, Avroittifaq Cənubi Qafqazda daha çox Ermənistana diqqət ayırır, iqtisadi dəstək verir. Ancaq buna baxmayaraq, Ermənistan bununla kifayətlənmək istəmir. Seçkilər ərəfəsində Aİ-nin siyasi dəstəyi artırmasını istəyir. Aİ ilə Ermənistan arasında imzalanan strateji sənədə fikir versək görərik ki, burada sülhə mane olan bəndlər var. Əslində Ermənistan o sənədə imza atmamalı idi. Çünki həmin sənəddə Qarabağı könüllü tərk edən ermənilərin geri qayıtması məsələsi var. Aİ missiyasının Ermənistanda fəaliyyətinin gücləndirilməsindən söhbət gedir. İnsanlıq əleyhinə cinayətlərdə iştirak edən separatçıların azad edilməsindən söhbət gedir. Bütün bunlar Azərbaycanla Ermənistan arasında sülh sazişinin imzalanmasına mane olur. Aİ bütün bunları görməzdən gəlirsə, deməli Brüssel sülhün əldə edilməsində səmimi deyil. İkincisi, Avroittifaq iqtisadi cəhətdən yalnız Ermənistana dəstək verirsə, bu, heç də sülhə xidmət etmir. Aİ əgər sülh üçün səylərini inkişaf etdirmək istəyirdisə, o zaman Azərbaycanın da maraqlarını nəzərə almalıdır. Birtərəfli mövqe sərgiləmək doğru deyil. Mirzoyanın açıqlaması onu göstərir ki, Aİ mövqeyini dəyişmək istəmir. Baxmayaraq ki, Azərbaycanla Ermənistan arasında ikitərəfli əlaqələr inkişaf edir. Əgər Aİ öz siyasətinə yenidən baxmasa, bu, bir növ Rusiyanın narrativləri ilə üst-üstə düşmüş olacaq. Söhbət ondan gedir ki, Brüssel hazırkı səhv siyasəti ilə Ermənistanda revanşistlərə yardım etmiş olur. Əgər Aİ Cənubi Qafqazda möhkəmlənmək istəyirsə, ilk növbədə Azərbaycanla iqtisadi münasibətlərə dəyər verməlidir. Sual doğuran, əlavə problem yaradan məsələləri ümumiyyətlə gündəmə gətirməməlidir. O baxımdan Ermənistanla təktərəfli əlaqələr müsbət nəticə verməyəcək”.
Vidadi ORDAHALLI
