İlqar Hüseynli: “Onun mandatının ləğv edilməsinin daha ciddi səbəbləri var və onu ya açıqlamırlar...”
Son günlərin müzakirə olunan mövzularından biri Naxçıvan Ali Məclisinin 4 saylı Yengicə Seçki Dairəsindən olan deputatı Əli Abbasovun mandatının ləğv olunması ilə bağlıdır. Rəsmi məlumata görə, Mərkəzi Seçki Komissiyası tərəfindən 11 dekabr 2025-ci il tarixdə Əli Abbasovun deputat mandatından məhrum edilməsi haqqında qərar qəbul olunub.
Qeyd edilir ki, onun barəsində Ali Məclisə daxil olmuş vətəndaş müraciətləri əsasında İntizam Komissiyası tərəfindən intizam icraatı başlanılıb. Qanunvericiliyin tələblərinə uyğun olaraq İntizam Komissiyasının hazırladığı rəy Naxçıvan Mərkəzi Seçki Komissiyasına təqdim edilib.
Yayılan rəsmi açıqlamada qeyd olunur ki, Ə.Abbasova qarşı vətəndaş müraciətləri əsasında müvafiq addım atılıb. Lakin məsələnin təfərrüatı tam aydın deyil. Ə.Abbasovun deputatlıq mandatının ləğv edilməsinin səbəbinin qeyri-müəyyən olması cəmiyyət arasında çox ciddi söz-söhbətlərin yaranmasına gətirib çıxarıb. Onun deputat səlahiyyətlərindən, mandatdan məhrum edilməsinin belə qeyri-müəyyən şəkildə təqdim olunmasına ekspertlər də birmənalı yanaşmır. Bəziləri hesab edir ki, Ə.Abbasovun hansı hərəkəti etdiyi rəsmi qurumlar tərəfindən tam açıqlanmalıdır. Ən azından, ona səs verib deputat seçənlər onunla bağlı dəqiq məlumat gözləyirlər. Yəni həqiqətdə nə baş verib, ona qarşı niyə belə addım atılıb? Yaxud Ə.Abbasov özü kimə qarşı hansı hərəkəti edib ki, bu vəziyyətlə üzləşib?
Rəsmən yazırlar ki, Ə.Abbasov barədə seçicilərdən çoxsaylı məlumatlar daxil olub və bu səbəbdən mandatı ləğv olunub. Bu adam camaata qarşı nə edib, hansı mənfi addımı atıb? Deputat kimi passiv və fəaliyyətsizmi olub? Bütün bunlara aydınlıq gətirən yoxdur. Yeni suallar doğur. Ona qarşı atılan bu addımın nə dərəcədə doğru olduğunu müəyyən etmək istəyirlər bu qeyri-müəyyənliyin içində.
Ümumiyyətlə, Ə.Abbasovun bioqrafiyası, təhsili, deputat seçilməzdən əvvəl hansı sahədə işləməsi kimi məsələlər də müəyyən maraq doğurur.
2024-cü il sentyabrın 26-da Yeni Azərbaycan Partiyasından Ali Məclisə deputat seçilən Ə.Abbasov barədə elə də geniş məlumat yoxdur. Bioqrafiyası barədə qısa məlumat əldə edə bildik. Əli Feyzulla oğlu Abbasov 1989-cu ildə İliç (İndiki Şərur) rayonu, Muğancıq Mehrab kəndində anadan olub. Naxçıvan Dövlət Universitetini Fizika ixtisası üzrə bitirib. Şərur rayon Yengicə kənd məktəbində direktor işləyib, eyni məktəbdə müəllim, metodist, Şərur rayon Kosacan kənd tam orta məktəbində direktor əvəzi, Şərur rayon Fizika-riyaziyyat təmayüllü liseyin direktoru olub.
Naxçıvan Muxtar Respublikası Ali Məclisinin sabiq deputatı Əli Abbasov bir müddət əvvəl mətbuatın gündəmində xadiməni məhkəməyə verməsi ilə yer tutub. Belə ki, o, rayon sakini - xadimə işləyən Simuzər Yusifovanın ona böhtan atdığını iddia edərək onunla bağlı Şərur rayon Məhkəməsinə müraciət etmişdi. Ə.Abbasov Simuzər Yusifovanın Cinayət Məcəlləsinin 147-ci (böhtan) maddəsi ilə cəzalanmasını tələb etmişdi.
Ərizədə qeyd olunurdu ki, Simuzər Yusifova deputat Əli Abbasovun guya qızının evinə zorla daxil olması, sərxoş halda avtomobil idarə etməsi, müəllim adına layiq olmaması və əvvəlki illərdə Şərur rayonunda bir neçə ailəni dağıtması kimi əsassız ittihamlar irəli sürüb.
Deputatın nümayəndəsi şikayət ərizəsini düzgün hazırlamadığı üçün məhkəmə işi icraata götürməkdən imtina etmişdi.
Bunlar Ə.Abbasov barədə yazılanlardır. Bəzi ekspertlərə görə, onun deputatlıq mandatının ləğv olunmasında bu amillər də rol oynaya bilər.
Sosial-iqtisadi sahə üzrə ekspert İlqar Hüseynli “Bakı-Xəbər”ə bildirdi ki, ümumiyyətlə parlamentar qaydalarda intizam komissiyası fəaliyyət göstərir, onlar müəyyən dönəmlərdə hansısa bir deputat haqqında müxtəlif məzmunlu qərarlar qəbul etmək səlahiyyətinə də malikdirlər. “Son illər biz parlamentin iki deputatının intizam komissiyasının qərarına əsasən deputat mandatından məhrum edilməsini görmüşük. Biri Hüseyn Abullayevdir ki, o vaxt parlamentdə onunla Fəzail Ağamalı arasında insdent yaranmışdı və bu, ictimaiyyətdə geniş müzakirələrə səbəb oldu. Orada kimin haqlı, kimin haqız olduğu başqa məsələdir. Eyni zamanda, Xaçmazdan deputat seçilən Eldəniz Səlimov mandatdan məhrum edildi. Bu da, səhv etmirəmsə, Xaçmazda restoranda yaşanan insidentlə bağlı idi. Deputatlıq məzmununa, statusuna yaraşmayan hərəkətlərə yol verdiklərinə görə hər ikisinin manadatı ləğv olundu və barələrində həbs qətimkan tədbiri seçildi. O vaxt deputatlar barədə intizam komissiyasının çıxardığı qərarla bağlı formal da olsa ictimaiyyətdə məlumat vardı ki, konkret nəyə görə mandatları ləğv edilib.
Naxçıvan Muxtar Respublikasında baş verən deputatın mandatının ləğv olunması olayında ümumi məzmun olaraq göstərilir ki, onunla bağlı məlumatlar daxil olub. Bu məlumatlar nə barədədir, nə dərəcədə ciddi məlumatlardır? Deputatın passivliyi, fəaliyyətsizliyi ilə bağlı məsələ varsa, onda vətəndaşlar yalnız deputatın geri çağırılması ilə bağlı imzatoplama kampaniyası aparır və imzatoplamadan sonra onu müvafiq komissiyaya təqdim etməklə deputat mandatını ləğv edə bilir. Yəni sırf məsələnin mahiyyəti budursa ki, deputat passivdir, fəaliyyətsizdir, məsələyə bu kontekstdən yanaşsaq, Milli Məclisdə 25 ildir danışmayan deputatlar oturublar, elələri var ki, heç onları tanıyan yoxdur. Bu məntiqlə hər biri haqqında üç-dörd nəfər yazarsa ki, filan deputat passivdir, çıxış etmir, danışmır, onda biz ucdantutma mandatlarını ləğv etmək zorunda qalarıq.
Bu da bir presedent yaratdı. İndiyə qədər eşitməmişdim ki, deputatın passivliyinə görə İntizam komissiyası belə bir qərar qəbul etsin, deputatın mandatını ləğv etsin. Görünür, onun mandatının ləğv edilməsinin daha ciddi səbəbləri var və onu ya açıqlamırlar, ya da açıqlamağa lüzum görmürlər”.
İ.Hüseynlinin fikrincə, Milli Məcisin və Ali Məclisin üzvləri vətəndaşlar tərəfindən seçildiyi üçün onların mandatları ləğv olunursa, bu olduqca ciddi səbəblərə görə baş verməlidir: “Bunun üçün çox ciddi səbəblər olmalıdır. Çox yaxşı olar, ortaya daha dərin detallar, arqumentlər qoyulsun ki, insanlarda suallar yaradan qeyri-müəyyənlik aradan qalxsın. Tutalım, korrupsiya faktoru varsa o qeyd olunsun. Bu gün Milli Məclisdə elə deputatlar var ki, onların korrupsiya, ailə biznesi qurması, biznes şəbəkəsi yaratması və sairdə adının hallanması ilə bağlı kifayət qədər tutarlı məsələlər qaldırılır. Amma buna heç əhəmiyyət verən yoxdur. Halbuki, qanunla deputatlara biznes fəaliyyəti yasaqdır.
Naxçıvandakı hadisə ilə bağlı suala birmənalı cavab vermək çətindir. Onun mandatı doğrudan da çox əsaslı və tutarlı faktlar əsasındamı ləğv olunub? Yaxşı olardı ki, Ali Məclisin İntizam Komissiyası bu məsələ ilə bağlı ictimaiyyətə detallı, dolğun məlumat versin...”-deyə İ.Hüseynli qeyd etdi.
İradə SARIYEVA
