AXCP sədri Əli Kərimlinin “Ramiz Mehdiyev işi” ilə əlaqədar istintaqa cəlb olunmasını və məhkəmənin onun barəsində həbs qətimkan tədbirini çıxarmasını müəyyən qruplar və şəxslər narazılıqla və narahatlıqla qarşılayıblar.
Ramiz Mehdiyev hara, Əli Kərimli hara? Onillərlə bir-birinə qarşı mübarizə aparan bu iki adam necə bir yerdə ola bilər?
R.Mehdiyev Rusiyanın əsas adamı olmaqla Azərbaycanda Kremlin təlimatlarını reallaşdırıb.
Ə.Kərimli isə bütün çıxışlarında Rusiya hakimiyyətini, onun “imperiya siyasətini” lənətləyib.
Baxışları bu qədər fərqli olan iki şəxsin hakimiyyət uğrunda mübarizədə birləşməsi mümkündürmü?
Bax beləcə gəlib çıxdıq əsas məsələyə-hakimiyyət uğrunda mübarizəyə.
Bu elə məsələdir ki, həm Ramiz Mehdiyevi, həm də Əli Kərimlini kiminlə desən birləşdirər.
Əgər Ə.Elçibəyin gənc yaşlarından himayəyə götürdüyü və 28 yaşında Dövlət katibi təyin etdiyi Ə.Kərimli hakimiyyət maraqları naminə:
Liderinin etimadından sui-istifadə edərək onu aldadır və partiyanı ələ keçirə bilirsə;
Özünün formalaşdırdığı və sədrlik etdiyi qurumun-Rəyasət heyətinin iclaslarında Elçibəyi çıxılmaz vəziyyətə sala bilirsə;
AXCP sədrinin ağır xəstəliklə mübarizə apardığı günlərdə və rəhmətə getdiyi gün onu təhqir edən yazıların dərc olunmasını təşkil edə bilirsə;
Prezident seçkilərində komanda yoldaşı İsa Qəmbəri deyil, təmsil olunduğu hakimiyyətin yıxılmasında baş rollardan birini oynayan Etibar Məmmədovu dəstəkləyə bilirsə;
Elçibəydən sonra AXCP liderliyini ələ almaq üçün R.Mehdiyev başda olmaqla hakimiyyətin müəyyən dairələri ilə danışıqlara gedib rəqiblərini sıradan çıxarırsa və dalbadal Milli Məclisə düşmək imkanı əldə edə bilirsə, eyni hərəkətləri bu gün-hakimiyyətə gəlmək şansının böyük sürətlə “0” nöqtəsinə yaxınlaşdığı məqamda nədən “sınamasın” və adət etdiyi “mənəvi” davranışdan imtina etsin.
Təbii ki, bu şəraitdə onun ittifaqa girə biləcəyi şəxs, mənəvi cəhətdən ona hamıdan yaxın olan Ramiz Mehdiyevdir.
Ulu öndər Heydər Əliyevin və prezident İlham Əliyevin yardımları ilə yüksək vəzifələrə qalxan, bəzilərinin onu “boz kardinal” adlandırmasından xoşhallanan Ramiz Mehdiyev.
25 ildən artıq dövlət rəhbərliyində olan və vəzifədən getdikdən sonra Azərbaycan dövlətinin 44 günlük müharibədə və 23 saatlıq “antiterror” əməliyyatında qazandığı qələbələr barədə “danışmaq istəmədiyini” deyən Ramiz Mehdiyev.
Əli Kərimli ilə Ramiz Mehdiyev bu gün Azərbaycanda mənəvi cəhətdən bir-birinə hər kəsdən çox yaxın olan iki “ruh ekizi”dir.
Üzərlərində haqqı olan şəxsiyyətlərə xəyanət edən və hakimiyyət naminə hər kəslə ittifaqa getməyə hazır olan bu iki şəxs ən təbii müttəfiqlərdir və onların bir yerdə hakimiyyət uğrunda mübarizə aparmaları heç kimi təəccübləndirməməlidir.
Bu “müqəddəs mübarizə”də onların planlaşdırdığı addımlar, gördükləri işlər barədə isə istintaqı aparan qurumlar yəqin ki, yaxın zamanlarda ətraflı məlumat verəcəklər.
Gözləyək.
Abutalıb Səmədov “Alyans”SAM-ın sədri
