Fikrət Yusifov: “9 icra başçısının biznes imperiyası insanların gözünü qamaşdırır”
Bölgələrdə, əlbəttə ki, məşğulluqla bağlı məsələlər əsas prioritetlərdən biridir. Bunu Prezident İlham Əliyev Naxçıvanda Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edərkən bildirib.
“Azərbaycanda bütövlükdə məşğulluqla bağlı son illər ərzində çox böyük islahatlar aparılıb, işsizliyin səviyyəsi aşağı düşüb. Ancaq o da həqiqətdir ki, bu gün hələ də bölgələrdən Bakıya, böyük şəhərlərə miqrasiya meylləri mövcuddur. Bunun müxtəlif səbəbləri var”, - deyə dövlət başçısı əlavə edib.
Fakt odur ki, son 3 ildə Naxçıvanda məşğulluq sahəsində vəziyyət xeyli ağırlaşıb və minlərlə əhali işini itirib. Ölkə başçısının fikirlərindən belə qənaət hasil olur ki, Naxçıvanda faktiki olaraq iş yerləri azalıb, yeni iş yerlərinin açılması faizi çox aşağıdır. Prezident məlum fikirləri ilə əslində Naxçıvanda məşğulluqla bağlı vəziyyətin getdikcə pisləşdiyinə eyham vurur. Həmçinin iş yerlərinin açılması ilə bağlı yeni təyin edilmiş kadrların üzərinə çox ciddi vəzifələr qoyur. Burada söhbət təkcə Naxçıvandan getmir. Azərbaycanın bir sıra bölgələrində də iş yerlərinin açılması ilə bağlı vəziyyət pisləşib. Görünən odur ki, Prezident İlham Əliyev Azərbaycanın bütün bölgələrində, o cümlədən Naxçıvanda məşğulluqla bağlı vəziyyətin ağırlaşmasına eyham vurur.
“Bu axının böyüməsinin əsas günahkarlarından biri və birincisi yerlərdə İcra hakimiyyətlərinin başında dayanan rəhbərlərdi”
Sözügedən məsələni “Bakı-Xəbər”ə şərh edən sabiq maliyyə naziri Fikrət Yusifovun fikrincə, Bakı şəhərinin və onun yerləşdiyi Abşeron yarımadasının çoxsaylı müəssisələrlə, mənzillərlə, avtomobillərlə və təbii ki, insanlarla hədsiz yüklənməsi bu gün hər bir birimizi narahat edən başlıca məsələlərdən biridir: “Təəssüf ki, bu, getdikcə daha da dərinləşən bir problemə çevrilməkdədir. Bakı şəhərində və bütövlükdə Abşeron yarımadasında yaranmış bu sıxlıq bu ərazidə yaşayan hər bir insanın həyatına bu və ya digər formada təsir edir. İnsanlar bəzən avtomobillə 10-15 dəqiqəyə qət edilməli olan yolda saatlarla vaxt itirməli olurlar. Bakı şəhərində avtomobil park etmək günü-gündən çətinləşir və s. Hər il ölkəyə orta hesabla gətirilən 90-95 min avtomobilin təqribən 90%-ə qədəri Abşeron yarmadasında və xüsusilə də Bakı şəhərində istifadə olunur ki, bu da ildən-ilə şəhərdə sıxlığı daha da artırır, avtomobil tıxaclarının daha da böyüməsinə səbəb olur. Unutmayaq ki, Bakı şəhəri dəniz səviyyəsindən 28 metr aşağı səviyyədə yerləşir və bu göstəriciyə görə o, dünya ölkələrinin paytaxtları arasında birinci yeri tutur. Paytaxtımızın dəniz səviyyəsindən bu qədər aşağı olması da Bakıda atmosferin daha çox çirklənməsini və ekologiyanın korlanmasını şərtləndirən səbəblərdən biridir”.
Professorun fikrincə, yeni təyin olunan icra başçılarını qəbul edərkən dövlət başçısının rayonlardan paytaxta miqrasiya probleminə xüsusi olaraq toxunması təsadüfü deyil: “İnsanlar nədən rayonlardan Bakıya, Abşeron yarımadasına axışırlar? Çünki bu gün yerlərdə adi bir iş tapmaq belə olduqca çətindir. Yerdə iş tapa bilməyən insan bilir ki, yaşadığı rayondan fərqli olaraq Bakıda hər hansı bir iş tapmaq şansı olacaq. İnsanlar məhz buna görə əlacsız qaldıqda mərkəzə axışırlar. Bu axının böyüməsinin əsas günhkarlarından biri və birincisi yerlərdə İcra hakimiyyətlərinin başında dayanan rəhbərlərdi. Son 5-6 ildə işdən çıxarılıb həbs edilən 9 icra başçısının biznes imperiyası insanların gözünü qamaşdırır. Bunlar öz biznes imperiyalarını nəyin hesabına qura bilirlər? Təbii ki, ilk növbədə sahibkarların hesabına. Bu o sahibkardır ki, rayonda iş yeri açmaq, rayonun iqtisadiyyatına töhfə vermək istəyir. Lakin təəssüflər olsun ki, sahibkarın yaratdığı biznesi görən kimi, İcra başçıları onlara “şərik” olmağa qalxırlar. İcra başçısı sahibkara açıq şəkildə deyir ki, sənin bu rayonda fəaliyyətin mənimlə şəriklikdən keçə bilər. Sahibkar buna razı olmadıqda İcra başçısı hər vəchlə onun fəaliyyətini əngəlləyir ki, bu da sonda müəssisənin fəaliyyətinin dayandırılmasına və biznesin rayondan çıxıb getməsinə səbəb olur. Bax, sahibkarları bu gün regionlardan qaçırdan əsas bəla budur. İcra başçısı sahibkarın qarşısında durmamalı, onun qolundan tutub dəstək verməli və minnətdar olmalıdır ki, sahibkar onun rəhbərlik etdiyi rayonda yeni iş yerləri açır. Çox təəssüf ki, bu gün biz bunu görə bilmirik. Nə qədər acınacaqlı olsa da bu gün yerlərdə İcra hakimiyyətlərinin yerli və xarici kapitalın regiona cəlb edilməsi sahəsindəki fəaliyyəti qeyri-kafi qiymətə layiq bir səviyyədədir”.
Vidadi ORDAHALLI
