Şəmsəddin Əliyev: “Rusiya güc strukturunun hüququ pozmasından görünür ki, burada siyasi motiv var”
Azərbaycanın Rusiyadakı fövqəladə və səlahiyyətli səfiri Rəhman Mustafayev Rusiya Xarici İşlər Nazirliyinə çağırılıb. Bu barədə Rusiya XİN-in mətbuat xidməti məlumat yayıb.
XİN bildirib ki, Yekaterinburqda Rusiya Federasiyası vətəndaşı olan, Azərbaycan əsilli şəxslərlə bağlı istintaq hərəkətləri Rusiya qanunvericiliyinə tam uyğun şəkildə aparılıb: “Azərbaycanın Rusiya hüquq-mühafizə orqanlarını səlahiyyətlərini aşmaqda ittiham etmək cəhdləri Rusiya Federasiyasının daxili işlərinə müdaxilə sayılır. Bu məsələyə dair ətraflı məlumat Rusiya Federasiyasının İstintaq Komitəsi tərəfindən təqdim olunub”.
Necə yəni, Rusiya hüquq-mühafizə orqanlarını səlahiyyətlərini aşmaqda ittiham etmək cəhdləri Rusiya Federasiyasının daxili işlərinə müdaxilə sayılır? İstintaq bitməmiş rəsmən bu cinayətə haqq qazandırırlar. Halbuki, onların güc tətbiq edilərək öldürülməsi ortadadır.
“Həmyerlilərimizin ölümünə bais olan güc strukturlarının nümayəndələri cəzalandırılmalıdır”
Sözügedən məsələyə aydınlıq gətirən hüquqşünas Şəmsəddin Əliyev “Bakı-Xəbər”ə açıqlamasında bildirdi ki, Rusiya tərəfinin belə yanaşması tamamilə absurddur: “Əvvəla bu, hər iki ölkənin qüvvədə olan cinayət hüququ, cinayət-prossesual hüquq normalarına daban-dabana zidd yanaşmadır. Bu, Rusiya dövlətinin nə diplomatiyasına, nə daxili və xarici siyasətinə, nə də beynəlxalq hüququn hamılıqla tanınan 10 prinsipinə uyğundur. Onlardan biri də insan hüquq və azadlıqlarına hörmət edilməsi və beynəlxalq öhdəliklərin vicdanla yerinə yetirilməsidir. Ortada kifayət qədər ciddi şübhələrin olduğu bir şəraitdə hüquq-mühafizə orqanlarına haqq qazandırmaq ciddi pozuntudur. Rusiya güc strukturunun davranışından, hüququ pozmasından görünür ki, burada siyasi motiv var. Çünki məqsədyönlü şəkildə qaba davranaraq hüququ pozurlar. Bu, bir daha Rusiya hakimiyyətinin antisemitizmə meylliliyini ortaya qoyur. O cümlədən, Azərbaycan xalqına, dövlətinə müstəsna dərəcədə hörmətsizliyin bariz nümunəsidir. Rusiya hüquq-mühafizə orqanları açıq şəkildə heç bir qaydalara əməl etmədən kobud, səlahiyyət həddini aşma hallarına yol veriblər. Əslində bunun özü başqa bir cinayət hadisəsinin mövzusudur. Birmənalı şəkildə burada hər hansı bir dövlətin daxili işinə müdaxilədən söhbət gedə bilməz. Ortada cinayət faktı var və Rusiya nümayişkaranə şəkildə bunu görməzdən gəlir. Budur məsələnin mahiyyəti. Azərbaycan dövlətinin maraqlarına tamamilə zidd olan bir hal ortadadır. Rusiya miqrantlardan Azərbaycana qarşı kobudcasına bir maşa kimi istifadə edir. Ona görə də hesab edirəm ki, Rusiya bu hüquq pozuntusuna son qoymalıdır. Həmyerlilərimizin ölümünə bais olan güc strukturlarının nümayəndələri cəzalandırılmalıdır. Heç bir halda Rusiya tərəfinin atdığı addımlara haqq qazandırmaq olmaz. Çünki baş verənlər hüquqa zidd addımlar olmaqla yanaşı, iki dövlət arasında münasibətlərə də mənfi təsir göstərir”.
Vidadi ORDAHALLI
