Qulamhüseyn Əlibəyli: "Avroparlamentin bu qərəzli qətnaməsi Azərbaycana təzyiq məqsədi güdür"
Məlum olduğu kimi, Avropa Parlamenti Azərbaycanda insan haqlarının vəziyyəti ilə bağlı qərəzli, ədalətsiz qətnamə qəbul edib. Belə ki, 453 deputat qətnamənin lehinə, 31-i əleyhinə səs verib, 89 nəfər isə səs vermədə iştirak etməyib.
Qətnamədə bir sıra absurd tələblər irəli sürülüb. Məsələn, qeyd olunub ki, Avropa İttifaqının mülki missiyasının mandatı genişləndirilsin. Bundan başqa, COP-un Bakıda keçirilməsi ləğv edilsin. Azərbaycanla Aİ arasında enerji sahəsində imzalanan Strateji Tərəfdaşlıq memorandumundan imtina edilsin. Dördüncüsü, Azərbaycandan tələb edilsin ki, işğal olunmuş Ermənistan torpaqlarından çıxsın. Guya Azərbaycan qonşu Ermənistana qarşı təcavüzkar davranıb.
"Erməni maraqlarından çıxış edən dövlətlər vəziyyəti dramatikləşdirməkdən ötrü belə qərarların qəbuluna rəvac verirlər"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəyli hesab edir ki, Avroparlamentin bu qərəzli qətnaməsi Azərbaycana təzyiq məqsədi güdür: "O baxımdan bu, növbəti qərəzli qətnamələrindən biridir. Özü də bunun COP29 tədbiri ərəfəsində qəbul edilməsi məkrli məqsəd güdür. Məqsəd tədbir ərəfəsində Azərbaycana müəyyən təzyiqlər göstərmək, ölkənin beynəlxalq nüfuzunu aşağı salmaqdır. Qətnamədə nəzərdə tutulanlar dəfələrlə çeynənmiş məsələlərdir. Özü də son dövrlərdə bunlar geniş miqyasda Azərbaycana qarşı tətbiq olunur. Həm bir sıra nüfuzlu KİV-də, həm də ayrı-ayrı dövlətlərin parlamentlərində bu qaralama kampaniyası aparılır. Avropa İttifaqının bəzi təsisatları sanki Azərbaycana qarşı yarışa giriblər. O baxımdan hesab edirəm ki, belə çirkin xarakterli qətnamələrə əhəmiyyət vermək lazım deyil. Ermənistan parlament spikeri Alen Simonyan açıq etiraf edir ki, Qarabağ Azərbaycana məxsusdur. Avroparlamentin qəbul etdiyi qətnamədə isə yazılır ki, Azərbaycan Ermənistan ərazisini işğal edib. Nə qədər utanmaz olasan ki, belə iddia ilə çıxış edəsən. Hesab edirəm ki, bu cür təzyiqlər Azərbaycanı tutduğu mövqedən döndərə bilməz. Fikrimcə, Azərbaycanın BRİKS sammitində iştirak etməsi də bəzi dairələri narahat edir. Başa düşmək istəmirlər ki, bu cür yollarla əməkdaşlıq olmur. Bizi nəyəsə məcbur edə bilməzlər. Azərbaycan onsuz da Avropa İttifaqı ilə əməkdaşlıq edir. Xüsusən də enerji sahəsində. Bir sıra layihələri Aİ ilə birlikdə həyata keçirir. Sadəcə olaraq, erməni maraqlarından çıxış edən dövlətlər vəziyyəti dramatikləşdirməkdən ötrü belə qərarların qəbuluna rəvac verirlər. Azərbaycanı təcrid etməyə çalışırlar, amma anlamırlar ki, bununla nəyəsə nail ola bilməyəcəklər. Əksinə, özləri daha da əziyyət çəkmiş olacaqlar. Ona görə də belə qərarların heç bir əhəmiyyəti yoxdur. Nə qədər istəyirlər danışsınlar. Azərbaycan öz yolunu tutub. Bu, kiminsə xoşuna gəlməyə bilər, kimsə bəyənməyə bilər. Ancaq bu, nəyisə dəyişmək iqtidarında deyil. Azərbaycanda müəyyən problemlər var, amma bunları bəhanə edib ölkənin üzərinə hücum etmək doğru deyil".
Vidadi ORDAHALLI
