Rauf Zeyni: "Yalandan demokratioyadan danışmaqla pərdələnmək lazım deyil, o pərdəni bir azca qaldıranda Avropa ölkələrinin əsl siması görünür"
Başqa ölkələrə insan haqlarından dərs keçməyə çalışan, uşaq hüquqlarını müdafiə etdiklərini iddia edən Avropa ölkələrində əslində vəziyyət tam başqadır. Başqalarından tələb etdiklərinə özləri əməl etmək istəmirlər. Xüsusən də bu ölkələrə pənah aparmış miqrantların, qaçqınların uşaqlarına qarşı ayrıseçkilik, təhlükə mövcuddur.
"Euronews" telekanalının bu günlərdə yaydığı bir süjetdə bu məsələyə toxulub.
Belə ki, Qesse Xaren adlı Hollandiya jurnalisti Avropada itkinlər layihəsi həyata keçirib. O, layihə çərçivəsində araşdırma aparıb, buna görə də ona Avropanın çox əhəmiyyətli bir mükafatı verilib.
O jurnalist araşdırıb üzə çıxarıb ki,
Avropada hər gün 47 uşaq itkin düşür. O, 2021-ci ildə apardığı araşdırmalarla bu qənaətə gəlib ki, 2021-ci ildən bu yana Avropa ölkələrində hər gün 47 nəfər miqrant uşağı yoxa çıxır. Özü də təkcə miqrant uşağı. Təsəvvür edirsiz bu nədir? Bu, Avropada insan hüquqlarının müdafiəsinin mənzərəsini çox parlaq formada ortaya qoyur. Buna baxıb nəticə çıxarsınlar ki, Avropa ölkələrində insan hüquqları necə qorunur. Burda insan həyatı demək belə ucuzdur. Bu o Avropa ölkələrində qaçqın miqrant uşaqlarına qarşı bir nümunədir və insan hüquqlarının qorunmasının yarıtmaz səviyyədə olduğunu göstərir.
"Avropa ölkələrində itkin düşən miqrant uşaqlar, böyük ehtimalla, orqan alverçilərinin..."
Müstəqil ekspert Rauf Zeyni "Bakı-Xəbər"ə bildirdi ki, əlbəttə, hər şey o qədər də göründüyü kimi deyil. "Yəni Avropa dünyadan insan hüquq və azadlıqlarının yüksək səviyyədə qorunub saxlandığı bir coğrafiya, bir məkan kimi görsənir. Əslində Avropa, bütövlükdə isə hər bir Avropa ölkəsi üzrə təhlil aparılanda baxıb görürük ki, mənzərə başqadır. Məsələn, elə Avropa ölkələri var ki, demokratiyadan, insan hüquqlarından danışır, ancaq terrorizmi dəstəkləyir, terrorizmlə bağlı hərbi düşərgələri var. Bu necə demokratik ölkə ola bilər ki, terroru dəstəkləyir? Çirkli pulların yuyulması həyata keçirilir. Bu baxımdan, necə demokratiyadan, insan hüqqularından danışmaq olar ki, çirkli pulların yuyulması ilə məşğul olurlar?
Sözügedən layihə çərçivəsində aparılan araşdırmalar nəticəsində miqrant uşaqlarının itkin düşməsi, yoxa çıxması müəyyən edilib, özü də söhbət hər gün 47 miqrant uşağın itkin düşməsindən gedir. Bunlar necə demokratik ölkələrdir ki, orda insan orqanlarının satışından tutmuş digər cinayətlər həyata keçirilir, ona görə də miqrant uşaqlar yoxa çıxırlar. Özlərini demokratik, insan haqlarının müdafiəçisi kimi qələmə verən bu Avropa ölkələrində itkin düşən miqrant uşaqlar, böyük ehtimalla, orqan alverçilərinin, yaxud da digər cinayətkar qrupların əlinə keçirlər. Çünki buna başqa izah vermək olmur. Təbii, suallar həddən artıq çoxdur, amma bu sualları harda, kimə verək? Yəni bütün ölkələrdə qanunların aliliyi prinsipi qəbul olunub, konstitutsiyada təsbit olunub. Bütün ölkələrdə, o cümlədən də Avropa ölkələrində buna riayət olunmalıdır.
Bəzi hallarda istər miqrantlarla, istərsə də yerli vətəndaşlarla bağlı sosial müdafiə, layiqli həyat səviyyəsinin təmin olunması məsələlərində Avropa ölkələrində fərqli qanunlar, fərqli imkanlar var. Amma qeyd olunan hallar miqrantlarla insan alveri, orqanların satışı, narkomanlığın leqallaşdırılması, eyni zamanda narkotik vasitələrin qanunsuz dövriyyəsinin vəziyyəti ilə bağlı məsələlərdə təəssüf ki, Avropa ölkələrində vəziyyət o qədər də yaxşı deyil. Eyni zamanda digər beynəlxalq probelmləri də qeyd etməliyik. Məsələn, çirkli pulların yuyulması, kiçik xalqların azadlıqlarına hərbi müdaxilə, azsaylı xalqların hüquqlarının tapdanması kimi problemlər mövcuddur. Ona görə də yalandan demokratiyadan danışmaqla pərdələnmək lazım deyil, o pərdəni bir azca qaldıranda Avropa ölkələrinin əsl siması görünür. Bu çox ciddi məsələlərdir".
R.Zeyni deyir ki, bu səbəbdən də biz Avropanı və dünyanı yaxşı tanımalıyıq. O qeyd etdi ki, təbii, əlimizdə kifayət qədər faktlar var, onların əsasında da Avropa ölkələrinin qiymətini verməliyik. "Yəni hər hansısa bir formada heç bir ölkə özünün demokratik obrazını və yaxud insan hüquqlarının müdafiəçisi obrazını yaratmasın. Çünki buna gərək və ehtiyac yoxdur. Onsuz da bilinir ki, kim öz ölkəsində hansı milli maraqlara görə hansı başqa xalqların milli azadlığını, milli hüquqlarını tapdalayıb öz sümürgəçilik, müstəmləkəçilik siyasətini hansı ölkələrdə yerinə yetirib. Bunlar hamısı faktlardır. Ona görə də heç kim yalançı hüquq müdafiəçisi və demokratiya obrazı yaratmasın. Bütün ölkələr, xüsusən də Avropa ölkələri haqqında məsələlər açılır, göstərilir. Bu ölkələrdə insan hüquqlarının pozulmasından, korrupsiya cinayətlərindən tutmuş bir çox məsələlərə qədər hər şey aydındır".
R.Zeyni deyir ki, Avropa ölkələri bu nöqsanları aradan qaldırmalı və başqa ölkələri ittiham etməkdən əl çəkməlidir.
İradə SARIYEVA
