Məhərrəm Zülfüqarlı: "Tramp da yaxşı bilir ki, Azərbaycanda heç zaman xristianlar təqib olunmayıb, bu erməni uydurmasıdır, amma o, bu saxta məsələdən seçkiqabağı kampansiyasında səs qazanmaq üçün istifadə edir"
Son dövrlər bəzi xristian dövlətlər "xristian həmrəyliyini" həddindən artıq çox gündəmə gətirirlər, bununla bəşəriyyət üçün təhlükələr yaratmağa çalışırlar. Ümumiyyətlə isə, bu amildən daha çox prezidentliyə namizədlər istifadə edir.
Götürək elə ABŞ-ın keçmiş prezidenti və hazırda prezidentliyə namizəd olan Donald Trampı. Tramp da əvvəlki seçki kampansiyasından fərqli olaraq, budəfəki seçki kampaniyasında "xristian həmrəyliyi" məsələsini əlində bayraq edib. Bu azmış kimi, Qarabağın adını da təhrif edib.
ABŞ-də prezidentliyə namizəd Donald Tramp öz sosial şəbəkə hesabında yazdığı postda Qarabağı "Artsax" kimi təqdim edib: "Kamala Harris 120 min erməni xristianın dəhşətli təqiblərə məruz qaldığı və "Artsax"dan zorla köçürüldüyü zaman heç bir şey etmədi. Kamala Harris ABŞ-nin prezidenti olarsa, dünyadakı xristianlar təhlükədə olacaqlar. Mən prezident olsam, təqib olunan xristianları müdafiə edəcəyəm, zorakılığı və etnik təmizləməni dayandıracağam. Ermənistanla Azərbaycan arasında sülhü bərpa edəcəyəm".
Bunu Tramp yazıb və deyir ki, o prezident seçilməsə xristian dünyası "təhlükədə" olacaq.
"Əlbəttə, bu kimi təhlükəli məsələdən bu şəkildə istifadə etmək ziyanlıdır"
Məsələyə şərh verən siyasi icmalçı, professor Məhərrəm Zülfüqarlı "Bakı-Xəbər"ə bildirdi ki, indiki dövrdə dünyanın əsas diqqəti Gürcüstan və Amerikada keçiriləcək seçkilərdədir. Bizi Gürcüstan daha çox maraqlandırır, çünki qonşu ölkədir. Amerika isə dünya güclərindən biridir, bu baxımdan bizim diqqətimizi cəlb edir. Amma hər iki seçkidə Rusiya-Amerika amili önə çıxır. Ona görə də, Amerikada keçiriləcək seçilərdə kimin qalib gəlməsi məsələsi müzakirə oluna bilər. Ancaq bir şeyi yadda saxlamaq lazımdır ki, demokratik ölkələrdə prezidentin, yaxud parlamentin seçdiyi baş nazirin sözü əsas olur. Prezidentli respublikadırsa prezidentin səlahiyyətləri çox olur, parlamentli respublikadırsa paralamentin seçdiyi baş nazirin üstünlüyü çoxdur. Yəni bu, avtoritar rejimlərdən fərqlidir. Məsələn, biz Rusiya ilə ABŞ-ı müqayisə etsək, Amerika prezidentinin səlahiyyətində ancaq xarici siyasətdir və o daxili işə qarışmır, o halda qarışır ki, konstitutsiya pozulur və o da konstitutsiyanı bərpa etmək üçün addım atır, sonra isə çəkilir. ABŞ-ın güclü olmasının əsas səbəbi odur ki, ölkəni kiçik qəsəbədən tutmuş böyük ştatlara qədər seçkili qurumlar, bizim anlamda da desək, yerli özünüidarə qurumu olan bələdiyyələr idarə edir. Prezidentin bura qarışacağı yoxdur. Bu mənada Amerika Rusiyadan fərqlənir və inkişaf edən demokratik ölkədir. Rusiya ilə müqayisə etsək, Rusiya prezidenti, yadınızdadırsa, Ukrayna ilə müharibəyə başlamazdan əvvəl ətrafını televizora çıxardı və gözü ilə, qaşı ilə işarə göstərib məcbur etdi ki, müharibəni müdafiə etsinlər. Bir nəfər onun əleyhinə çıxmadı. Amma Amerikada bu ola bilməz. Orda prezident seçkilərində iki partiya - Demokratlar və Respublikaçılar iştirak edir, amma yerli idarəetmə orqanlarına seçkilərdə müxalifət partiyaları da iştirak edir. Ola bilsin, prezident Respublikaçı olsun, amma Konqresin, Senatın üzvlərinin əksəriyyəti Demokratlardan ibarət ola bilər. Yəni bu da perzidentin təkhakimiyyətliliyinə imkan vermir. Onun siyasətini tənqid edənlər, ona tənqidi yanaşan partiyalar, mətbuat və sair var. Ona görə də, prezident istədiyini edə bilməz".
Trampın fikirlərinə gəlincə, M.Zülfüqarlı bildirdi ki,
"xristian həmrəyliyi" və saxta "120 min erməni" amilindən Tramp seçki kampaniyasında uğur qazanmaq üçün istifadə edir. M.Zülfüqarlının fikrincə, ABŞ prezidentliyinə namizəd D.Trampın əsas məqsədi seçiciləri ələ almaq, seçkilərdə qalib gəlməkdir. "Tramp seçiciləri ələ almaq, onların səslərini qazanmaq üçün çox sözlər deyə, çox vədlər verə bilər, amma seçiləndən sonra onun üçün ABŞ-ın dövlət maraqları önə keçir. ABŞ Konqresi də, Senatı da, prezident də Amerikanın dövlət maraqlarından çıxış edir. İndiki dövrdə Azərbaycana münasibətdə Amerikanın mövqeyi məlumdur. Azərbaycan Rusiya ilə yaxındır, Ermənistan isə Qərbə yaxınlaşır, Paşinyan hökuməti Qərb səmtə üz tutur. Onların məqsədi odur ki, uzun illər Rusiyanın forpostu olan Ermənistanı Rusiyadan tamamilə qoparsınlar. Çünki Rusiyanın Ermənistanda hərbi bazaları var, Cənubi Qafqazda maraqları genişdir. Bu saat Gürcüstandakı seçkilərlə bağlı mübarizə gedir, Gürcüstanı yenidən tam öz əlinə keçirmək istəyir".
M.Zülüfqarlı bildirdi ki, Azərbaycanın isə indiki dövrdə Rusiya ilə əməkdaşlığı, ikitərəfli müttəfiqlik müqaviləsi bağlaması, əlbəttə, Qərbin ölkəmizə olan münasibətini dəyişir. "Amma bu o demək deyil ki, bu elə bu cür də olacaq. Sabah vəziyyət dəyişsin, Rusiya-Ukrayna müharibəsi başa çatsın, Rusiya get-gedə zəifləyib imperiya parçalananda, şübhəsiz, Azərbaycan Qərbə daha çox lazımdır, nəinki kasıb, kiçik Ermənistan. Çünki Azərbaycanla Qərbin əlaqələri daha genişdir və Azərbaycanı müdafiə edən Qərb ölkələrindən biri İngiltərədir. Ona görə ki, BP şirkəti Azərbaycanda neft yataqlarının istismarında uzun müddətdir ki, aparıcı rol oynayır.
Bu baxımdan, biz narahat olmamalıyıq ki, Tramp prezident seçkiləri kampaniyasında "xristianlıq həmrəyliyindən" çıxış edib, erməniləri hansısa formada müdafiə edib. Bunlar hamısı seçiciləri ələ almaq üçündür. İnanıram ki, Amerikada kimin qələbə çalmasından asılı olmayaraq, Cənubi Qafqazda Rusiyanın mövqeyi zəiflədikcə Amerikanın hər üç respublikaya siyasəti eyni olacaq. Çalışacaq ki, burda Rusiyanın daha çox mövqeyi itirilsin".
M.Zülfüqarlının sözlərinə görə, əslində xristian amilindən istifadə etmək eyni zamanda təhlükəli tendensiyadır. ABŞ-da prezidentliyə namizədlər də yaxşı bilir ki, "Artsax" deyilən bir qurum yoxdur, ora Azərbaycan torpağı Qarabağdır və 120 min erməni "qaçqını" söhbəti də yalandır. "Tramp da yaxşı bilir ki, Azərbaycanda heç zaman xristianlar təqib olunmayıb, bu erməni uydurmasıdır, amma o, bu saxta məsələdən seçkiqabağı kampansiyasında səs qazanmaq üçün istifadə edir. Əlbəttə, bu kimi təhlükəli məsələdən bu şəkildə istifadə etmək ziyanlıdır. Bu bütün bəşəriyyət üçün təhlükə yarada biləcək haldır. Amma hesab edirəm ki, Tramp bu fikirləri işlətsə də, prezident seçilsə bu "vədini" icra etməyəcək".
M.Zülfüqarlı onu da qeyd etdi ki, ABŞ-da prezidentliyiə namizədlər həmişə erməni faktorundan istifadə edir, bu da ABŞ-dakı ermənilərin səsini qazanmağa xidmət edən bir siyasətdir.
İradə SARIYEVA
